LEVITHOUC 14
14
Meicgic Ravpuat Tangv Sw Nthan Pat Datmei
1 Ringhpouc rui Mousi khou sa the, 2Mi hei thowkumhmei naengv nuhmei meic gic ravpuat khou rui gaydatpui mei ta kariak khou sw nthan dat nimei riak ge. Kata amuh daeng khou phungc guanglou nina e.#Met 8.4; Mrk 1.44; Luk 5.14; 17.14 3Kumna amuh tei rui kata raengh paengc thangc nduangh patna kata zauc nina e. Karavpuat tei gay dat re thei, 4nthanmei nruayna nringh kanei, sidar thing asaekc, langhriang haenghmei khatni sw nthanmei hissop phungc guang khang sa puni. 5Khoutei, taniang tamkuak akhat khou duithan louna mi khou tei nruayna akhat tei swluailou khang sa puni. 6Mi tangv tei amuh tei rui nruayna akhat tei laa lana sidar thing, langhriang haenghmei, khatni hissop hei guay tei mi nruayna zei kuak khou tei ntin puni. 7Mi tangv tei mi zei tei laa lana mipu khoutei kazinhlou liang chanei lana kamei tei nthan the twmei kauc patlou dat puni. Mi tangv tei mi ringhmei nruayna tei mpaengc thangc mpatlouna tisamc tat dat puni. 8Kamei tei kaphey kabaan sou lana, kapy guatna duilow puni. Kamei kailuangc khou gut dat nuh the, kum e tiki zaeng chanei thu kainung gut makna kapaengc khou bam nina e. 9Kumna zaeng chaneimei nungc, kapy sam, kamwang hiw, kamik hiw, kapumc khou naimei sam guay guat nthan thiak lana, kaphey kabaan sou nthanna duilow puni, kum kan e thei kamei tei nthan dat the.
10Zaeng tachatmei nungc kamei rui hiaksuimei tingkwm akhatmei lauziuchiclauna kanei khatni lauziunay akhat khatni Olive thauc kazauhmei ntyan buay kaduk kathumh, khatni Olive thauc kaduk akhat twna phungc guang nina e. 11Amuh tei rui mipu ta tei khatni katuang puatkat guay tei Ringhpouc tuang kalummei pheykai chaengmun khou tei phungc guang puni. 12Kumna amuh tei rui lauziuchiclauna akhat tei khatni Olive thauc tei laa lana nwan khang khaengmei puatkat swna kat puni. Kamei rui hei tei Ringhpouc khang nkunmei kaipat swna amuh khang tei tii puni. 13Paapc khang khaengmei khatni rawna khaengmei khouringc dowluaimei Nthanmei bamv khou tei amuh tei rui mi lauziunac tei dowluai puni. Kamei rui mi hei sw nina e kalam thu khaengmei puatkat tei kumna paapc khang khaengmei hei ni amuh tuang e. Kumna hei tei nthan dianghmei e. 14Amuh tei rui lauziu zei tei laa lana sw nthanlou nimeipu tuang baanzat nupan, baanzat baanc zungkui khatni baanzat phay zungkui khou tei teylou nina e. 15Amuh tei rui Olive thauc asaekc katuang baandau baancpav khou liclouna 16kabaanc baanzat zung rui hei tei key ntin lana Ringhpouc hu khou tei kazinhlou liang chanei puni. 17Kamei rui kabaancpav khou tei rui thauh tei khatni lauziu zei tei laana mipu tuang baanzat biak nupan, khatni kaphay kabaanc baanzat zungkui khou tei teylou puni. 18Kabaanc khou nsaekcloumei thauc guay tei mipu py khou tei teylou puni. Heikumna kamei rui sw nthanmei tuang thouc tei swlou puni.
19Mi tangv tei amuh tei rui paapc khang tei khaeng lana sw nthanmei tuang thouc tei swlou puni. Mi tangv tei thu rawna khaeng nimei tuang khouringc tei swluai puni. 20Kumna hei tei ntyan tei lev twna ravchapaeng khou tei katlou puni. Heikumna amuh tei rui sw nthanmei tuang thouc tei swlou kan e thei, mipu tei nthan puni.
