LEVITHOUC 13
13
Mphaanhmei khou Sw Nimei Riak
1 Ringhpouc rui Mousi khatni Aron khou sa the. 2Thowkumhmei khou kagic khou puamhmei hamh e thei asuh daihmei hamh e thei ranh ranmei khatni hei tei rui mphaanhmei ravpuat guanh pat nuhmei tuang nai e thei kamei ta Aron hamh e thei kanac nunc amuh akhat khou phungc guang nina e. 3Amuh tei rui suhmei bamv tei zauc puni, kumna suhmei bamv khou naimei meic-hiw tei mphwan e thei khatni suhmei tei gidi lungc nganv suc e thei hei tei mphaanhmei ravpuat di the twna laa nina e kumna amuh tei rui mipu ta tei nthan makmei di the twna kauc pat puni. 4Kum e tiki kazanc tei mphwan sini suhmei tei gidi khou na kumlana kahiw tei mphwan mak tw e thei amuh tei rui kata zaeng chanei karana ta tibam puni. 5Zaeng chanei nungc amuh tei rui zauc dat lana hei tei si mbu mak ge thei thu, zaeng chanei karana ta tibam dat puni he. 6Amuh tei rui zaeng chaneimei nungc zauc dat lana gay maih e thei khatni paengv patmei tuang maek ge thei, amuh tei rui kata nthan the twna kauc pat puni. Hei tei asuh tina e. Mipu tei kaphey sou datna kariak khou kamei nthan dat puni. 7Amuh tei rui zauc lana nthan the twna saloumei tangv tei, suhmei paengv pat dat re thei, kamei amuh khou guangna lyan dat nina e. 8Amuh tei rui kata zauc dat pwkhou hei tei paengv pat re thei, amuh tei rui kata tei nthan mak khe twna kauc pat puni the, hei tei mphaanh pat nuhmei ravpuat di the.
9Thowkumhmei naengv nuhmei gih ravpuat naimei kathuicna ta tei amuh khou phungc guang nina e. 10Amuh tei rui kata tei zauc puni. Kagic tei mphwanna puamc e thei khatni kahiw tei mphwan dat re thei, katiat nai e thei, 11hei tei tingsaenghmei gih tuang ravpuat re. Amuh tei rui kata tei nthan mak khe twna kauc patlou puni the. Kata tei karana ta louna zauc bam dat khang kage maek khe. 12Kagic ravpuat tei paengv patna kapy khou rui katan nganv padik pat re thei 13amuh tei rui kata tei zauc dat puni. Kumna kamei tei kapumc pwm lik ngam the twmei thay e thei thu, amuh tei rui kata tei nthanmei de twna kauc pat puni the. Kalam thu kapumc pwm tei mphwan ngam dat re thei kamei tei nthan de. 14Kum e tiki sw pat dat re thei thu kamei tei nthan mak puni the. 15Amuh rui kata zauc dat lana suc pat datmei ta how e thei thu, amuh tei rui kata tei nthan makmei e twna kauc patlou puni. Suc pat datmei tei rui lyanmei thu hei tei naengv nuhmei tuang e twmei tuang e, kumhpui zaeng rui kamei tei mphuam the. 16Kum e tiki kazam tei gay datna hei tei mphwan dat kan e thei, mipu tei amuh khou tei guang dat nina e. 17Amuh tei rui zauc pwkhou kazam tei mphwan dat kan e thei, amuh tei rui kata tei nthan the twna kauc patlou puni.
18Thowkumhmei rui asuh sucna gay datmei zam khou tei 19mphwanmei puamhmei hamh e thei haengc sih sina mphwanmei pat re thei kamei rui amuh khou tei tat nina e. 20Amuh tei rui zauc pwkhou suhmei tei gidi lungc thangc e thei khatni kahiw tei mphwan e thei amuh tei rui kata tei nthan makmei twna kauc pat puni. Mi hei asuh khou rui patmei naengv nuhmei ravpuat the. 21Amuh tei rui hei tei zauc pwkhou mi khou naimei hiw guay tei mphwan mak, suhmei tei gidi lungc gut mak, khatni hei tei mphwan tw e thei amuh tei rui kata zaeng chanei khang karana ta lou puni. 22Suhmei tei paengv patna, amuh tei rui kata tei nthan makmei di the twna kaucpatlou e thei, hei tei naengvmei tuang ravpuat di the. 23Hei tei paengv pat thuai makna kumna bam e thei, hei tei achinh de, kumna amuh tei rui kata tei nthanmei de twna kauc patlou puni.
24Thowkumhmei khou mai rawmei zam khou tei mphwan pat re thei hamh e thei haengc nnau nyanh nyan pat re thei, 25amuh tei rui kata tei zauc puni. Kazam khou naimei hiw guay tei mphwan pat re thei khatni hei tei gidi lungc thangc suc gut re thei, hei tei mai zam khou rui patmei naengv nuhmei ravpuat the, kumna amuh rui kata tei nthan makmei e twna kauc patlou puni. 26Kum e tiki kahiw tei mphwan pat mak, khatni gidi lungc suc gut mak, tiki kazam tei ndav maih tw e thei amuh tei rui kata tei zaeng chanei karana ta tibam puni. 27Amuh tei rui zaeng chaneimei nungc zauc dat puni. Khoutei kazam tei paengv pat re thei naengv nuhmei ravpuat re, kumna amuh tei rui kata tei nthan makmei twna kauc patlou puni. 28Kum e tiki hei tei kalaic thuai mak khatni paengv pat thuai mak ge thei hei tei naengv nuhmei ravpuat hamh e. Amuh tei rui kata nthanmei de twna kauc patlou puni, kalam thu hei tei mai rawmei tuang achinh na de.
