KALUMLU 18
18
David tuang Rihngam Lu
(2 Sa 22.1-51)
1Nang ta nzian e, he Ringhpouc,
nang hei apumtan e!
2 Ringhpouc hei akhang taudaic e;
kamei hei akhang tanhmei rihgaekkai e.
ARacguangc hei akhang taudaic e,
kakhou duplouna ai duak ge.
Kamei rui ata nggih swna gaeklou e;
kamei rui ata ding gaeklou e;
kumna ai giuga makna bam e.
3Ai Ringhpouc ta kaw pwkhou,
kamei rui ata zauczihmei guay khou rui kanlou e.
Ringhpouc ta thuanc o!
4Swluai swtiat nuhmei rui ata bam haengv khwan the;
swmaan nimei dui muat aruc khou thum liam khwan the.
5Theic nuhmei rui adaeng bam haengv khwan the,
khatni tarou rui akhang phah zawlou khwan the.
6Ai ryanramei khou rui
Ringhpouc ta kaw khwan e;
nkhavlou khang ai Ravguangc ta kaw khwan e.
Katuang ravkai khou rui kamei akhwan chulou the;
nkhavlou khang ai rui kapna huaymei kamei nkinglou the.
7Khoutei kandih kadunh the khatni kanukc the;
chyngbut guay bamv kanukc the khatni kadunh the.
Kalam thu Ravguangc kalungpuamc the.
8Kanukwang khou rui maikhou,
kamwang khou rui raw mutmei mai bwang,
khatni maithyn haenghmei mphiu pat the.
9Kamei tingpuk siat ra patna
zinghmei muangc bangv khou dingna key the.
10Kamei kerubim khou tuangcna samc the;
kamei mpwan swkaeng khou rui tat kalw the.
11Kamei rui kata zinghmei rui gumliamlou the,
dui phungc padikmei muangc bangv zingh zingmei rui kata gumliamlou the.
12Kahu khou rui palik patmei riw rui muangh bangv zinghmei ta siatra patna nrihthai khatni ganh key the.
13Khoutei Ringhpouc tingpuk thangc rui,
tingthinc ganh key the,
kumna Kauh Liangsingmeipu khwan chu the.
14Kamei katuang pailu kaap pat the,
kumna kata zauczihmei nunc ta alay phaklou the;
tingpalikmei riw rui kamei rui kaniw ta hac ganc the.
15He Ringhpouc,
nang rui nang ta zauczihmei nunc ta mphut pwkhou,
lunghpuamcna kaniw ta nin pwkhou,
duipui bamv ti-nsalou the
kandih bamv laanc patlou the.
16 Ringhpouc rui kauh thangc rui haamv keyna ata chakit the,
kamei rui ata nthukmei dui khou rui zay patlou the.
17Ata zauczihmei tanhmei nunc khou rui,
akhang suangc tanhmei ata karaengmei nunc khou rui,
kamei rui ata guduaklou the.
18Ai ryanrapui ganv khou,
kaniw ata adow khwan e,
tiki Ringhpouc rui ata gaeklou the.
19Kamei rui ata theic suc nuhmei khou rui kanlou the,
kalam thu kamei ata kwnlou the.
20 Ringhpouc rui akhang ai nchumhna lunghmei swan tiilou e;
kamei rui ata suaihiamlou e,
kalam thu akhuay maek ge.
21Ai Ravguangc latdanv piu the;
ai aRacguangc khou rui karih nthei tat mak ge.
22Kalatdanv guay ngaek ge;
ai kalatdanv guay piu e.
23Ai hei khuay maekmei e,
ai nkhuaimei taanh makmei e twmei kamei thay e.
24Kumna kamei rui akhang
ai nchumhna lunghmei swan tiilou e,
ai hei khuay maekmei e twmei kamei thay e.
25He Ringhpouc, nang hei
lat piu chuymei nunc khou
kalat suai zat makmeipu e,
nthanmei nunc khang
gay nthuih thiakmeipu e.
