IBRIMEI 1
1
Kanac Mpouh Paan rui Saloumei
1Reydouc tei thu Ravguangc rui kathak baih baihmei mpeyna khou, aniu pupouc nunc khou, muhzwng nunc ta tisalou khwan e; 2tiki mi nkhamhmei ganv khou hei thu, aniu khou, Kanac Mpouh ta tisalou the. Mi Nac Mpouh hei, Ravguangc rui kapaan rui mbaanv damhmeipu, khatni nkhamh khou Ravguangc rui ramh katana kakhou tiilou nimeipu e. 3Ravguangc tuang hymgaanhmei tei kakhou nai e khatni kamei hei Ravguangc kahakmei e; ngammei kalat paan rui mbaanv hei nai bam tuang e. Kamei maansei paap guay sw nthanloumei taanv taanc luailou lana, tingkauh thangc Ravguangc tuang baanzat khou dungc keyna, kauh liangmei ngamv laa kan the.
Kanac Mpouh hei Kauh Baanchara nunc Suangc Daic e
4Ravguangc rui Kanac Mpouh khang, kauh baanchara nunc khang tiiloumei zanc suangc daic taph tapmei zanc tiiloumei kumcna, kata kauh baanchara nunc suangc daic taph tapmei tiswlou the. 5Kalam thu,
“Nang hei anac mpouh e,
aseic thu ai hei nang pu di the,”
twna tabui kumhmei kauh baanchara khou Ravguangc rui salou kanmei tuang naina cho? Khatni
“Ai kapu sw puni,
kamei anac mpouh sw puni,”#Kal 2.7; 2 Sa 7.14; 1 Ki 17.13
twna ni tabui kumhmei kauc baanchara khou salou kanmei tuang naina cho? 6Tiki Ravguangc rui kanac nareimei mpouh ta mbaanv khou ndiu guang khou,
“Ravguangc tuang baanchara guayna rui kata kalum kan diu,”#Ria 32.43
twna kamei rui sa kan e.
7“Ravguangc rui kabaanchara guay ta mpwan,
katuang siamruaimei guay ta maibwang tiswlou the,”#Kal 104.4
twna kauh baanchara guay lam khou Ravguangc kamei rui sa e. 8Tiki Ravguangc rui kanac mpouh lam khou thu mi kumna sa e:
“He Ravguangc, nang guangcdic hei tingsaeng nai bam puni!#He Ravguangc, nang guangcdic hei tingsaeng nai bam puni! hamh e thei Ravguangc hei nang guangcdic e.
Nang rui nang mei nunc#nang mei nunc; baanhhy baibal asaekc khou kamei nunc twna hylou e. ruc khou nchumhna dihsin puni.
9Nang nchumhmei ta kahaw e;
nkhuaimei ta karaeng e.
Hei zaeng rui nang Racguangc rui
nang ta kadahlou the,
kumna nang pammei pang khou rui,
nang khou neihlamei tuang chakhwang tiilou the.”#Kal 45.6-7
10Kamei rui mi kumna ni sa e:
“He Poubauhmei, nang rui
puakthau puaksiak khou rui,
mbaanv damclou the,
kumna tingpuk hei nang tuang baansyam e.
11Mi guay hei thu maan kan ni de,
mi guay hei phey kumc karaan key kan ni de,
tiki nang thu kachah makna bam puni.
12Hei tei nang rui pheybaan ganh kumc ganc kan puni,
khatni pheybaan kalaih kumc kalaic kan puni;
tiki nang thu kalaic lak ge,
nang panty nganvmei nai lak ge.”#Kal 102.25-27
13“Nang ta zauczihmei ta
nang phaypav bangc khou tiniibinlou mak saanv,
nang atuang baanzat khou bam o,”#Kal 110.1
twna kauh baanchara gaanv khat na khou sini sa kan mak ge.
14Kumna mi kauh baanchara guay hei thu, Ravguangc siamruaimei, kanloumei laa nimei nunc ta nkhavlou khang ndiuloumei bumaengc nunc hamhna cho?
Currently Selected:
IBRIMEI 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
