JOEL 2
2
Alunkav Guang Pu The
1Bianggun amuan tho;
Ravguangc tuang nthanmei
chyng Zaion khou rihsaan tho.
Ping kadunh tho, he Judamei nunc!
Ringhpouc tuang latzan tingmik hei katumcna guang pw the.
2Hei tei zinghmei tingmik puni the,
muangh guam zingh zingmei tingmik puni the.
Nkav ricmei kangdai muangh guam kumc luanghbut guay
ruc khou guam zingh zing guang pw the.
Mi kumhmei hei guang zat kan mak he,
guang ni guang dat zat ni tuang hamh the.
3Mai rui kaniw thei hu ramhbang guay tu ngam the.
Kaniw hu khou Eden pikwan kumc bammei ramv tei kaniw thei thangc karaeng sypungramv kumc the.
Kaniw khou rui ramh khatna sini duak dat ngam mak khe.
4Kaniw tei takuanh pang kumc the,
rih takuanc nunc pak pat kumc pak the.#Nda 9.7-9
5Kaniw rui chyngtwan guay khou tei
kachakmei khwan tei takuanh gari khwan kumc the;
kaniw khwan tei phuaithingding
ramhac mai khwan kumc the.
Rihmei kangdai rui rih aphian khang ding adangv bam kumc kaniw tei ding adangv bam the.
6Kaniw hu khou meic guayna ping the;
meic kathuicna zaw ndavdyan dian the.
7Kaniw tei rihmei nunc adow gut kumc adow gut the;
rihmei nunc raengh nzaekc gut kumc nzaekc gut the.
kaniw tei nzutphutna lwan guang pw the kaniw chaeng mbiangh dat mak khe.
8Kaniw khat khat chaeng khou ni tat kagak mak ge.
Kaniw rihlin bamv guay guangc kaan guang pw the,
ramhkhat na rui sini kaniw ta thingc dat ngam mak khe.
9Kaniw kaidai ta tamcna guang pw the;
kaniw raengh ruc khou pak ku the;
kainam khou ni pak ku the kaihouhmei kumc pwankaimun khou rui ni pak gut the.
10Kaniw hu khou kandih kanukc the;
tingpuk ni kadunh the.#Nda 8.12
bw lev neih ni zingckey the,
gaanchuangcna guay ni gaanc taan the.
11 Ringhpouc tuang latzan tingmik hei
adihkamv meicpingmei tingmik cho!
thow rui hei tei khaengv ngam nina cho?#Nda 6.17
Lunglaih khang Kawmei
12 Ringhpouc rui sa e,
“Ntaw sini nangniw lungsyng khou rui lunghlaicna,
munthiangcna, kapna akhou hancguang dat ro.
13Nangniw lung bakkeyna lunghlaic tho;
nangniw tuang phey siatkaek
bammei na tei rui biuh mak ge.”
Ringhpouc nangniw
Racguangc khou hancguang dat ro,
kamei hei zauzian thay e khatni nzianmei rui padik ge,
kamei hei akhaengvsaengc e
khatni kalatdanv suai mak ge;
kamei hei dandi tii makna
kuaklou khang nkhwanna bam e.
14 Ringhpouc nangniw Racguangc
kalung kalaih dat lana nap-bi
thuihna suaihiamlou dat pwng e.
Kum pwkhou nangniw kakhang nap-bi khatni
drakhadui kat dat ngam pwng e.
15Zaion Chyng khou bianggun amuan tho;
munthiangh khang latdanv pat tho kumna meic nunc ta kaw kaduai guang tho!
16Meic nunc ta khuam kariu tho;
meic nunc ta tei sw nthan tho;
gaanvthaih nunc ta kaw guang tho;
alauc nunc ta khuam kaduai tho
ngasatna nunc ta nganv khuam guang tho.
Nowkaw chanahmei nowpuc nunc ni kaniw kai ganclouna guang nina e.
17Ravchavpaeng lev Ravkai chaengmun kak khou
thouh sw bammei amuh nunc ni,
“Ringhpouc,
nang mei nunc ruc khou zauc nzianlou o.
