PHILIPIMEI 1

Chaengriw Lat

1Khrista Jisu bangc Paul khatni Timothi rui—

Philipi khou bammei Khrista Jisu khou nthanmei nunc, phwamling kapy nunc khatni diken nunc khou hymei:#Lat 16.12

2Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu.

Paul rui Huayneyloumei

3Ai nangniw ta ningtowpui kathuic aRacguangc ta thuancku bam e; 4khatni ai nangniw khang huayneymei kathuic, ai neihlana huayney e. 5Mi kiu thu, rey liangmei nungc tei rui thauna ntaw nganvna nangniw ai lev gaychamv taanv khou taanc nchamc guangmei khang hei rui e. 6Kumna mi gaytaanv hei nangniw khou kahouhloumei Racguangc rui, Khrista Jisu tuang Tingmik nganvna mi taanv hei taanc suaklou puni twmei ai lwm e. 7Nangniw hei alung khou nai tanh tan bam e. Ai nangniw ta mi kumna ning bammei heikum bam khang nai tina e. Tabuicho tiki, ntaw ai kangkai khou bam khou ni, nyngswna gaychamv ta dinggaekna khatni sw ntiplouna tat bam khou ni, mi zauzian taanv khou hei nangniw hei ai lev taanc nchamc guangmei nunc e. 8Ai rui nangniw ta mi kumcna ning bammei hei Khrista Jisu lung khou rui guangmei ramzian e twmei Ravguangc rui thay e.

9Nangniw ramzian hei, nchumhmei ta thaymei lev si gay thaymei kazauhna mbu hay hay thau khang ai huayney bam e. 10Kum pwkhou tabui tei gay liangmei cho twmei kakhanh thayna Khrista tuang Tingmik nungc nangniw nthanmei khatni khanvbamv maekmei sw khang, 11khatni nangniw panty khou Khrista khou rui guangmei ravchaptatmei thai rui padikna Ravguangc hym thuanh khang e.

Ringc Bammei hei Khrista khang e

12Chanathiu, aruc khou patlou bammei hei rui gaychamv hei mbuna thay lik pat kan the twmei nangniw thaymei ta laa nii e. 13Ai kangkai khou bammei hei Khrista khang rui e twmei guanghkai rigaanv nunc khatni mi khou tei bammei guay thay kan the.#Lat 28.30 14Ai kangkai khou bammei hei rui aniu chana nunc geihmei ta Poubauhmei khou lwmmei ti-ntiplou kan e, kumna kaniw bauc mbu hay hay thauna ping tuang maekna Ravguangc tuang chamv#Ravguangc tuang chamv: baanhhy baibal asaekc khou Ravguangc twmei maek ge. dinc the.

15Ngguay, kaniw gaanvsaekc thu mamavpui zaeng rui khatni agay niipui zaeng rui Khrista lam khou dinc e; tiki gaanvsaekc rui gay kan tu laa nii changhna dinc e. 16Kaniw hei thu nzianpui zaeng rui dinh tuang e. Kalam thu gaychamv ti hei dinggaek khang Ravguangc rui ata lou bam tuang e twmei kaniw thay e. 17Tiki baihmei guay tei thu Khrista ta dinc bam changh tu hamh e; kaniw khang ningna kangkai khou bammei ati hei tiryanra katyn khang sw bam tuang de. 18Lungning sina pw ni, gayna pw ni Khrista ti hei dinclou kan e thei kiuc di the twna ai thu neihla e. Ai neihla bam puni. 19Kalam thu nangniw rui huayneymei paan rui khatni Jisu Khrista tuang Bumaengc rui nkhavloumei paan rui ata mpat patlou dat puni de twmei ai thay e. 20Ai rui kahawmei khatni lwmgaymei kiu thu, ai zak zat ni tu hamh e; kaganv kathuic, nkunna ntaw hei, ringc pw ni, theic pw ni baucna ai Khrista hym tidaiclou puni de twmei hei e. 21Kalam thu, akhang thu, ringhmei hei Khrista khang e, theihmei rui akhang gaeng e. 22Tiki ringc bam e thei, gaengmei taanv taanclou mbu nuh e. Mi khou hei tabui tei kapah nina cho ai sa khang thay mak khe. 23Khat ta ni, khat ta ni ai kahawmei rana di the. Ai mi panty hei mpatlouna Khrista khou bam kan nii the; hei tei akhang swna thu gaengmei di the. 24Tiki nangniw khang swna ai ringc bammei hei kage nai ranv e. 25Mi hei kage nai changh e, kumna ai ringc bam puni di he twmei ai nthanna thay e. Nangniw lwmmei khou daicthau bam khang khatni neihla bam khang ai nangniw lev lungc bam kanak puni di he twmei ai lwm e. 26Mi hei ai nangniw lev bam nchamc dat pwkhou, nangniw azaeng rui Khrista khou gaenghsw mbu hay hay bam khang e. 27Ntaw nthukmei thu, nangniw tuang panty lwnlung tei Khrista tuang gaychamv rui samei kumcna lungc nina e. Kum pwkhou, ai guangna nangniw zaw how dat pw ni, how dat mak pw ni, nangniw lungh khat swna ding ntip bam e khatni gaychamv tuang lwmmei khang tei kahawmei akhatna naina adow nchamc bam e twmei ai chu puni. 28Nangniw tuang zauczihmei nunc ta tei ping riu; bauc bam o. Mi bauhmei hei rui kaniw ngam ni tu hamh e, nangniw ngam puni twmei lyan tuang e. Kalam thu rihngammei hei Ravguangc rui tiilou tuang e. 29Kalam thu Khrista khou nangniw khang tiiloumei zauzian hei kakhou lwm khang na hamhna, kakhang ryanra khaengvlou khang ni kadouchamei tiilou the. 30Kalam thu ai adow kanmei ta nangniw how kanmei khatni ai ntaw adow bammei ta nangniw chu bammei ric hei, nangniw ni ai lev adow nchamc bam the.#Lat 16.19-40

Currently Selected:

PHILIPIMEI 1: RONGBSI

Highlight

Copy