MAIKA 7
7
Isaraelmei hei Mphuam the
1Ai hei san simei e dav! Ai hei thingbang khou tingthai khat na sini ariw makmei, drakha bang khou kathai phutow makmei ndaapcpui mei kumc the. Drakhathai guay khatni tu gaymei tadutthai guay rei ngam kan the. 2Mi kandic khou hei lungning nthanmei gaanv khat na sini ganclou duh mak khe, meic gaanv khat na sini Ravguangc lat piu chuyna bammei maek khe. Meic kathuicna meicbiw-meicdow khang kadow chamei zaucna bam e. Meic kathuicna khat khat ta rikna bam e. 3Kaniw kaguayna hei simei taanh khang thu heih the. Meicdaihmei nunc khatni latzanpouc nunc rui lanvbiwmei tu khang neyna bam e. Kangamv naimei nunc rui kaniw rui kahaw hawmei theilayna sa the kumna kaniw kaphianh nchamc the. 4Kaniw pang khou meic gay liangmei khatni lungning nthan liangmei nganvna sauhraengh bang kumc si the.
Ravguangc kamei rui swriak thay khang muhzwng nunc khou sa kasuakcloumei theilayna kamei meic nunc ta dandi tii nimei ganv guang pw the. Ntaw thu kaniw swangmav maekpui ganv guang the. 5Nang tuang kainingmei ta lwm dat ri tho, nang pam ta ni lwmgay dat ri tho. Nang rui sa nimei lat tei nang now khou nganvna ramh thayna sa la tho. 6Kalam thu kanac nunc rui kapu nunc ta mbamei ta kumc sw the, kanac aluhpui nunc rui kapui nunc ta akhangv the, kamauc nunc rui kaneic nunc ta agay the; meic gaanv khat khang zauczihmei kiu kakai kaikhuncmei tei rap di the.#Met 10.35,36; Luk 12.53
7Tiki ai thu Ringhpouc ta zaucna bam puni; ai thu ata kanlou nimeipu Ravguangc ta lwmna nkhwan bam puni; aRacguangc rui ai samei chulou puni.
Ringhpouc rui Kanlou Puni
8Aniu ta zauczihmei nunc rui aniu ruc khou zaenggay bam khang kalam maek ge. Aniu bow the, tiki thau dat puni. Ntaw aniu zinghmei khou bam the, tiki Ringhpouc rui aniu khang gaanhmei tiilou dat puni. 9Aniu Ringhpouc ruc khou paapc taanc the, hei zaeng rui matat khat thu aniu kalungpuam akhaengv nina di the. Kum e tiki nkhamh khou kamei rui aniu ta gaeklou dat puni kumna aniu khou sina taancloumei zauczihmei nunc ta tei dandi tii puni. Kamei rui aniu ta gaanhmei khou nduangh patlou puni; kamei rui aniu ta kanloumei tei aniu how dat puni. 10Hei khou kiu aniu ta zauczihmei, “Ringhpouc nangniw Racguangc kiu tabui thangc cho?” twna sinnui bammei nunc tei mi hei how lana kaniw tisiloumei khatni chaengluang khou bih ta nii bin kumc nii key nimei ta aniu mik rui how puni the.
11He Jerusalemmei nunc, kaidai raengc tei raeng thau dat nimei ganv guang pw the. Mi ganv khou kiu nangniw tuang kandic tidaic pat puni. 12Nang mei nunc kabamv kathuic khou rui nang khou hancguang dat puni neihpat thangc Asiria khou rui, kabangc thangc Izip khou rui, Euphratis tuang ramv khou rui, duipui duhmei thangc rui khatni duhmei chyngbut guay thangc rui guang dat puni. 13Tiki kandih khou lungc bammei maansei nunc rui simei zaeng rui kandih hei sypungramv mbaih puni the.
Ringhpouc rui Isaraelmei ta Nzianmei
14He Ringhpouc, nang rui kapahpatloumei nang mei nunc ta gaengclou o. Kaniw tazikramv khou lungc bam khwan sini kandih gaymei ramv kaniw daeng khou nai nkuay bam e. Bashan khatni Gilead tuang mphuaihpung khou reydouc tei kumcna kaniw ta ti-mpahlou o.
15 Ringhpouc nang rui aniw ta Izip khou rui nduanghpatmei douc taanclou kanmei tei kumcna aniw khang rui charynmei taanv taanclou o. 16Zaatc nunc rui mi guay hei how lana kaniw pumtan tanc bam sini kaniw zak kan di tho. Kaniw key reih reyna kaniw mwang kagouc kan di tho khatni kaniw nu nkat kan di tho. 17Kaniw nrui kumcna kandih khou tuic puni the; kaniw ping kadunhna kaniw tuang rihgaekkai khou rui pat puni the. Kaniw pingna Ringhpouc aniu Racguangc khou karih guang puni.
18He Ringhpouc nang kumhmei rav baihmei maek ge. Nsaekcloumei nang mei nunc paap nang rui kuaklou the. Nang thu lungpuamh tanh tanna bam mak ge, tiki nang tuang taek makmei ramzian tei aniw khou nzianlou niina bam e. 19Nang rui aniw ta zauc nzianlou dat puni. Nang rui aniw tuang paap guay ta niibinlouna duipui syng thangc phaiclou kan puni! 20Nang rui reydouc aniw pupouc nunc khou nrianhlou kanmei kumcna nang rui nang mei nunc Abraham khatni Jakob kikta khou nang tuang lwmnuhmei khatni taek makmei ramzian nzianlou puni.
Currently Selected:
MAIKA 7: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