Zaatc baihmei nunc rui aniw ta malana,
‘nangniw Racguangc tabui thangc tat kanna cho?’
twna tisinnuilou rio,” twna kapna kalum nina the.
Ravguangc rui Phunling Tithuihlou datmei
18Khoutei Ravguangc rui
kakandih khang lunghsuhlou dat the;
kamei nunc ta zauc nzianlou dat the.
19Kamei rui kaniw khou dawlou the:
“Ntaw thu ai rui nangniw khang nap-bi,
drakhadui khatni Olive thauc tiilou dat puni the,
kum pwkhou nangniw nggu dat puni the.
Zaatc baihmei rui nangniw ta mala dat pw lak khe.
20Dihpy thangc rui keymei ta tei
ai rui laa ganc puni the,
kumna asaekc ta sypungramv khou alay ganclou puni the.
Humei kang ta Theihmei duipui khou alay ganclou puni,
nkhamhmei kang ta
Mediterranean duipui khou alay ganclou puni.
kaniw taam rimc namh puni the.
Ai rui kaniw ta swmaan puni the kaniw rui nangniw khou taanclou kanmei guay zaeng rui.
21“He kandihle, ping ri tho neihla tho zaenggay tho,
Ringhpouc rui nangniw khang taanvdaih taanclou the.
22Nwmbangc khouringc nunc, ping ri tho.
nangniw bynbamv guay ndiakc the;
thingbang guay kathai nthai the,
kumna tadutthai khatni drakhathai nthai padik the.
23“Neihla tho, he Zaionmei nuncle,
Ringhpouc nangniw Racguangc rui
nangniw khang taanclou kanmei khang tei rui neihla tho.
Kahu nungc kumc kamei rui nangniw khang chakaan ting kabiuh tii keylou the,
tingsei ting ni bun keylou the,
tinglwm ting ni riu keylou the.
24Laudybamv guay tei nap rui padik puni the;
drakhathai niimei khunc daeng tei kadui luangclyam bah ba bam puni.
Olive thauc takmei khunc tei
Olive thauc luangclyam bam puni.
25Nkav pang rui nangniw tuang nap-bi
tu ngam kanmei kumc nangniw amaan kanmei zu tei
ai rui nangniw khang tiilou dat puni.
Mi rihmei nunc tei nangniw khou tii guangmei tei ai rui e.
26Ntaw thu mphamh mphahna tuzangv ngguna lungc dat puni the.
Nangniw rui Ringhpouc nangniw Racguangc,
nangniw khang charynmei taanv taancloumeipu ta nangniw thuanc dat puni the.
Amei nunc ta mala dat zat pu lak khe.
27Hei khou kiu, he Isaraelmeile,
ai nangniw pang khou bam e,
Ringhpouc ai hei nangniw Racguangc e,
ai hamhna rav baihmei maek ge twmei nangniw thay puni.
Amei nunc ta mala dat zat lak khe.
Ringhpouc tuang Tingmik
28“Nkhamh khou ai rui abumaengc meic kathuicna khou bunkeylou puni;
nangniw nac mpouh aluh nunc rui alat dinc pat puni;
gaanvthaih nunc rui mang manv puni,
khatni chabwan nunc ndawman manv puni.
29Mi nungc kiu ai rui banghpui banghpu khou nganvna abumaengc bunkeylou puni.
30“Mi tingmik kiu madanh khang ai rui tingpuk khou khatni kandih khou charynmei tuang tipat puni;
zeimiw zeihaeng,
mai khatni maikhou muangh tiangc kumc pat puni.
31Mi daihmei meicpingmei Ringhpouc tuang latzan tingmik kiu guang nimei hu khou neihmik zingc kan puni,
bw tei zei kumcna haengc puni.#Met 24.29; Mrk 13.24,25; Luk 21.25; Nda 6.12,13
32Kum e tiki nkhavlou khang Ringhpouc ta kawmei guay ta kanlou puni.
Kalam thu Jerusalem khou bammei gaanvsaekc duak puni;
ai rui kapahloumei nunc ringc puni’ twna
Ringhpouc rui sa kan the.’ ”#Lat 2.17-21 #Rom 10.13
Currently Selected:
JOEL 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
