PHILIPIMEI 2
2
Niamhmei khou Khrista ta Nzeic o
1Nangniw Khrista khou bammei panty hei rui nangniw ta titanclou e thei, khatni kamei rui nangniw ta nzianmei hei rui nangniw ta katiuthaulou e thei, Bumaengh rui lungc nduanghloumei#Bumaengh rui lungc nduanghloumei; hamh e thei nangniw khat lev khat kadam laa nchamc khang nangniw ta Bumaengh rui zay kariulou e thei. tei nangniw laatow e thei, kumna nangniw khou khat khat khang kadanmei khatni nzianmei nai e thei, 2mi lungning kahak tei nai nchamcna, mi ramzian kahak tei rui khat khat ta nzianna, lungh khat chwn khat swna aram neila tipadiklou khang zaenghuay e. 3Nangniw kakhang khang na ningna gaeng makmei tuang daic niimei chwn khou rui ramhkhat sini taanh riu; tiki niamh o. Meickai ta nang khang suangc mbumei dyng e twna ning o. 4Khat khat khang zauclou thay o; kakhang khang na zauh riu. 5Khrista Jisu tuang lungning hei nangniw khou ni nai nina e.
6Kakhou Ravguangc lwnlung nai bam sini,
kamei Ravguangc lev nchamc ni de#nchamc ni de; hamh e thei nchamc bam ni de. twna ning mak khwan e.
7Tiki kachwnphuakh khou rui,
katuang guay ganclouna bangh lwnlung laa the,
kamei maansei guanhna lungc guang the.
8Kamei niamh keyna maansei pumc swna latpiulou the,
kros khou theicloumei nganvna piulou the.
9Mi zaeng rui Ravguangc rui kata kauh liangmei bamv khou tikulou the,
zanh guay pang khou daic liangmei zanc kakhou tiilou the.
10Kum thena, tingkauh, kandih khatni kandih bangc khou bammei#Theic kanmei nunc kandih bangc thangc zinghmei khou lungc bam e twna ning e, kumna mi nunc ta tei e. katana,
kazanc ta chakhwang swna khuksun key puni.
11Khatni Pu Ravguangc hym khou,
meic kathuic rui, Jisu Khrista hei Poubauhmei e twna sa puni.#Isa 45.23
Mbaanv khou hei Gaanc Bam o
12Nzianmeithiu, ai bam khou nangniw latpiuna bammei tei kumcna, ai bam mak khou ni latpiu chuy diangcna bam o. Nangniw ta kanloumei tei ti-nthuihlou khang, pingkadunhna karamc bam o. 13Kalam thu Ravguangc kamei rui ningmei tei piu nii khang khatni piu ngam khang kamei nangniw khou taanv taanclou bam e. 14Nangniw ramh guayna khou khat khat ta khanc lanc tuang, hamh e thei khat khat ta agay agi tuang maekna taanc o. 15Kum pwkhou nkhuai mbamei khatni simei mei kin khou hei, nangniw khuay maekmei khatni nthanmei swna nthuihmei Ravguangc nac nunc sw khang e. Gaanchuangcna kumc nangniw mbaanv khou gaanc o.#Ria 32.5 16Ringhmei lat tei sin ntip bam o. Kum pwkhou ataanv hei nsa hamh the twna Khrista tingmik nungc kiu ai gaengh sw khang e. 17Nangniw ramlum tei Ravguangc khang katlou khang apanty zei hei ravcha swna bunlou e thei, ai neihla e, kumna nangniw lev neihla nchamc e. 18Hei tei kumcna, nangniw ni neihla nina e, kumna ata ni tineihlalou o.
Timothi khatni Epaphrodita
19Ravguangc rui chwnmei e thei, asaanh makmei lungc khou Timothi ta nangniw daeng khou ndiu guang puni, kumna kamei rui nangniw chamv phungc guang datna ata tineihlathaulou khang e. 20Ai lev lungh tamzuanmei khatni nangniw khang kadan changh bammei Timothi kumhmei meic baihmei maek ge. 21Baihmei guay thu kakhang khang na phuna, Jisu Khrista khang thu ninglou mak khe. 22Timothi ramgai tei nangniw thay e. Gaychamv taanv khou aney hei punav kumcna taanc nchamc bammei tei nangniw thay e. 23Ai akumhmei lwnlung khou bam dat puni cho twmei thaypui lev Timothi ta nangniw daeng khou ndiu guang khang ning bam e. 24Ai kahak ni asaanh mak khou nangniw daeng khou guang khang Poubauhmei khou lwmgay bam e.
25Ai lev taanv taanc nchamcmei, rihmei sw nchamcmei, nangniw tuang latdiumei, ata siamruai swloumei achana Epaphrodita ta nangniw daeng khou ndiu guang khang kage nai e twna ning the. 26Kamei nangniw ta how dat niina bam e khatni kamei mpeyna lungh katuakcna bam e. Kalam thu kamei nnau kanmei tei nangniw chu kan the. 27Kamei nnauna theic ni kumclou the. Tiki Ravguangc rui kata na hamhna ata ni nzianlouna zaengsimei khou rui tizaengsi katynlou nimei khou rui tiduaklou the. 28Kumna ai rui kata nangniw daeng thangc ndiulou nii ranv the. Kalam thu nangniw kata how e thei neihla puni the, kumna alung ryanramei ni kuak puni the. 29Kumna nangniw kata Khrista khou neihlana laalou o. Mi kumhmei mei nunc ti hei chakhwang swlou o. 30Kamei Khrista tuang taanv khou rui, nangniw taanc tangc ngam makmei ata nkhavloumei taanv khou rui kamei theic duaklou the.
Currently Selected:
PHILIPIMEI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
