MAIKA 6
6
Ringhpouc rui Isaraelmei ta Latzan Swmei
1Isaraelmei ruc khou Ringhpouc rui lat sa nimei hei nking o. Thau tho, he Ringhpouc nang rui sa nimei lat kiu salou tho; nang rui sa nimei tei chyngbut khatni luanghbut guay rui chu kan diu.
2He chyngbut guay, kandih tuang tingsaengzaeng kaiphun guay, Ringhpouc rui sa nimei lat hei nking o! Ringhpouc rui kamei nunc ruc khou sa nimei latbamv nai the. Kamei rui Isaraelmei nunc ruc khou kaniw khuay sapat puni the.
3 Ringhpouc rui sa e, “Amei nuncle, ai rui nangniw khou tabui swlou thena cho? Akumhna ai hei nangniw khang puatrith sw thena cho? Daw o. 4Ai rui nangniw ta Izip khou rui phungc patlou the; ai rui nangniw ta bangh khou rui kanpatlou the; nangniw ta zaylou khang ai rui Mousi, Aron, khatni Miriam ta thouclou the.#Tat 12.50,51; Tat 4.10-16; Tat 15.20 5Amei nuncle, Moabmei guangc Balak rui nangniw ruc khou tabui sw khang sw kan tu cho khatni Beor nacpu Balaam rui kakhou akumhna sadaw kan tu cho twmei ningtow o. Akasia tuang zypuikai khou rui Gilgal nganvmei dak khou chaengkui khou pat kanmei tei ningtow o. Mi guay hei ningtow o kumna nangniw ta kanpatlou khang ai rui taanc kanmei tei kakhanh o.”#Sin 22.2—24.25; Jos 3.1—4.19
Ringhpouc rui Kahawmei
6 Ringhpouc, tingkauh Ravguangc ta kalum khang guang khou ai kakhang tabui phungc guang nina cho? Kakhou rawna khaenglou khang ai rui tingkwm akhatmei guaituamchic launa phungc guang nina cho? 7Ai rui lauziu ching ching phungc guang tina hamh e thei laengkic thauc duiriang kumc luangc taek makna tiluangc guang tina Ringhpouc rui pian puni cho? Apaap khang rui ai anac mpouh nareimei ta katlou nina cho? 8Kiuc hamh e, gaymei kiu tabui tei cho twmei Ringhpouc rui aniu khou dinclou the. Kamei rui aniu khou rui kahawmei kiu thu: nchumhna taanhmei, nzianmei, khatni niamhna aniu Ravguangc lev tat nchamc bammei twmei hei e.
9 Ringhpouc ta ping thaymei hei ningtyngmei e. Kamei rui kaidai khou tei kaw e, “Nking o, kaidai khou hei guang kaduai bammei nangniw! 10Meicsimei kai khou lungning nthan makna laaguangmei lanv nai e. Kaniw rui ramh ndatmei guatna sin e, hei tei ai rui karaengmei taanv e. 11Meic nunc rui nchumh makmei ndatryan khatni duh sin bammei nunc ta tei akumhna ai kuaklou ngam nina cho? 12Nangniw lungcgaymei nunc rui lungcsimei nunc ta sintuna lungc the. Kumna nangniw meic kathuicna saraamhmei rana di the. 13Kumna nangniw paap zaeng rui ai rui nangniw ta sw kasic kahouh the khatni swmut kahouh the. 14Nangniw tu bam sini nggu lak ge nangniw ndaapcna bam puni e. Nangniw ramh ry bam sini mi guay tei rylou bam ngam ni tuang hamh e; nangniw rui rylou khang swloumei guay tei rih khou rui swmaan kan puni. 15Nangniw rui nap-bi lingc bam e tiki tay tu ni tuang hamh e. Nangniw rui laengkic thauc sunc bam e tiki hei tei piutow lak ge. Nangniw drakhadui kasiamh bam e tiki hei tei zangvtow lak ge. 16Mi hei pat puni the kalam thu guangh Omri khatni kanacpu, guangh Ahab tuang simei thak tei nangniw layluaih the. Nangniw rui kaney tuang taanv tei ntaw nganv layluaih bam di he, kumhpui zaeng rui ai rui nangniw ta swmaanlou puni. Kumna meic kathuicna nangniw ta mala puni. Kabamv kathuicna khou bammei maansei guayna rui nangniw ta malana sw puni.”#1 Gu 16.23-28; 1 Gu 16.29-34; 21.25,26
Currently Selected:
MAIKA 6: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
