KALUMLU 10
10
Nchumhmei Taanclou khang Huayneymei
1He Ringhpouc, aniw ryanra bammei ganv khou,
tabui swna nang hei saanv duc bam tu cho?
Tabui swna nang nkamh bam tu cho?
2Meicsimei nunc ramhkhe swna lungcsimei nunc ta rai e;
kaniw ta kaniw phac khou timanclou o.
3Meicsimei tei kamei kahawmei simei khou tei kagaengh sw e;
agaamvpui mei tei Ringhpouc ta siang e khatni laalou mak ge.
4Daihriw swna meicsimei tei Ringhpouc ta thay mak ge,
kumna Ravguangc maek ge twna ning e.
5Meicsimei tei ramh lam katana khou lungcgay bam nuh e;
tiki kamei thay tangh makmei khou Ravguangc latzan nai e;
kamei zauczihmei nunc ta mala e.
6“Ai kalung dat zat ni tu hamh the,
akhou ryanramei keylou zat ni tu hamh the,”
twna meicsimei rui kakhanh e.
7Kamwang khou siangmei,
saraamhmei khatni kadungmei padik ge;
kamei hei karaengmei,
khatni simei lat sa khang rouh mak ge.#Rom 3.14
8Rihou rui raenghbangc khou nchwanna,
kakhuay maekmei nunc ta swluaimei kumc,
kamei rui ramh ngam lakmei suanmei nunc ta nrik ge.
9Kamangliangpui kumcna kamei dupna nchwan bam e.
Kamei lungcsimei ta nrik bam e;
kamei rui kaniw ta kaphac khou rui nymna zay tat the.
10Meic nzimei nunc baanc khou keyloumei sansimei nunc ta tei,
kaniw rui niak puatlou the.
11“Mi kumhmei tei Ravguangc amuc kanmei tuang di the,
kamei kamik tanguihna how ni tu hamh e,”
twna meicsimei rui kakhanh e.
12He Ringhpouc, meicsimei nunc ta tei dandi tiilou o!
Ryanra bammei nunc ta tei ningtowlou o!
13Akumhna meicsimei rui Ravguangc ta ramhsak makna,
“Kamei ata dandi tii ni tu hamh e,” twna ning bam tu cho?
14Tiki nang thu how e;
ryanra bammei ta tei nang thaylou e,
kumna nkhavlou khang chamdaanv bam e.
Ngangv bamv maekpui mei tei nang khou ngangvlou e;
nang na hei lungc thuy lakmei nunc ta nkhavloumeipu kiu e.
15Meicsimei khatni kataanv simei nunc pumtan tei riambaulou o;
kaniw tuang simei guay tei nsaekclou makna phu patlou o.
16 Ringhpouc hei tingsaeng khang guangh e.
Kumna zentelmei nunc tei
katuang kandic khou rui maan kan puni.
17He Ringhpouc, niamhmei nunc rui huayneymei nang chulou e;
nang rui kaniw ta tibauclou e.
18Rai riu khaengvmei khatni nruna nunc rui
kapna huaymei nang chulou e;
kandih maansei na rui tiping bam dat mak khang,
nang rui kaniw khang latzan swlou e.
Currently Selected:
KALUMLU 10: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
