KALUMLU 22
22
Ryanrana Huaymei khatni Thuanhpui Lu
1ARacguangc, aRacguangc,
tabui swna nang ata mpatlou tu cho?
Nkhavlou khang kalanghna ai huay bammei khou rui
tabui swna nang hei saanv duc bam tu cho?#Met 27.46; Mrk 15.34
2Zingbangc kalaanv huay bam e,
tiki nang dawlou mak ge;
ata zaeng ti-nthaekclou mak ge.
3Tiki nang thu nthanmeipu swna,
Isarael rui thuanhmeipu swna,
guangh bamvpaeng khou dungc bam e.
4Aniw pupouc nunc nang ta lwm e,
kaniw nang ta lwm e,
kumna nang rui kaniw ta kanpatlou e.
5Kaniw nang ta kaw khwan e,
kumna kanduaklou khwan e;
kaniw nang ta lwm e,
kumna tizaklou mak ge.
6Tiki ai thu maansei hamh the,
kuchiat kumhmei di the,
meic kathuic rui karaeng the.
7Ata howmei guay ata sinnui the;
kaniw chy malecna kaniw py kazinh the.#Met 27.39; Mrk 15.29; Luk 23.35
8Kaniw rui sa e,
“Nang Ringhpouc khou ngangvlou the.
Tabui swna kamei nang ta kanlou mak bam tu cho?
Ringhpouc rui nang ta nzian e thei,
tabui swna kamei nang ta nkhavlou mak tu cho?”#Met 27.43
9Ata ramh sw ramh daengv makna
puancloumei hei nang rui e,
khatni apui pamv khou puanc nouc bam khou rui,
nang rui kan duaklou the.
10Ata puanclou nungc tei rui,
ai nang khou ngangvlou the,
kumna nang hei aRacguangc sw tanh tan guang the.
11Akhou rui duc tatlou rio!
Ryanramei adaeng khou nai e,
nkhavlou nimei maek ge.
12Guaichic pang rui,
Bashan tuang tanhmei guaichic pang rui,
ata bamv haengv the.
13Kataek phuna rah bammei kamangliangpui kumc,
kaniw mwang hah pat the.
14Apumtan guay mbut khou dui bunlou kumc maek khe.
Aryan aruc kabamv khou bam mak kumc the;
alung khuailiu nungh kumc nungc kan the.
15Aruak mbut phui kumc phui the,
abaley kalung dat ngam mak khe.
Theihmei ta kumc,
nang rui ata kandih khou ganclou the.
16Meicgay makmei kang rui adaeng bam haengv the;
si pang kumc kaniw ata kwam guang the.
Kaniw rui aphay abaanc hian phou the.
17Arou aruc how ngam the.
Ata zauczihmei nunc ata howna neihla the.
18Kaniw san zaucna apheybaan nzanh the.#Met 27.35; Mrk 15.24; Luk 23.34; Jhn 19.24
19He Ringhpouc, akhou rui duc tatlou rio!
Katumcna ata guang nkhavlou o!
20Ata baengsaeng khou rui kanlou o;
apanty hei mi si nunc khou rui kanlou o.
21Ata mi kamangliangpui pang khou rui kanlou o,
mi nwmbangc guaichic nunc hu khou hei,
aswang maek khe.
22Nang rui taancloumei tei
ai amei nunc khou rac ni;
kaniw guang kariupui bamv khou
mi kumcna thuanc ni:
23“Kata thuanc o,
Ringhpouc bangc nunc!
Kata champouh o,
Jakob kikta nunc!
Kata kalum o,
Isaraelmei nunc!
24Kamei lungcsimei ta ntaamvlou mak ge,
kaniw ryanra thaylou e.
kamei kaniw khou rui karih ntheilou mak ge;
kaniw rui nkhavlou khang kauc pwkhou dawlou e.”
25Nang rui taancloumei khang tei,
charuangcdai bamv khou ai nang ta thuanc ni;
ai rui nrianhlou kanmei tei
nang ta kalum bammei nunc hu khou tiilou ni.
26Hei tei lungcsimei nunc kaniw bung tu nggu kan diu.
Ringhpouc ta kalum khang
guangmei guay kata thuanc puni.
Kaniw tingsaengzaeng daic thau bam kan diu!
27Zaatc guayna Ringhpouc ta ningtow bam puni,
kandih kabamv kathuic khou rui kakhou guang puni;
zaatc guayna kata kalum puni.
28 Ringhpouc hei guangh e,
kamei rui zaatc guay ta sin bam e.
29Daihlwn swna lungc bammei nunc tei,
kakhou nkhum key puni;
ringc suang lakmei maansei guay hei,
kahu khou nkhum key puni.
30Guang nimei meikin guay rui kasiamruai sw puni;
meic nunc rui guang nimei kin khou
Ringhpouc lam raclou puni.
31“Ringhpouc rui kamei nunc ta kanlou the” twmei,
ntaw puanc patlou makmei mei nunc khou raclou puni.
Currently Selected:
KALUMLU 22: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