26Nthanmei nunc khang nang hei nthanmei e,
meicsimei nunc ta zauczihmeipu e.
27Niamhmei nunc ta kanlou e;
tiki daihriw swmei nunc ta
nang rui ti-ana keylou e.
28He Ringhpouc, nang rui akhang gaanhmei tiilou e;
nang rui akhou zinghmei laa ganclou e.
29Ata zauczihmei nunc ta adow khang,
kaniw tuang rihgaekkai ta ngam khang,
nang rui akhang pumtan tiilou e.
30Ravguangc thu kataanv guay nthuih e,
kalat guay suai zat mak ge,
kakhou duploumei guay ta nggih kumc gaeklou e.
31 Ringhpouc kamei na hei Ravguangc e;
Ravguangc na hei aniu ta gaekloumeipu e.
32Kamei hei akhang pumtan tiiloumeipu,
achaeng khou kabiu kabaeng nimei guay
laa gancloumei Racguangc e.
33Kamei rui atan ta asanh tan kumc ti-magaplou e,
kamei rui ata giuga makna chyngbut ruc khou tibamlou e.#Ibr 3.19
34Kamei rui ata rih adow ngam khang nchamlou e,
ntanh saucpai sin ngam khang tiilou e.
35He Ringhpouc, nang rui ata gaeklou the khatni kanlou the;
nang rui makavloumei paan rui ata tidaiclou the,
khatni nang pumtan rui ata kanduaklou the.
36Ata nym tow mak khang
nang rui ata kanduaklou the
kumna ai bow key zat mak ge.
37Ai rui ata zauczihmei nunc ta nthauna nym the;
kaniw ta swmutlou mak saanv ai nthaekc mak ge.
38Ai rui kaniw ta siauc key the,
kaniw thau dat ngam mak khe;
kaniw ngam makna ahu khou zip bam the.
39Nang rui akhang rih khang pumtan tiilou the,
kumna ata zauczihmei nunc ta tingamlou the.
40Nang rui ata zauczihmei nunc ta akhou rui tipaklou the;
ata karaengmei nunc ta ai rui swmutlou the.
41Kaniw ta nkhavlou khang kaniw kauc khwan e,
tiki gaanv khat na rui sini kaniw ta kanlou mak khe;
kaniw Ringhpouc ta kaw e,
tiki kamei dawlou mak ge.
42Ai rui kaniw ta mpwan rui hunc katungh bammei mbut baih the.
Chaengluang khou mbut ta kumc
ai rui kaniw ta niibin the.
43Meicngam meicliammei nunc khou rui nang rui ata kanlou the,
kumna zaatc nunc ruc khou ata kaipouc tiswlou the,
khatni meic thaymakmei zaat nunc tei amei nunc sw the;
44kandih baih thangc mei nunc ahu khou nkhum key the,
kaniw alat chu pwkhou hei tei piu the.
45Kaniw bau maek khe,
kaniw rihgaekkai khou rui kadunhna pat the.
46 Ringhpouc ringc bam e!
Ata ding gaekloumeipu ta thuanc o!
Ata kanloumei Racguangc hym kauc ndauh o!
47Kamei rui ata rih tingamlou the;
kamei rui zaatc nunc ta abangc khou nym keylou the,
48ata howmumei nunc khou rui kanlou the.
He Ringhpouc, nang rui ata,
zauczihmei nunc ruc khou rih tingamlou the,
khatni swluai swtiat nimei
nunc baanc khou rui ata kanlou the.
49Mi zaeng rui ai nang ta
zaatc nunc ding khou thuanc e;
ai nang ta thuancna suan e.#Rom 15.9
50Ravguangc kamei rui
suangloumei guangc ta
rihdai mpeyna tingamlou the;
kamei rui thauh teyloumei David khatni kakikta ta,
kamei rui tingsaeng nzianlou the.
Currently Selected:
KALUMLU 18: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
