KALUMLU 37
37
Meicsimei khatni Meicgaymei tuang Nganvlou Nimei
1Meicsimei nunc zaeng rui lungh geih rio;
nkhuaimei taanv taanc bammei nunc ta mamav riu.
2Kaniw tei puc bwan kumc maan nuangc kan ni de;
ramh bwan kumc theic kan puni.
3 Ringhpouc khou lwm o,
gaymei taanc o, lungh geih kadan makna
mi kandic khou hei lungc bam o.
4Nang Ringhpouc khou neihla bam o,
kum e thei nang rui kahawmei tei,
kamei rui tiilou puni.
5Nang panty Ringhpouc khou tiilou o;
kakhou lwmlou o,
kamei rui nang ta nkhavlou puni;
6kamei rui nang tuang ravchaptatmei panty tei
tinggaanc neih souh kumclou puni,
nang tuang nchumhmei panty tei neihrinkin neic kumc tigaanclou puni.
7Khaengv saengc o,
Ringhpouc maan zauc o.
Lungcgay thau bammei nunc,
khatni kaniw tuang simei raeng guang tangc
bammei nunc lam khou tei rui lungh geih riu.
8Lunghpuamh riu,
lungh ryanra riu;
hei tei rui simei khou zaylou puni.
9 Ringhpouc khou lwmloumei nunc tei mi kandic hei laa puni;
meicsimei nunc ta alay ganc puni.
10Meicsimei nunc tei maan nuangc kan ni de;
nang kaniw ta phu bam sini phu tow dat lak khe.
11Niamhmei nunc rui mi kandic hei laa puni;
lungc chingkhiuhna,
chuzaenghna lungc bam puni.#Met 5.5
12Meicsimei nunc rui ravchaptatmeipu ta
sw kasic khang nrik bam e,
kaniw huc khaic ndyang kariak riak bam e.
13Tiki Ringhpouc rui meicsimei nunc ta nuic e,
kalam thu kaniw ta swmaan nimei tingmik
ana the twmei kamei thay e.
14Lungcsimei khatni lungcthuy lakmei nunc ta swluai khang,
nchumhmei taanhmei nunc ta swluai khang,
meicsimei nunc baengsaeng sat pat the,
kaniw saucpai mbwng pat the.
15Tiki kaniw baengsaeng rui kaniw lungthw biw puni,
kaniw saucpai guay swtuai puni.
16Ravchaptatmei tuang katit na naimei tei,
meicsimei nunc tuang lanv guay suangc gaeng e.
17Kalam thu Ringhpouc rui
meicsimei nunc baancpwam riam baulou puni,
tiki ravchaptatmei ta gaeklou e.
18 Ringhpouc rui kalat piumei guay ta kanlou e;
mi kandic hei tingsaeng kaniw khang sw puni.
19Kaganv simei ganv khou kaniw ryanra lak ge,
nkow-ndaapcmei ganv khou,
kaniw khang gaat tuang nai lak ge.
20Tiki meicsimei nunc theic puni;
Ringhpouc ta zauczihmei guay
mwnpwang kumc maan kan puni;
maikhou kumc maan puni.
21Meicsimei nunc kaniw pow khangh mak ge,
tiki meicgaymei thu baanh daicna tiipat re.
22 Ringhpouc suaihiam phunghmei nunc rui
mi kandic hei laa puni;
tiki kasyang keyloumei nunc ta alay ganc puni.
23 Ringhpouc rui meicgaymei ta kamei
tat nimei chaeng khou zaylou e,
kata tipianmei nunc ta gaeklou e.
24Kaniw bow key sini,
bow suang bam lak ge;
Ringhpouc rui kaniw ta zay thaulou dat puni.
25Ai karacpouc di the;
lungc saengc sih the;
tiki ravchaptatmei ta
Ringhpouc rui ganc patloumei ta,
kanac nunc neytu bammei ta how mak ge.
26Kamei kabaanc daicna tiipat tanh tan bam e,
meic nunc khang tipou pat re,
kanac nunc hei suaihiam e.
27Simei khou rui tat pat ro,
gaymei taanc o; kum e thei nangkik nangta
mi kandic khou hei lungc tanh tan bam puni.
28Kalam thu Ringhpouc thu nchumhmei ta kahaw e,
lwmnuhmei kamei nunc ta mpat mak ge.
Kamei rui kaniw ta tingsaeng gaeklou e;
tiki meicsimei kikta guay ta alay ganc puni.
29Ravchaptatmei guay rui mi kandic hei laa puni,
mi khou hei tingsaeng lungc bam puni.
30Ravchaptatmei mwang khou rui ningting lat sa pat re,
kaniw baley khou rui nchumhmei lat sa pat re.
31Kamei kaRacguangc latdanv kalung khou lou e,
mi khou tei rui tat pat mak ge.
32Meicsimei rui meicgaymei ta rik bam e,
swluai khang phu bam e.
33Tiki Ringhpouc rui kata
zauczihmei baanc khou mpatlou lak ge,
kata latzan sw pwkhou ti-nkhuai lak ge.
34Nang Ringhpouc khou lwm o,
kalatdanv guay piu o;
mi kandic hei nang khang tiilouna kamei rui nang ta champouhlou puni,
meicsimei nunc ta swmaan kanmei ta nang how puni.
35Raina dihsinmei meicsimeipu gaanv khat ta ai howlou e.
Kamei Lebanon tuang sidar bang kumc meic kathuic ruc khou kauh thau khwan e.
36Tiki katangv thangc ai tat ruan pat dat pwki,
kamei bam mak khe;
ai kata phu the, ariw dat mak khe.
37Meicgaymei ta matat ro,
ravchaptatmei ta kathaina zauc o;
chuzaenghpui mei tei kakik kata nai kan tw e.
38Tiki paapcmei nunc ta swmutlou e,
kaniw kikta maek ge.
39 Ringhpouc rui ravchaptatmei nunc ta kanlou e,
ryanramei ganv khou kaniw ta gaeklou e.
40Kamei rui kaniw ta nkhavlou e,
khatni guduaklou e;
kaniw ta meicsimei nunc baanc khou rui kanlou e,
kalam thu kaniw kakhou duplou e.
Currently Selected:
KALUMLU 37: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
