KALUMLU 30
30
Thuanckumei Ravsuai
1He Ringhpouc, ai nang ta thuanc e.
Kalam thu nang rui ata kanlou the,
ata zauczihmei nunc ta
aruc khou tizaenggaylou mak ge.
2He Ringhpouc, aRacguangc,
nkhavlou khang ai nang khou
kapna huaymei dawlouna
nang rui ata tigaylou the.
3Nang rui ata tarou khou rui kanpatlou the.
He Ringhpouc, nang rui ata taruaih khou rui
zay patlou datna apanty tiilou dat the.
4He kalat piumei nunc,
Ringhpouc ta thuancna suan o!
Nthanmei kazanc thuanc o.
5Kalungpuam matat khat na de,
karamgai thu tingsaeng e.
Zingbangc mikdui luangc bam nuh e,
tiki lauthwan neihla dat re.
6“Ata ngam dat ni tu hamh the”
twna ai giuga makna sa ngam the.
7He Ringhpouc, nang zauzian paan rui nang rui ata tanhmei chyngbut kumc kasiamh thaulou the.
Tiki nang zaw nkamh kan pwkhou ai ping khwan e.
8He Ringhpouc, ai nang ta kaw khwan e,
nkhavlou khang mi kumcna ney khwan e:
9“Ai theihmei rui nang khang tabui gaeng nina cho?
Ai tarou khou keymei rui tabui gaeng nina cho?
Theihmei nunc rui nang ta thuanc ngam puni dina cho?
Suai makmei nang ramgai tei
kaniw sa ndauh ngam puni dina cho?
10Akhwan chulou o, he Ringhpouc,
ata zauc nzianlou o!
Ata nkhavlou o, he Ringhpouc!”
11Alung ryanramei khou rui,
nang rui ata neihlana ti-alaamhlou dat the,
nang rui alung ryanra guay laa ganclou the,
neihlamei tipadiklou the.
12Mi zaeng rui ai reih rei bam lak ge;
ai nang ta thuancna suan bam ni.
He Ringhpouc, aRacguangc,
ai nang ta tingsaeng thuanc bam ni.
Currently Selected:
KALUMLU 30: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
