NAHUM 1
1
1Mi hei Elkosmei Nahum rui Nineve lam khou how kanmei ndawman tuang lat re.#Isa 10.5-34; 14.24-27; Zep 2.13-15
Ringhpouc rui Nineve ruc khou Lunghpuamhmei
2 Ringhpouc rui kata adapui mei
gaanv khat na ta sini zauc bam ngam mak ge;
kata akhangvpui mei ta kamei rui dandi tii e.
Kalungpuam khou kaniw ta khwm khangclou e.
3 Ringhpouc thu lungpuamh nuangh mak ge,
tiki kamei hei pumtan naimei e kumna khuay naipui mei ta dandi tii makna mpatlou mak ge.
Ringhpouc thei pwanzingh lay tat re;
muangh hei kaphay rui tat katungh thaumei mbut re!
4Kamei rui duipui khou latdanv tii tina hei tei thip kan the!
Kamei rui duithuak ta tithiplou the.
Bashan tuang ramvpaek kangc the,
Karmel Chyng kamv ngam the,
khatni Lebanon tuang mwnpwang guay tuai ngam the.
5 Ringhpouc hu khou chyngbut guay kadunh the;
kahu khou chyngbut guay nungc key the.
Ringhpouc pat pwkhou kandih kadunh the;
kandih khatni kandihmei guay kadunh the.
6Kamei lungpuamc pwkhou,
thow rui dingchaek ngam ni?
Kareic patna lungpuamhmei tei
thow rui akhangv ngam ni?
Kalungpuam mai kumcna bunpat the;
kahu khou khowtauh guay ni
piakna mbut mbaih kan the.
7 Ringhpouc hei gay e;
ryanramei ganv khou kamei rui
kamei nunc ta gaeklou e;
kakhou karih guangmei guay ta
kamei rui kadanlou e.
8Luangc ranvna luangc guangmei duidai kumcna kamei rui kata zauczihmei nunc ta swmaanlou e;
kata akhangvmei nunc ta kamei rui theihmei khou nthaulou e.
9 Ringhpouc ruc khou nangniw tabui tuang mbinhmei raeng raengc bam tu cho?
Kamei rui nangniw ta swmaanlou puni.
Meic gaanv khat na sini kata
akhangv kaneilou khang maek ge.
10Sauhraengh bang kumc khatni
napgou kumc, nangniw ta ntei puni!
11He Nineve, simei raeng rui padikmeipu, Ringhpouc ta sw kasic khang sw nimeipu gaanv khat nang khou rui guang e. 12Ringhpouc rui kamei nunc Isaraelmei khou samei kiu mi hei e: “Asiriamei nunc tei tanc sini khatni kasing geic sini, kaniw ta tei swmutlou puni, kumna amaan kan puni. Amei nuncle, ai rui nangniw ta tiryanralou the, ai rui nangniw ta rai dat lak khe. 13Nangniw ruc khou Asiriamei ngamv nai bammei tei ntaw thu laa ganclou puni the khatni nangniw ta bangcloumei kangriang guay tei swtaplou puni the.”
14 Ringhpouc rui Asiriamei lam khou heikumna latdanv pat kan the: “Kaniw zanc tei phungc nsuk key khang kaniw kikta nai lak khe. Kaniw tuang ravkai guay khou nai bammei ravmaengc nunc tei ai rui swmaanlou puni the. Ai rui Asiriamei khang tarou kasiamhlou bam the kaniw hei ringc bam khang biuh mak khe!”
15Zauc lo, chyngbut thangc tei, latdiumeipu gaychamv phungcna guang pw the! Kamei rihngammei chamv kauc ndauh khang guangmei tuang e! Judamei nuncle, nangniw tuang khumngai guay tei ngay tho kumna nangniw rui kakhang tii ni twna nrianhloumei guay tei tii tho. Meicsimei nunc rui nangniw kandic khou rihkey dat pw lak khe. Kaniw ta swmaan mutsutlou kan the!#Isa 52.7
Currently Selected:
NAHUM 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