21Mipu tei lungcsina mi guay tei kat ngam lakmei tuang nai e thei, kata sw nthanmei thouc sw khang khaengmei puatkat swna lauziuchic akhat phungc guang nina e. Hei tei Ringhpouc khang nkunmei kaipat swna amuh khang tei tii khang e. Khoutei rui ntyan khang Olive thauc kazauhmei ntyan buay handwang akhat khatni Olive thauc kaduk akhat laaguang kazauh nina e. 22Kamei rui aphyna kanei hamh e thei akhouhna kanei ni phungc guang nina e. Hei tei akhat rui paapc khang khaeng khang khatni akhat tei rui rawna khaeng khang e. 23Kata sw nthanmei tuang zaeng tachatmei nungc tei kamei rui mi guay tei amuh khou tei Ringhpouc tuang pheykai khou phungc guang nina e. 24Amuh tei rui lauziunac khatni thauh tei laana Ringhpouc khang nkunmei tuang puatkat swna katna amuh khang tii nina e. 25Amuh tei rui lauziunac tei swluaina kazei tei laa lana mipu tuang baanzat nupan, khatni baanzat tuang kaphay kabaan zungkui khou tei teylou nina e. 26Amuh tei rui thauh asaekc tei katuang baandau baancpav khou bunlouna 27kabaanc baanzat zung rui mi thauc tei Ringhpouc hu khou tei kazinhlou liang chanei nina e. 28Thauh tei ni zei teyloumei bamv kanupan khatni kaphay kabaanc zung khou tei teylou nina e. 29Kabaancpav khou nsaekcloumei thauc guay tei mipu py khou tei teylou nina e, heikumna sw nthanmei tuang thouc tei swlou puni. 30Mi tangv tei amuh tei rui akhouhna hamh e thei aphyna akhat tei 31paapc khang khaeng puni kumna akhat tei rui ntyan buay tei lev rawna khaeng puni. Heikumna amuh tei rui sw nthanmei tuang thouc tei swlou puni. 32Mi hei thowkumhmei naengv nuhmei gih tuang ravpuat khou rui sw nthan datmei khou gut nimei tuang tei tii ngam lakmei nunc rui sw nimei tuang thouc e.
Kai khou Samh Naimei
33 Ringhpouc rui Mousi khatni Aron khou sa the. 34Ai rui nangniw khang tiiloumei Kanaan kandic khou gut pwkhou thowkumhmei kai khou samh towmei nai e thei 35kaipouc tei rui amuh daeng thangc tatna “Akai khou samhtowmei tuang luihmei nai e” twna poulou nina e. 36Amuh tei rui kamei guang zauh makmei hu khou kakai khou naimei puat guay na tei katiamh pat khang sa puni. Katiamh pat makmei guay tei thu nthan makmei e twna kauc patmei khou tei kazauh puni. Kum kan e thei kamei rui mi kai thangc tei tatna 37samh tei zauc puni. Ngaengsaengc khou tei mi samhtowmei tei rui towloumei tuang ndiakmei hamh e thei haengc sih simei bamv how pat re thei, 38kamei rui kai tei kaikhamv mbanghlouna zaeng chanei ganclou puni. 39Zaeng chaneipui nungc kamei guang datna hei tei zauc dat puni. Mi samh tei paengv pat re thei 40mi samh naimei ntauh tei laa pat lana kaidai paengc thangc nthan makmei bamv khoutei kaliang ganclou khang sa puni. 41Mi tangv tei kainung ngaengsaengc guay tei khuak pat lana hei tei kaidai paengc thangc nthan makmei bamv khou tei ganclou nina e. 42Mi tangv tei laa ganc kanmei ntauh bamv khou tei ntauh thanh lou dat nina e khatni khuak ganc kanmei kainung ngaengsaengc tei teylou dat nina e.
43Heikumna laa gancna kasiamhlou datmei tangv mi khou tei pat dat re thei 44amuh tei rui tatna hei tei zauc dat puni. Hei tei pat dat re thei thu mi kai tei nthan mak khe. 45Kai tei rakeyna kathing katauc kaguayna tei raengh paengc thangc phungc patna nthan makmei bamv khou ganclou nina the. 46Mi kai tei kaikhamv mbanghlou bammei dak khou mi kai khou tei gutloupui mei tei tingzyn nganvna nthan mak khe. 47Mi kai khou tei ziploumei khatni tuzangvloupui mei tei kaphey kabaan sou dat nina e.
48Tiki amuh tei guangna zauc pwkhou mi kai tei kasiamhlou datmei tangv samh patlou datmei tuang lwn how mak ge thei, amuh tei rui mi kai tei nthan the twna kauc patlou puni kalam thu mi samh tei laa ganc ngam the. 49Kai tei sw nthan dat khang kai kaipouc tei rui nruayna kanei, sidar thing, langhriang haenghmei, hissop hei guay hei phungc guang puni. 50Nruay akhat tei duithan loumei taniang tamkuak khou swluailou puni. 51Kumna amuh tei rui ringhmei nruayna, sidar thing, langhriang haenghmei, khatni hissop tei swluaimei nruayna zei khou tei khatni duithan khou tei lup puni. Kumna amuh tei rui hei tei mi kai khoutei kazinhlou liang chanei puni. 52Hei tei kumcna kamei rui nruayna zei, duithan, nruayna ringhmei, sidar thing, hissop, khatni langhriang haenghmei tei rui mi kai tei sw nthan puni. 53Heikumna kamei rui nruayna ta tei raengh paengc thangc patna mpatlouna tisamc tat puni. Heikumna kamei rui sw nthanmei tuang thouc tei taanclou pwkhou mi kai tei nthan dat puni.
54Mi guay hei naengv nuhmei meicgic ravpuat nthakmei, 55pheybaan khou khatni kai khou samhtowmei 56puamhmei khatni asuh daihmei khou sw nimei thouc guay the. 57Mi hei nthanmei mphuammei thaykhak thaylangc nimei tuang thouc guay the.
Currently Selected:
LEVITHOUC 14: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
