KALUMLU 31
31
Ravguangc khou Lwmloumei Ravsuai
1He Ringhpouc,
ai nang khou duplou e,
ata zaw tisilou rio.
Nang hei nchumhmei Racguangc e;
ata kanlou o!
2Ai huayneymei chulou o!
Ntaw ata kanlou o!
Ata nang khou tiduplouna kanlou o;
nang rui raengh swna ata kanlou o.
3Nang hei akhang taudaic e,
nang hei araengc e;
nang rui saloumei kumcna
ata zaylou gaengclou o.
4Ata rik bammei khou rui kanduaklou o,
ai nang khou duplou e.
5Ai apumc kahak nang rui kadanloumei khou tiilou e.
He Ringhpouc, nang rui ata kanlou puni;
nang hei suai makmei Racguangc e.#Luk 23.46
6Ravmaengc kalummei nunc ta nang karaeng e;
ai thu nang khou lwmlou e.
7Ai neihla zaenggay bam ni,
kalam thu nang ata nzian bam e,
khatni aryanra guay ta thaylou e.
8Nang rui ata zauczihmei nunc baanc khou tiilou mak ge,
ai tat nimei bamv khou
kadan makna tat khang nang rui swlou the.
9He Ringhpouc, ata zauc nzianlou o,
ai ryanramei khou keylou bam the;
kapmei rui amik lak the,
lungh ryanramei rui apumc suan the.
10Lungh ryanramei rui ai lak the,
kapmei rui apanty tidui the.
Ryanramei rui apumc suan the;
arou nganvna zunh key the.
11Ata zauczihmei guay rui,
nkunna atuang kainingmei guay rui ata malana sw the;
apammei guay ata how ping the;
kaniw ata chaengdai khou how pwkhou,
kaniw akhou rui pak the.
12Theic kanmei ta kumcna,
meic kathuic ata amuc the;
ai hei gancloumei puat kumc the.
13Zauczihmei nunc tanglum bammei ai chu the;
kaniw ata swluai khang raengc bam e.
14Tiki nang khou ai lwm e,
He Ringhpouc, nang hei aRacguangc e.
15Nang rui makavloumei lungc khou ai bam e;
ata zauczihmei nunc baanc khou rui kanlou o,
ata rai kasic bammei nunc khou rui kanlou o.
16Nang bangc ata nzianna zauc keylou o,
nang rui ata taek makna
nzian bammei paan rui ata kanlou o.
17He Ringhpouc, ai nang ta kaw e,
ata tizaklou rio.
Meicsimei nunc zak kan diu;
kaniw taruaih ram thangc
rimh rim bam kan diu.
18Mi saraamhmei nunc ta tei,
ravchaptatmei nunc ta
karaengna sa bammei nunc,
gaengh swmei khatni
ramhriw swmei nunc ta tei tirimh rimlou o.
19Nang ta champouhmei nunc khang
chamdaanvlou bammei,
nang ramgai adih charyn cho!
Nang khou duploumei nunc khou,
nang rui meic nunc mav khou hei tei lyanlou e.
20Meic nunc rui swluai khang rik bammei khou rui
nang pamv khou nkamhlou e,
kaniw ta zauczihmei nunc rui tizaklou mak khang
nang kai khou rylou e.
21 Ringhpouc ta thuanc o!
Ata ding haengvna adow pwkhou,
charynna kamei rui karam zian akhou lyanlou the!
22Kamei rui ata kamav khou rui
alay pat the twna ningna ping khwan e;
tiki ai kapna huaymei,
nkhavlou khang kauhmei,
kamei rui chulou the.
23Kamei rui lwmnuhmeithiu,
Ringhpouc ta nzian o.
Lwmlounuhpui mei ta
Ringhpouc rui gaeklou e,
tiki gaengh swmei nunc ta
kaniw khang biuhmei dandi tii e.
24 Ringhpouc khou lwmmeithiu,
tanc o, bauc o.
Currently Selected:
KALUMLU 31: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
