JOEL 3
3
Ravguangc rui Zaatc nunc ta Latzan Sw puni
1 Ringhpouc rui sa e,
“Mi ganv kiu ai rui Juda khatni Jerusalem ta tilungcgay chingkhiuhlou dat puni.
2Ai rui zaatc guay ta Latzan nzaengc khou khuam guang kaduai puni.
Khoutei ai rui kaniw ta latzan sw puni the kaniw rui amei nunc ruc khou taanclou kanmei taanv guay tuang latzan sw puni the.
Kaniw rui Isaraelmei ta gindic thangc zayphaklou the kumna Isaraelmei,
akandih ta nzanh phaklou the.
3Kaniw san zaucna amei nunc ta laa the.
Kaniw rui amei ntumeinac khatni nggaanvmeinac
nunc ta mangcsangmei khang khatni zouh khang zuanc the.
4“He Tur, Sidon khatni Philistin tuang ramv guay, nangniw akhou tabui tuang swlou khang sa bam tu cho? Nangniw ata khwm khangc niina sw bam tu cho? Nangniw rui kum bam e thei, ai rui nangniw khang katumcna khangclou puni!#Isa 23.1-18; Eze 26.1—28.26; Amo 1.9,10; Zek 9.1-4#Isa 14.29-31; Jer 47.1-7; Eze 25.15-17 5Nangniw rui atuang daandi khatni kachaekc laa kan the khatni atuang geihmei lanv nangniw tuang Ravkai thangc phungc tat kan the. 6Nangniw rui Juda khatni Jerusalemmei nunc ta kaniw kandic khou rui ducna phungc tatna Grikmei nunc khou zuanclou the. 7Kaniw ta nangniw rui zuancloumei bamv khou tei rui nduangh pat dat puni the. Nangniw rui kaniw ruc khou taancloumei tei ai rui nangniw ruc khou taanclou dat puni the. 8Ai rui nangniw nac mpouh aluh nunc ta Judamei nunc khou tizuanclou puni the; kumna kaniw rui kaniw ta duh thangc bammei Sabeanmei nunc khou zuanclou puni the. Ringhpouc ai rui samei tuang e.
9“Mi lat hei meic nunc khou kauc ndauh pat tho:
‘Rih khang chamdaanv tho;
rihmei nunc ta kabai tho;
nangniw tuang ricmei guay ta khuam kaduaina lwan gut tho!
10Nangniw tuang phu-baeng guay tei buy-baeng khang dy tho.
Suan simei nganvna adow puni the.#Isa 2.4; Mai 4.3
11Katumcna guang tho,
lungc nkuay bammei zaat nuncle,
kumna nzaengcbaek khou guang kaduai tho.’ ”
He Ringhpouc, kaniw ta adow khang nang tuang ricmei nunc thouc keylou o.
12“Zaatc nunc tei chamdaanv lana
Latzan nzaengc khou guang nina the.
Khoutei Ringhpouc ai rui lungc nkuay bammei zaat nunc ta latzan sw puni the.
13Kaniw tei mpeyna meicgay mak khe;
lautay kumc kaniw ta tay key tho;
drakhathai ta kadui kakhunc luangc lyam mak saanv nii kumc nii key tho.”#Nda 14.14-16; Nda 14.19,20; 19.15
14Latzan nzaengc khou aching aching bam the.
Kalam thu Ringhpouc tuang latzan tingmik kiu katumcna guang puni the.
15Bw lev neih zingc the,
khatni gaanchuangcna guay gaanc taan the.
Ravguangc rui Kamei nunc ta Suaihiamlou Puni
16 Ringhpouc Zaion Chyng khou rui
kamang rah kumc rah pat the;
Jerusalem khou rui ganh key kumc kauc pat the;
tingpuk kandih kadunh the.
Tiki kamei rui kamei nunc ta dinggaeklou puni.#Amo 1.2
17“Hei khou kiu, he Isaraelmeile,
ai hei nangniw tuang Ringhpouc
Ravguangc e twmei nangniw thay puni.
Ai hei atuang nthanmei Zaion Chyng khou bam e.
Jerusalem hei nthanmei kaidai sw puni;
kumna gin nunc rui mi ti hei laa dat zat lak khe.
18“Mi ganv khou kiu luanghbut guay hei drakhalau rui padik puni the, khatni chyngbut
kathuicna khou guaih bangh rui padik puni the;
Juda tuang duithuak kathuicna hei dui rui luangc padik puni the.
Ringhpouc tuang Ravkai khou rui duithuak akhat luangc pat puni,
kumna hei tei rui Akasia nzaengc khang dui tiilou puni.
19“Izip hei sypungramv sw puni,
khatni Edom hei meiclungc
taekna gancloumei dic sw puni,
kalam thu kaniw rui Juda kandic ta adowna kakhuay maekmei nunc ta swluai the.
20Tiki Juda tei tingsaengzaeng naibam puni,
kumna Jerusalem rui kin kathuic nai bam puni.
21Kaniw tuang zei tuang khuay sw
nthanlou kan makmei tei sw nthanlou puni,
kalam thu Ringhpouc Zaion khou bam e.”
Currently Selected:
JOEL 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
