KALUMLU 33
33
Hymthuanhpui Lu
1Ravchaptatmei nangniw,
Ringhpouc taanv ta tei neihlana kauc o!
Kalat piumei nangniw kata thuanc o!
2Nrah downa Ringhpouc ta thuanc o,
kariang ruhmei nrac downa suan o.
3Kakhou lu thanh suan o,
nrah zay chuyna neihlana kaucna suan o.
4 Ringhpouc lat guay hei nchumh e,
khatni kataanv guay hei suai mak ge.
5Nchumhmei lev nzihmei ta Ringhpouc kahaw e;
taek makmei karamzian hei kandih padik ge.
6 Ringhpouc latdanv rui tingpuk damclou e,
kamwang khou rui patmei latkaeng rui bw,
neih, gaanchuangcna damclou e.
7Kamei rui duipui dui ta
kabamv akhat khou khuam kaduailou e;
duipui guay ta kasyng thangc mbangh binlou e.
8 Ringhpouc ta ping o,
he mbaanv kapwm!
Kata champouh o,
he kandih nam ruc khou
lungc bammei maansei katana!
9Kamei rui sa pat pwkhou kandih damc the;
kalatdanv khou ramhguayna pat the.
10 Ringhpouc rui zaatc nunc tuang raeng guay tiguang tangclou mak ge;
kaniw raeng guay kaniw ta titaanc key mak ge.
11Tiki katuang raeng thu tingsaeng nai e,
kalung khou ningloumei tei kalaih mak ge.
12 Ringhpouc ta kaRacguangc
swmei zaat tei sangaymei zaat re;
kakhang kadahloumei mei nunc tei sangaymei nunc e!
13 Ringhpouc tingkauh thangc rui
zauc keyna maansei guayna ta how e.
14 Ringhpouc rui kaguangh bamvpaeng khou rui,
kandih nam ruc khou
naimei maansei katana ruc khou zauc key e.
15Kamei hei lungning tiiloumeipu e,
kumna maansei rui taanhmei guay thay e.
16Guangh tei katuang ricmei geihmei paan rui rih ngam tu hamh e;
rihmei tei kapumtan rui rih ngam tu hamh e.
17Takuanh paan rui rih ngam khang hamh e;
tanhmei takuanc pumtan rui kanlou ngam mak ge.
18Tiki Ringhpouc rui kalat piumei guay ta kadanna zauclou bam e;
kamei rui taek makna nzianmei ramzian khou lwm bammei nunc ta kadanlou bam e.
19Kamei rui kaniw ta theihmei khou rui kanlou e;
nkow-ndaapcmei ganv khou
kamei rui kaniw ta tiringclou e.
20Aniu Ringhpouc ta lwmgayna nkhwan e;
kamei aniu ta gaekloumeipu khatni aniu khang nggih e.
21Kapaan rui aniu neihla e;
kazanc nthanmei khou aniu lwm e.
22He Ringhpouc, aniw nang ta lwmmei kumcna
nang aniw ta taek makna nzianlou o.
Currently Selected:
KALUMLU 33: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
