JOEL 1
1
1Mi hei Pethuel nac mpouh Joel khou tii guangmei Ravguangc tuang lat re.
Nap-bi Swkasic Ngammei khang Kapmei
2Mi hei nking o, he gaanvthaih nunc;
Juda khou bammei kathuicna, nking o.
Mi kumhmei nangniw zuk khou pwni nangniw pupouc zuk khou pwni pat kan the cho?
3Mi hei nangniw nac nunc khou raclou tio;
kaniw rui kaniw nac nunc khou rac kadailou kan diu o.
Kaniw nac nunc ni kaniw nac nunc khou raclou kadai kan diu o.
4Nap nkav pang rui tu nsaekcloumei tei pyzinpui pang rui tu kan the;
pyzinpui pang rui tu nsaekcloumei tei pyzinpui naw rui tu kan the;
pyzinpui nau rui tu nsaekcloumei tei baihmei nkav rui tu kan the.
5Zipthauna kap tho, he zouh zangv mbamei nunc;
kaucna kap tho, zouh zangvmei nunc,
zouh thanh kasiamh nimei
drakha thai guay tei sw kasic ngam the.
6Nkav ricmei rui aniw kandic ta adow the;
kaniw tei pumtan tanc e
khatni kasing chak ngam thay lak ge;
kaniw nei tei kamang nei kumc ntuk ge.#1 Ko 15.55
7Kaniw rui aniw tuang drakha bang guay tu mut ngam the khatni aniw tuang tadut bang guay nchupc mut ngam the.
Kaniw rui thing gi guay tac tu ngam the,
kachy guay tac mphwan phum ngam the.
8Tunacpui rui khamthanloumei gaanv ta theic ntamvna kapmei kumc kap tho,
meic nuncle.
9Ravkai khou katlou khang nap-bi maek khe,
drakhadui ni maek khe;
Ringhpouc khang katlou khang ramh maekna amuh nunc ni huayna kap the.
10Laupuk guay tei karaeng di the;
nap-bi guay swmut ngam the,
drakha bang guay kangc ngam the,
Olive bang guay ni
ngguaih ngam the kandih rui zaengsina kap the.
11Zaengsina kap tho,
he lau taanhmeithiule;
latluna kap tho, drakhalau ruaihmei nuncle,
gehu ni sipian ni,
ngguay, phunling kaguayna sw kamut kamai ngam the.
12Ngguaihkey ngam the puc-heithai,
tadanv khatni appal bang,
laupuk tingthai bang guay;
tingthai bang guay theic ngam the.
Meic nunc tuang neihlamei maek khe.
13Ravchapaeng khou thouh swbammei amuh nunc,
zaengsiphey piuna kap tho!
Ravkai thangc tatna
zingbangc saanvsaengh kapna huay tho!
Nang Racguangc khang katlou khang nap ni drakhadui ni maek khe.
14Munthiangh khang latdanv pat ti tho;
charuangcdai kaw kaduai tho,
gaanvthaih guay ta kaw kaduai tho Judamei meic kaguay ta ni kaw guang tho,
Ringhpouc aniu Ravguangc tuang
Ravkai khou guangna kakhou kaplou tho.
15 Ringhpouc tuang latzan tingmik hei ana the;
Ngamparymeipu rui sw kamut kamaimei tiguang nimei tingmik ana the.
Mi tingmik kiu adihkamv meicpingmei tingmik puni cho!#Isa 13.6
16Aniu hu khou rui aniu tuang
nap-bi sw kasic karouc key kan the.
Aniu Racguangc kai khou neihlamei maek khe.
17Kandih kanghmei khou
phunling thw guay theic ngam the.
Saamh khou phungclou khang nap-bi maek khe,
saamh raeng guay tei raam ngam the.
18Guaih-bangh guay ni ndaapcna rah the,
kaniw taek tuloumei bamv maek khe;
lauziu guay ni ryanra the.
19Ai rui Ringhpouc,
nang khou kapna huay e,
kalam thu guaihbyn khatni thingbang guay
mai raw kumc kykaengv ngam the.
20Nwmbangc khouringc nunc rui nganvna nang khou kapna huay e kalam thu duithuak guay kangc ngam the.
Currently Selected:
JOEL 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
