MAIKA 4
4
Ringhpouc rui Kandih Kapwm ta Sin Nimei
(Isa 2.2-4)
1Nkhamhmei tingmik guay khou Ravkai ding bammei chyngbut hei kauh liangmei sw puni, chyngbut pang khou kauh taph tapmei sw puni.
Zaatc mpeyna mi khou hei dui
luangh kumc luangc guang puni,
2Kumna kaniw rui sa puni,
“Aniu Ringhpouc tuang chyngbut khou ku di kho,
Isaraelmei Racguangc tuang Ravkai khou.
Kalam thu kumna aniu rui katuang chaeng khou tat diu khang kamei rui aniu khou katuang chaeng dinclou puni.
Kalam thu Ringhpouc tuang latdyn hei
Jerusalem khou rui guang e;
Zaion khou rui kalat hei pat re.”
3Zaatc pang khou latlu naimei tei
kamei rui latzan swlou puni,
duh thangc ni ana khou ni ngamv daihmei guay pang khou latlu naimei guay timaneilou puni.
Kaniw rui kaniw tuang baengsaeng guay tei lauphu khang dy kan puni khatni kaniw tuang buy guay tei laurap baeng khang dy kan puni.
Zaatc nunc tei rih sw dat lak khe,
rih adow khang ni chamdaanv dat lak khe.#Isa 2.4; Jol 3.10
4Meic gaanv khat na sini suc-rih pingmei maekna katuang katuang drakhalau khatni tadut bang ding khou lungcna bam puni.#Zek 3.10
Kumna meic gaanv khat na sini pingmei nai dat lak khe.
Ngamparymei Ringhpouc rui mi hei nrianhlou the.
5Zaatc kathuicna karav karav ta kalum e khatni kalat piu e, tiki aniu thu Ringhpouc aniu Racguangc ta tingsaengzaeng kalum ni khatni kalat piu ni.
Isaraelmei Ginramc thangc rui Guang dat Puni
6 Ringhpouc rui sa e, “Ai rui riaplou kanmei nunc, ginramc khou ryanra akhaengv kanmei nunc ta tei ai rui khuam kariu dat nimei ganv guang pw the. 7Kaniw hei phaybaanh chuanchaymei kai khou rui alay gancloumei nunc e, tiki mi nsaekclou duhmei nunc khou hei rui ai rui kathanc kahouh dat puni the, kumna kaniw tei zaatc daihmei sw puni. Mi ganv khou tei rui thauna tingsaengzaeng ai rui kaniw ta Zaion Chyng khou sin puni.”
8Kumna, he Jerusalem, lauziu gaenghpouc kumcna Ravguangc rui kamei nunc ta zaucna bampui bamv nang ti hei, nangniw tuang guanghdic tuang kaidai swlou dat puni e. 9Tabui swna nangniw heidi kap ranvna kap bam tu cho? Tabui swna nangniw nahbam nimeipui kumcna ryanra akhaengv bam cho? Nangniw tuang guangc maekpui zaeng rui hamh e thei nangniw tuang peikumei nunc theic ngam kanmei zaeng rui cho? 10Nahbam nimei pui kumcna nkuliang liangcna kalei tho, he Jerusalemmei nuncle, kalam thu ntaw thu nangniw kaidai hei ganclouna ramvpuk khou lungc puni the. Nangniw Babilon thangc tat puni the, tiki khou tei Ringhpouc rui nangniw ta zauczihmei nunc khou rui kanduaklou puni. 11Nangniw ta adow khang zaatc mpeyna guang kariu pw the. Kaniw rui sa e, “Jerusalem ta swmutlou puni! Mi kaidai hei lungctaekna gancloumei ta aniu how puni!” 12Kum e tiki Ringhpouc tuang lungning khou tabui nai cho twmei mi zaatc nunc hei thay mak ge. Laudy khang rui napchu khuam kaduai guangmei kumcna kaniw ta dandi tii khang khuam kaduai guangmei tuang e twmei kaniw thay mak ge.
13 Ringhpouc rui sa e, “Jerusalemmei nuncle, tatna nangniw ta zauczihmei nunc ta dandi tii tho! Ai rui nangniw ta ntanh rui kachei swmei khatni tanzinc rui kangianh swmei guaituamchic kumc titanclou puni the. Nangniw rui zaatc mpeyna ta niakpiaklou puni the, kumna kaniw rui asutna laaloumei lanv tei nangniw rui kandih kapwm kaipouc akhang kaipat swna tii puni the.”
Currently Selected:
MAIKA 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
