KALUMLU 34
34
Ravguangc Ramgai ta Thuanhmei
1Ai Ringhpouc ta thuancku tanh tan bam ni;
kata thuanc tanh tan bam ni.
2Kataanv guay khang tei ai kata thuanc bam ni;
ryanra ryanriumei nunc chuna neihla kan diu!
3 Ringhpouc hym ta aniu kauc ndauh kho;
aniu kazanc thuanc kho!
4Ai Ringhpouc khou huayney the,
kamei akhou dawlou the.
Kamei rui ata ai pingmei khou rui tiduaklou the.
5Ryanra ryanriumei nunc kata zaucna neihla e;
kaniw zak dat lak khe.
6Ngangv bamv maekmei nunc rui kakhou kauc e,
kumna kamei rui dawlou e;
kaniw ryanra kaguay khou rui kanlou e.
7 Ringhpouc lat piumei nunc ta kabaanchara rui gaeklou e,
kaniw ta kabiu kabaeng nimei khou rui kanlou e.
8 Ringhpouc hei adih gay cho twmei nang mbap zauc o.
Kakhou duploumei nunc tei sangaymei nunc e.#1 Pi 2.3
9 Ringhpouc lat piu o, he kamei guay;
kalat piumei guay khang gaat tuang nai lak ge.
10Kamangliangpui nganvna
tu khang maekna ndaapcna lungc de;
tiki Ringhpouc lat piumei guay mu,
gaat tuang nai dat mak khe.
11Guang nking o, anac nuncle,
Ringhpouc ta pingna lungh khang
ai nangniw khou nchamlou puni.
12Nang panty amanvna lungc nii bu cho?
Nang panty lungsingmei khatni neihlamei kahaw bu cho?
13Kum e thei latsic sa mak khang
khatni saraamh mak khang nang baley sinriap bo.
14Simei ta gancna gaymei taanc o;
nchu-nzaenghna lungh khang karamc o.
15 Ringhpouc rui ravchaptatmei ta kadanna zauclou bam e,
kaniw rui kapna huaymei chulou e.
16Tiki simei taanhmei nunc ta kamei nuh mak ge,
kumna kaniw theic pwkhou kaniw ta amuc nuangc e.#1 Pi 3.10-12
17Ravchaptatmei nunc rui Ringhpouc ta kaw pwkhou
kamei rui chulou e,
kaniw ryanra guay khou rui kaniw ta kan patlou e.
18Lungh bakna bammei nunc khou Ringhpouc ana bam e;
kaniw rigwn maan ngamna bammei nunc ta kanlou e.
19Ravchaptatmeipu ni ryanramei mpeyna ariw nuh de,
tiki Ringhpouc rui kata ryanramei khou rui kanlou e.
20 Ringhpouc rui kata gaek tiph tipna gaeklou e,
karou khat na sini swbau mak ge.
21Meicsimei ta kaniw tuang simei rui swluai puni;
ravchaptatmei ta karaengmei nunc ta dandi tii puni.
22 Ringhpouc rui kamei nunc ta kanlou puni;
kakhou duploumei guay ta gulou puni.
Currently Selected:
KALUMLU 34: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
