MAIKA 5
5
1He Jerusalemmei nunc, nangniw tuang ricmei guay khuam kariu tho! Aniu ta ding haengv the! Kaniw rui Isaraelmei tuang kaipouc ta adow bam the!
Bethlehem khou Ravguangc rui Nrianhloumei
2 Ringhpouc rui sa e, “Bethlehem Ephratha, nang hei Juda khou nthyam liangmei kaidai akhat re, tiki nang khou rui ai rui Isaraelmei tuang kaipouc tiguang puni, kakai khwang tei rey nungc kin thangc rui suic guang tuang e.”#Met 2.6; Jhn 7.42
3Naruai bammeipui tei mpouh puanc pat mak saanv Ringhpouc rui kamei nunc ta kaniw ta zauczihmei nunc baanc khou ganclou puni. Khou kiu ginramc thangc meic bangc bamtatmei kakandicmei nunc tei baihmei nunc tei lev guang kariu dat puni. 4Kamei guang pwkhou, kamei rui kamei nunc ta Ringhpouc khou rui guangmei pumtan khatni Ringhpouc Ravguangc tuang tikgunc kahak rui sin puni. Kamei nunc giuga makna bam puni kalam thu kandih namruc khou bammei maansei kaguayna rui katik kahym thay puni, 5khatni kamei rui nchu-nzaenghmei phungc guang puni.
Kanpatloumei khatni Dandi
Asiriamei nunc rui aniu kandic khou rih keyna aniu tuang raengc guay sw bak gut pwkhou, kaniw ta adow khang lauziu gaenghpouc chanei khatni kapy gaanv tachat thoucpat puni. 6Buy-baeng sin swna kaniw rui Asiriamei ta ngam puni, Asiriamei nunc rui rih key pwkhou kaniw rui aniu ta kanlou puni.#Tha 10.8-11
7Isaraelmei theic nsaekcloumei nunc tei zaatc mpeyna khang Ringhpouc rui tii guangmei tikaluanloumei zikdui, ramhbwan thaupat khou riu keyloumei tingdui kumc puni the. Kaniw tei maansei khou hamhna Ravguangc khou ngangvlou puni. 8Zaatc nunc ding khou ganclouduhmei nunc tei kamangliangpui rui ngouh khou hamh e thei khouringhbyn khou kataek phu bammei kumc puni the. Kamei rui lauziu pang khou gut the, nym the, kumna kaniw ta tei siat puat paruat ruatlou the, kanlou dat nimei maek khe. 9Isaraelmei nunc rui kata zauczihmei nunc ta ngam puni khatni kaniw guay ta swmutsutlou puni.
10 Ringhpouc rui sa e, “Mi ganv khou kiu ai rui nangniw tuang takuanh guay ta laa ganc kan puni khatni nangniw tuang takuanh gari guay ta sw kasic ngamlou puni. 11Ai rui nangniw kandic tuang kaidai guay tei swmutlou puni khatni nangniw tuang rihgaekkai guay swpangvlou puni. 12Nangniw tuang duaih-raengh tuang guay swmaan ngam puni kumna ravtow amuc nai dat lak khe. 13Ai rui nangniw tuang ravmaengc nunc khatni ravmaengc tuang ntauhtiangc guay tei swmaan puni, nangniw rui kasiamhmei puat ta tei nangniw kalum bam dat lak khe. 14Nangniw kandic khou naimei Asherapui tuang maengc guay tei ai rui sw kasic puni kumna nangniw tuang kaidai guay tei swmutlou puni. 15Kumna lat piu makmei zaat guay ta alungpuam dai khou khwm khangc puni.”
Currently Selected:
MAIKA 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
