KALUMLU 27
27
Hymthuanhmei Ravsuai
1 Ringhpouc hei akhang gaanhmei e,
khatni ata kanloumeipu e;
ai meic gaanv khat na ta sini ping lak ge.
Ringhpouc rui ata si suai nuhmei bamv guay khou rui kanlou e;
ai ping zat lak ge.
2Meicgay makmei nunc rui ata adow pwkhou khatni swluai khang rik pwkhou,
kaniw phaysuyna bow e.
3Rihmei kapwm rui ata ding haengv bam sini ping lak ge;
zauczihmei nunc rui ata adow sini,
Ravguangc khou lwm bam ni.
4Ai Ringhpouc khou ramhkhat ney e;
ramhkhat na ai kahaw e:
ai ringh saanv Ringhpouc kai khou bam khang,
mi khou tei karamgai ta makumh bam khang,
khatni kamei rui zaylou khang ney bam khang e.
5Ryanramei ganv guay khou
kamei rui ata tiduplou puni;
kamei rui ata kakai khou
giuga makna tibamlou puni;
taudaic kauhmei ruc khou
ata giuga makna tibamlou puni.
6Kumna adaeng bam haengv
bammei ata zauczihmei nunc ta ai ngam ni.
neihlamei khwan kaucna ai kaRavkai khou
thuanckumei puatkat kat ni. Ai suan ni,
ai Ringhpouc ta thuanc ni.
7He Ringhpouc, ai nang ta
kaw pwkhou akhwan chulou o,
ata zauc nzianlou o
khatni akhou dawlou o!
8“Guangna ata kalum o”
twna nang rui sa pwkhou,
“Ai guang ni, Ringhpouc.”
twna ai daw khwan e.
9Nang akhou rui nkamhlou rio,
nang bangc ata alay ganclou rio!
Nang rui ata nkhavlou the;
ata mpatlou rio.
He Ravguangc, ata kanloumeipu,
ata ganclou rio.
10Apui apu rui ata ganclou nuh e,
tiki Ringhpouc rui ata kadanlou puni.
11He Ringhpouc, nang rui
ata titaanc niimei tei akhou dinclou o,
giuga makmei chaeng khou ata zaylou o,
ata zauczihmei geic e.
12Ata zauczihmei nunc baanc khou ganclou rio,
saraamcna khatni kadungna
adow bammei nunc baanc khou ganclou rio.
13Mi panty khou hei Ringhpouc ramgai how khang ai ringc bam puni de twmei thay e.
14 Ringhpouc khou lwmlou o.
Lwm o, lungh tangkhyn riu.
Ringhpouc khou lwm o.
Currently Selected:
KALUMLU 27: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
