KALUMLU 17
17
Kakhuay maekmeipu rui Huayneymei
1He Ringhpouc, nchumhmei latzan swlou khang
ai rui huay bammei hei chulou o;
nkhavlou khang ai rui kauc bammei hei nkinglou o!
Kalingmei lat tei sa bammei hei chulou o.
2Nang rui akhang latzan swlou puni,
kalam thu nchumhmei nang thay e.
3Nang alung ta kathai the,
nang ata zingbangc guang zauc the,
tiki akhou simei phu pat mak ge.
Kalam thu amwang rui paapc sw mak khang alung ding the.
4Maansei nunc taanv lam khou—
nang latdanv piupui paan rui
abay adapmei nunc chaeng khou ai tat mak ge.
5Ai nang chaeng khou tat tanh tan e,
mi khou tei rui ai tat mbiangh zat mak ge.
6He Ravguangc, ai nang khou huay e,
kalam thu ai neymei nang rui dawlou puni;
nang nu beic guanglouna alat guay hei nkinglou o.
7Nang tuang charynmei ramzian
lyanlouna aniw ta kanlou o;
nang daeng khou bamna
aniw ta zauczihmei nunc khou rui duak the.
8Nang miknac ta kumcna ata gaeklou o;
ata nang swkaeng lym khou nkamhlou o.
9Meicsimei nunc rui adow guang nimei khou rui,
swluai khang ata bam haengv bammei nunc khou rui,
nang swkaeng bangc khou tiduplou o.
10Kaniw khou zauzian maek ge
khatni daic tuh tuna sa e.
11Ntaw thu kaniw rui ata bam haengv the,
ata sw khang mik kakhip makna mating bam the.
12Kaniw kamangliangpui kumcna ata nchwan bam e,
ata siat puat paruatlou khang nchwan bam e.
13Guanglou o, he Ringhpouc!
ata zauczihmei nunc ta akhangvlou o,
kaniw ta ngamlou o!
Meicsimei nunc khou rui ata
nang baengsaeng rui kanlou o.
14Kaniw dam mi kandic khou rui laa tangmei,
kandih maansei nunc khou rui ata kanlou o.
Nang rui kaniw khang lou kaduai
bammei ryanramei dam tei rui
kaniw ta dandi tiilou o;
mi dandi tei kaniw nac nunc khang na hamhna,
kaniw tou tak khang nganvna keylou kan diu!
15Tiki ai nang zaw how puni,
kalam thu ai nkhuaimei taanv taanclou mak ge;
kumna ai zipthau pwkhou,
nang ta howna ai neihlamei padik puni.
Currently Selected:
KALUMLU 17: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
