KALUMLU 35
35
Nkhavlou khang Huayneymei
1He Ringhpouc, ata athwngmei nunc ta athwnglou o,
ata adowmei nunc ta adowlou o!
2Nang tuang nggic sin thauna ata guang nkhavlou o.
3Ata suic bammei nunc ruc khou
nang tuang buy-baeng sinthaulou o.
Nang rui ata kanlou puni twmei akhou salou o.
4Ata swluai khang rik bammei nunc ti hei,
zaw tisilou o, tizaklou o!
Ata sw kasic khang sw bammei nunc hei meiczingc gancna hanc dat kan diu!
5 Ringhpouc baanchara rui kaniw ta nthau bammei hu khou,
kaniw tei mpwan rui
phungc tat bammei napgung kumc kan diu!
6 Ringhpouc baanchara rui nthau bammei hu khou,
kaniw chaeng zingc kan diu,
kaniw chaeng ani kan diu.
7Kalam maekna kaniw rui akhang phah zawlou e,
khatni ata nym khang khunh nthukmei chaulou e.
8Tiki thay mak liangna kaniw ta sw kasic karouclou kan diu!
Kaniw tei kaniw rana kaniw phac manc kan diu;
kaniw rana kaniw khunc khou keylou kan diu!
9Khou kiu Ringhpouc paan rui ai zaenggay puni;
kamei rui kanloumei zaeng rui ai neihla puni.
10“Nang kumhmei maek ge.
Nang rui suanmei ta tanhmei khou rui,
lungcsimei ta rairiumei khou rui gaeklou the,”
twna alung kapwm rui ai Ringhpouc khou sa puni:
11Meicgay makmei nunc rui akhou khuay nkhamlou e,
ai thay zat makmei khuay akhou nkhamlou e.
12Kaniw rui akhang gaymei phaan
simei taanclou e; aswang maek khe.
13Tiki kaniw suc nuh bam pwkhou,
ai ryanra zaengsimei pwan piu e,
ai taektw thiangcna,
angaengv khou apy sowlouna huayney khwan e.
14Ai rui apammei khang
hamh e thei chana khang huayney khou tei
pui ta zaengsina huay kumc,
zaengsina nkhumna tat bam khwan e.
15Tiki ai ryanra pwkhou kaniw neihlana guang kariu e,
ata sinnui khang guang kaduai e;
ai thay how makmei nunc rui ata bai the,
bai nthaekc makna bai bam e.
16Phay baanh chuanchaymei ta sinnui kumc,
ata karaengna sinnui the.
17He Ringhpouc, asaanh nang zauc bam nina cho?
Kaniw rui adow guangmei khou rui ata gulou o;
mi kamangliangpui nunc khou rui,
aringcpaan kanlou o!
18Kum pwkhou nang mei nunc kariumei bamv khou,
ai nang ta thuanc ni,
kaniw mav khou ai nang ta thuanc ni.
19Kalam maekna ata zauczih bammei nunc ta tei,
aruc khou tizaenggaylou rio.
Kalam maekna ata karaengmei nunc ta tei,
alung ryanramei ta zaenggayna tinuiclou rio.#Kal 69.4; Jhn 15.25
20Kaniw chamv chianggayna sa mak ge;
chuzaenghmei laa niimei nunc ruc khou saraamhmei khuay nkham ndam guang e.
21“Nang taanc bammei tei aniw mik kahak rui how the,”
twna kaniw ata nkham e.
22He Ringhpouc, mi hei nang how the;
reih reilou rio,
akhou rui duc lou rio, he Ringhpouc!
23He Ringhpouc, thaulou o,
ata dinggaeklou o;
aRacguangc, thaulou o,
akhang saguclou o.
24He Ringhpouc, nang thu nchumhmei e,
ata latzan sw nthanlou o,
ata zauczihmei nunc ta aruc khou tineihlalou rio.
25“Gay the! Aniw kahawmei guang tangc the,
aniw rui kata sw kasiclou kan the,” twna tisalou rio.
26Ai ryanramei ta zaenggaymei nunc ta tei zaw tisilou o,
tikaguakc kasuakclou o; aruc khou kaniw gaengh
sw bammei nunc ta tei tizak kasiclou o,
27Ata duak pat kan tu laa niimei nunc tei rui,
“Ringhpouc hei adih daic cho!
Kabangc zawkauhmei khou kamei neihla e,”
twna neihlana kauc bam kan diu.
28Kum pwkhou nang hei nchumhmeipu e twmei
ai kauc ndauh ni, ai nang ta thuanc zingc zingc bam ni.
Currently Selected:
KALUMLU 35: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
