KALUMLU 25
25
Chaengzaylou khang khatni Gaeklou khang Huayneymei
1He Ringhpouc, nang khou ai huayney e.
2ARacguangc, nang khou ai lwm e.
Ata zaw tisilou rio;
ata zauczihmei nunc ta
aruc khou tineihlalou rio.
3Nang khou lwmmei gaanv khat na ta sini zaw tisilou rio;
kalam maekna latliam bammei nunc ta zaw tisilou o.
4He Ringhpouc, akhou nang chaeng dinclou o;
nangchaeng akhou dinclou o.
5Nang tuang nchumhmei chaeng akhou dinclou o,
mi khou tei ata zaylou o,
nang hei aRacguangc,
ata kanloumeipu e.
Ai nang ta lwm tanh tan bam e.
6He Ringhpouc, nang rui
aniw ta reynungc rui zauc nzianlou guangmei
khatni aniw ta taek makna nzian guangmei tei amuclou rio.
7Ai chabwan sw bammei douc khuay guay kuaklou o.
Nang rui ata taek makna nzian bammei paan rui,
khatni nang ramgai paan rui,
ata ningtowlou o, he Ringhpouc.
8 Ringhpouc hei nchumhmei e khatni gay e,
mi zaeng rui paapcmei nunc ta
kaniw tat nimei chaeng khou zaylou e.
9Kamei rui lunghniamhmei nunc ta nchumhmei chaeng khou zaylou e,
khatni kaniw khou nchumhmei dinclou e.
10Katuang latdyng ngaekmei
khatni kalatdanv guay piumei guay ta nzianna khatni suai makna kamei rui zaylou e.
11He Ringhpouc, nang latdyng thei layna
apaap guay kuaklou o, apaap geic the.
12 Ringhpouc lat piumei nunc ta
kaniw tat nimei chaeng
kamei rui dinclou puni.
13Kaniw amanv tanh tanna lungc bam puni,
kaniw mi kandic hei laa puni.
14 Ringhpouc hei kalat piumei guay pam e,
kamei rui kalatdyng kaniw khou sw ntiplou dat re.
15Nkhavlou khang ai Ringhpouc ta kaganv thuic zauc e,
kamei rui ata theic suc nuhmei bamv khou rui guduaklou e.
16He Ringhpouc, akhou karih guanglou o,
ata zauc nzianlou o,
ai apam arai maek khe
khatni ai ryanra the.
17Ata lungh ryanramei khou rui tiduaklou o,
atuang ryanra ryanriumei kaguay khou rui kanlou o.
18Aryanra guay kakhanhlou o,
apaap guay kuaklou o.
19Zauclou o, ata zauczihmei heizumei ti hei!
Zauclou o, kaniw ata adih karaeng cho?
20Ata gaeklou o, kanlou o;
ata zaw tisilou rio,
ai nang khou duplou e.
21Atuang gaymei khatni lungning nthanmei rui ata gaeklou e, ata gaeklou e;
kalam thu ai nang khou lwm e.
22He Ravguangc, nang mei Isaraelmei ta kaniw tuang ryanramei kaguay khou rui kanpatlou o.
Currently Selected:
KALUMLU 25: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