29Thowkumhmei ntumei pwni, nggaanvmei pwni kapy khou hamh e thei kabiangc khou suh pat re thei 30amuh rui hei tei zauc puni. Hei tei gidi lungc gut tangc e thei khatni mi khou tei naimei hiw guay tei nzinhna nsu e thei, hei tei naengvmei tuang the, kumna amuh rui kata tei nthan makmei e twna kauc pat puni. 31Amuh tei rui kata zauc pwkhou suhmei tei gidi khou na e thei kumc e tiki mi khou naimei hiw guay ta thu kara sina how e thei, kata tei zaeng chanei lou langc puni. 32Zaeng chaneimei nungc amuh tei rui zauc dat puni, kumna hei tei paengv pat mak ge thei, khoutei naimei hiw tei nzinh mak ge thei khatni hei tei gidi khou na kumc e thei, 33suhmei daeng guay tei guat ganc puni. Mi tangv tei kata tei zaeng chanei karana ta ganclou dat puni. 34Mi tangv zaeng chaneimei nungc amuh tei rui hei tei zauc dat puni, kumna hei tei paengv pat mak ge thei, khatni gidi khou na kumc e thei, amuh tei rui kata tei nthanmei de twna kauc pat puni. Mipu tei kaphey kabaan sou nthan lana nthanmei sw dat puni. 35Kum e tiki kamei nthan de twna kauc patloumei tangv suhmei tei paengv pat dat re thei, 36amuh tei rui kata tei zauc dat puni. Kazam tei paengv pat dat re thei thu, kahiw nzinhmei ta phu dat bam khang kage maek khe; kamei tei nthan makmei di the. 37Kum e tiki amuh tei rui zauc pwkhou kazam tei paengv pat mak ge thei khatni khou tei thau bammei hiw guay tei miw mak ge thei, kazam tei gay dat tina the. Kumna amuh tei rui kamei tei nthan de twna kauc pat puni.
38Thowkumhmei ntumei, nggaanvmei khou kagic khou mphwan patmei tuang bamv nai e thei, 39amuh rui kata tei zauc puni. Hei tei mphwan nziuh thuth thut re thei, hei tei meicgic nziuh patmei tuang de; kumna kamei tei nthan de.
40Thow pwni kapy khou rui kasam keypui mei tei kapy kymeipu e tiki kamei nthan de. 41Kasan piangc ruc khou rui keymei bamv puni kamei tei kapy kymei de khatni nthanmei de. 42Kum e tiki kymei bamv khoutei haengc sih simei mphwanmei ramhkhat how pat re thei hei tei naengv nuhmei ravpuat re. 43Kumna amuh rui kata zauc pwkhou haengc sih simei mphwanmei tuang nai e thei 44amuh tei rui kata tei nthan makmei the twna kauc patlou puni, kalam thu kapy khou naengv nuhmei ravpuat nai the.
45Hei kumhmei naengv nuhmei ravpuat phunghmei nunc hei pheybaan kaekmei piuna, kasam zay makna, kazaw kabangc langv tei gumbin lana “Nthan makmei, Nthan makmei!” twna kaucna tat nina e. 46Mi tuang ravpuat tei kakhou nai saanv kamei tei nthan makmei sw puni kumna kamei tei raengh paengc thangc lungcna charuangc khou rui ducna bam nina e.
Puatc khou Samhtowmei
47Ramh hiw tuang hamh e thei linen tuang pheybaan khou, 48hamh e thei guaihgic tuang puat khou samhtowmei tuang nai e thei, 49hei tei ndiakc ge thei hamh e thei haengc e thei, hei tei naengv nuhmei tuang samh the kumhpui zaeng rui hei tei amuh khou guang lyan nina e. 50Amuh tei rui hei tei zauc lana mi puat tei zaeng chanei lou baicna lou nina e. 51Amuh tei rui hei tei zaeng chaneimei nungc zauc dat pwkhou, samh tei daic pat re thei, mi puat tei nthan mak khe. 52Amuh tei rui hei tei mai ntei nina e, kalam thu hei tei paengv patmei samh towmei e, kumna hei tei mai ntei ganc nina e.
53Kum e tiki, amuh tei rui hei tei zauc pwkhou, samh tei mi puat khou tei paengv pat kadai tuang maek ge thei, 54hei tei souna zaeng chanei lou baicna lou o twna latdanv pat puni. 55Kumna amuh rui zauc dat pwkhou hei tei paengv pat kadai mak sini karing tei kalaic mak ge thei, hei tei nthan mak ge; samhtowmei tei thei biak bam pwni hu biak bam pwni mi puat tei mai ntei ganc rap nina di the. 56Kum e tiki amuh tei rui hei tei zauc dat pwkhou, samh tei kamv key e thei, mi samhtowmei langv tei siat ganc puni. 57Mi tangv tei samh tei tow datna paengv pat re thei kakaipouc rui mi puat tei mai ntei ganc rap nina the. 58Kamei mi puat tei sou tina samh tei amaan kan e thei, kamei rui mi puat tei sou dat kaluaihna hei tei kariak theilayna nthan dat puni.
59Mi hei ramh hiw tuang hamh e thei linen tuang pheybaan hamh e thei guaihgic tuang puat khou samhtowmei khou sw nimei riak ge.
Currently Selected:
LEVITHOUC 13: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
