HOSEA 14
14
Hosea rui Isaraelmei ta Huaymei
1He Isaraelmei nunc, Ringhpouc nangniw Racguangc khou hanc guang tho. Nangniw tuang paap rui nangniw ta phay tisuy the khatni tibow the. 2Ringhpouc khou hanc guang dat ro, khatni heikumna huayneymei hei rui kakhou nangniw tuang puatkat sw o: “He Ringhpouc, aniw tuang paap kaguayna kuaklou o kumna aniw rui huayneymei laalou o, kum pwkhou aniw rui nrianhlou kanmei kumcna aniw nang ta thuanc puni. 3Asiriamei rui aniw ta kanlou ngam lak ge, khatni rih tuang takuanc nunc rui aniw ta gaeklou ngam lak ge. Aniw tuang ravmaengc guay ta tei aniw tuang rav nunc e twna sa dat lak khe. He Ringhpouc, tatloupui bamv baihmei maekmei aniw ta nang rui zauc nzianlou e.”
Ringhpouc rui Isaraelmei khang Panty Thanh Nrianhloumei
4 Ringhpouc rui sa e,
“Amei nunc tuang lwmnuh makmei lung ti hei ai rui tigaylou puni.
Ai alung kapwm rui kaniw ta nzian dat puni;
ai kaniw ta lunghpuamc bam dat lak khe.
5Ai hei Isaraelmei nunc khang phuimei dic khou keymei zikdui kumcna kamei hei lilypwang kumc puangc puni the;
kaniw tei kamaan ntipna zangc bam puni the
Lebanon tuang thingbang kumcna.
6Kaniw bwan thanh bwanna ringc bam puni,
khatni Olive bang kumc how gay puni,
kaniw rym tei Lebanon tuang sidar thing rym kumc namhgay puni the.
7Kaniw ai rui gaekloumei bangc khou lungc bam dat puni.
Kaniw tei nap bang kalupmei kumc gay thau puni
khatni drakha pikwan kumc kathai nthai geic puni.
Lebanon tuang drakhadui zanc
dinhmei kumc kaniw zanc dinc puni.
8Isaraelmei nunc ravmaengc ta kahi dat lak khe;
ai rui kaniw tuang ravsuai dawlou puni;
khatni kaniw ta kadanlou puni;
ndiakc tanh tan bammei thingbang kumc ai rui kaniw ta aswng khou tiduplou puni;
suaihiam guay hei akhou rui e.”
Riauloumei
9Ningtyngmei kaguayna rui mi khou hyloumei hei kabah thay kan diu, khatni mi hei kaniw lung khou laalou kan diu. Ringhpouc tuang chaeng thu nchumh e, kumna ravchaptatmei nunc hei tei suicna ringc e, tiki paapc mei nunc thu mi khou tei phaysuyna bow e kalam thu kaniw mi guay tei thouh sw mak ge.
Currently Selected:
HOSEA 14: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
