LEVITHOUC 15
15
Khurou khou rui Mphuammei Tatmei
1 Ringhpouc rui Mousi khatni Aron khou kumna sa the. 2Isaraelmei guay khou sa o: Nggaanvmei tuang khurou khou rui patmei tei nthan makmei e. 3Hei tei pat nthaekc pwni nthaekc makna pat bam pwni hei tei rui kata sw tanac the. 4Kamei rui dungcloumei khatni ziploumei laeng tei mphuam the. 5Katuang laeng tei kahipui mei tei 6hamh e thei kamei rui dungcloumei bamv khou dungcloupui mei tei kaphey kabaan souna duilow nina e kumna kamei tei tingzyn nganvna nthan mak ge. 7Mipu ta tei kahiloupui mei tei kaphey kabaan souna, duilow nina e, kumna kamei tei tingzyn nganvna nthan mak ge. 8Thowkumhmei mphuam makmei akhat khou mi kumhmeipu tei rui teih nsuklou e thei, kamei tei kaphey kabaan souna duilow nina e, kumna kamei tei tingzyn nganv nthan mak ge. 9Kumhmeipu tei rui dungcloumei bamv khatni takuanh bamv kaguayna tei mphuam e. 10Mi kumhmeipu tei rui dungcloumei bamv ta tei kahipui mei tei tingzyn nganvna nthan mak ge. Kamei rui dungcloumei bamv tei puanhpui mei tei kaphey kabaan souna duilow nina e, kumna kamei tingzyn nganv nthan mak ge. 11Hei kumhmei tatpui mei tei kabaanc khiu dat makna meic gaanv khat ta kahilou e thei kahiloupui mei tei kaphey kabaan sou datna duilow nina e, kumna kamei tei tingzyn nganvna nthan mak ge. 12Kamei rui kahiloumei taniang lai guay tei swbak nina e khatni thing tuang kuak guay tei khiu dat nina e.
13Mipu tei karavpuat khou tei rui gay dat re thei zaeng chanei nkhwanna mi tangv tei kaphey kabaan souna, luanghmei duithan khou lou nina e, kum e thei kamei nthan dat puni. 14Zaeng tachatpui nungc aphina kanei hamh e thei akhouhna kanei phungcna Ringhpouc tuang kalummei pheykai chaengmun khou amuh khou tei guang nina e. 15Amuh tei rui akhat tei paapc khang khaeng puni, kumna akhat rui rawna khaeng puni. Heikumna amuh tei rui kata sw nthanloumei tuang thouc tei swlou puni.
16Nggaanvmei akhat khou khurou dui tei tat re thei, kamei tei duilow nina e, kumna tingzyn nganvna nthan makna bam puni. 17Phey pwni, guaihgic tuang puat pwni mi khou tei mphuammei keylou e thei kahiloumei puat tei sou dat nina e, kumna tingzyn nganvna hei tei nthan makmei e. 18Ntumei lev nggaanvmei tei tatloumei tangv duilow dat nina e, kumna kaney tei tingzyn nganvna nthan mak ge.
19Ntumei akhat rui bwchaeng tat re thei, zaeng chanei kamei nthan mak puni. Kumhmeipui ta tei kahiloupui mei tei tingzyn nganvna nthan mak ge. 20Mi ganv khou tei kamei rui dungcloumei khatni ziploumei puat guay tei nthan mak ge. 21Thow pwni kalaeng kahilou e thei kaphey kabaan souna khatni duilow nina e, kumna tingzyn nganvna nthan makmei e. 22Thow pwni kamei rui dungcloumei puat ta kahi e thei kaphey kabaan souna khatni duilow nina e, kumna tingzyn nganvna nthan makmei e. 23Zy laeng pwni hamh e thei kamei rui dungcloumei bamv pwni, kahiloupui mei tei tingzyn nganvna nthan makmei e. 24Hei kumhmei bwchaeng tat bammeipui khou tatloumeipu tei mipui tuang mphuammei dam tei kamei laa the, kumna kamei tei zaeng chanei nthan makna bam puni. Mipu tei rui ziploumei laeng tei ni nthan mak khe.
25Ntumei akhat rui kamei bwchaeng tatmei tei hamhna zei tat re thei kamei zei tat bam saanv tei bwchaeng tatmei ganv khou mphuammei tei kumcna mphuam puni. 26Mi ganv khou tei kamei rui dungcloumei dungbamv khatni ziploumei laeng tei mphuam the. 27Hei tei kahiloumei kathuic tei mphuam the. Kumna kamei tei kaphey kabaan souna duilow nina e, kumna tingzyn nganvna kamei tei nthan mak ge. 28Hei tei tat taanmei tangv kamei zaeng chanei nkhwan nina e, kum e thei kamei nthan dat the. 29Zaeng tachatmei nungc kamei rui akhouhna kanei hamh e thei aphyna kanei phungcna amuh daeng khou Ringhpouc tuang kalummei pheykai kaimun khou tei guang nina e. 30Amuh tei rui aphyna akhat tei paapc khang khaeng puni, kumna akhat tei rui rawna khaeng puni. Mi kumcna amuh rui kata sw nthanloumei tuang thouc tei swlou puni.
31Isaraelmei nunc kaniw tuang zypui kailuangc laa khou naimei Ringhpouc tuang pheykai tei sw mphuamlouna theihmei pat mak khang rui Isaraelmei nunc tei nthanmei khatni mphuammei lam khou ramhthay khang sa o twna Ringhpouc rui Mousi khou sa the.
32Mi hei nggaanvmei akhat rui khurou dui hamh e thei kapumc khou rui mphuammei dui tatmei ganv khou, 33ntumei bwchaeng tatmei, khatni ntumei mphuammei ganv khou tatloumei mi kumhmei tuang lam khou dincloumei tuang the.
Currently Selected:
LEVITHOUC 15: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
