KALUMLU 32
32
Paapc Kalauhmei khatni Kuakloumei
1Kapaap kuakloupui mei tei,
kakhuay kuakloupui mei tei zaenggaymei e.
2Kapaap nkamh makpui mei,
khatni Ringhpouc rui kakhuay
chaklou makpui mei tei zaenggaymei e.#Rom 4.7-8
3Ai apaap kalauh makna bampui kaanc khou,
ai kap zingc zingc bammei rui suan key khwan e.
4He Ringhpouc,
zingbangc kalaanv nang rui ata dandi tii khwan the,
lailwm neic thiu rui kandih phauc kangh kumc,
apumtan guay tat ngam kan the.
5Khoutei apaap kalauh khang alung dinglou the,
apaap guay nang khou kalauh pat the.
Ai rui taanc maanvloumei guay nkamhlou mak khe,
kumna nang rui apaap kaguayna kuaklou the.
6Kumna nang lat piu chuymei guay rui,
kage naimei ganv khou nang khou huayney kan diu;
ryanramei duidai luangc guang pwkhou,
hei tei kaniw khou guang tangc lak ge.
7Nang hei ai duppui bamv e;
nang rui ata ryanramei khou rui kanlou puni.
Nang rui ata kanloumei lu ai suan ranvna suan e,
kalam thu nang rui ata gaeklou the.
8 Ringhpouc rui sa e,
“Nang tat nimei chaeng ai rui dinclou puni;
ai rui nang ta nchamlou puni khatni dinclou puni.
9Lat piu khang kamwang khou
riang lou mak nuh makmei takuanh kumc,
kuanniam kumc mpang riu.”
10Meicsimei nunc thu ryanra puni de,
tiki Ringhpouc khou lwmloumei nunc ta thu
katuang kachac makmei ramzian rui gaeklou puni.
11Ravchaptatmei nangniw,
Ringhpouc rui taancloumei khang tei,
zaenggay o, neihla o.
Kalat piumei nangniw, neihlana kauc o!
Currently Selected:
KALUMLU 32: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
