JOB 42
42
1Khoutei Job rui Ringhpouc khou daw the.
Job
2He Ringhpouc, nang hei ramh katana Ngammeipu e;
nang rui taanc nii niimei guay tei taanc ngam e twmei ai thay e.
3Ai hei heidihkamv mpangna akumhna nang tuang ningting ta thanv bam tu cho twna nang rui sa the.
Ai rui kabah thay tangh makmei lat tei ai sa kan dyng the,
ai rui thay tangh ngam makmei lam tei sa kan the.#Job 38.2
4Nang rui samei nkingna thanv thanvmei daw o twna nang rui sa the.#Job 38.3
5Meic nunc rui akhou sa samei na tei ai thu thay bammei tuang de,
ntaw thu amik kahak rui nang ta how the.
6Kumna ai rui salou kanmei guay khang ai zak the khatni mbut louna lunghlaih the.
Luailoumei
7 Ringhpouc kamei rui Job khou sa tangna Temanimeipu Eliphaz khou sa dat the, “Ai rui nang ta khatni nang pam nei ta lunghpuamc e, kalam thu abangc Job kumcna nangniw thu alam khou nchumhna sa mak ge. 8Ntaw thu guaichic chanei khatni lauziuchic chanei Job daeng khou phungc guang tho kumna hei tei nangniw khang rui khaeng tho. Job rui nangniw khang huayneylou puni, kumna ai rui katuang ravsuai chulouna nangniw ta tizaklou lak khe. Kamei kumcna nangniw thu alam khou nchumhmei lat sa mak ge.”
9Eliphaz, Bildad khatni Zophar rui Ringhpouc rui kaniw khou samei tei taanc the, kumna Ringhpouc rui Job tuang ravsuai dawlou the.
10Job rui kachampanv nunc khang huayneylou tang pwkhou, Ringhpouc rui Job ta tilungcgay chingkhiuhlou datna kahunungc katuang nai bammei lanv khou tei rui kadam kanei mbuna tiilou dat the.#Job 1.1-3 11Job tuang chana nunc, katanpui nunc khatni kapam nunc kata guang zaucna kakai khou khumngai ngay nchamclou the. Ringhpouc rui karuc khou ryanramei tiguang kanmei khang kaniw lung kabiumei lyanlouna swmlou the. Kaniw kathuicna rui syan khatni kachaekc baanrwn tiilou the.
12 Ringhpouc rui Job khou kapanty reymei langv khou khang tei suangc kaneimei langv khou tei mbuna suaihiamlou the. Job tei lauziu 14,000, guaikuan 6000, guaih 2000 khatni kuanniam 1000 nruaih the. 13Kanac mpouh gaanv chanei khatni aluh gaanv thumh nai khwan e. 14Kamei rui aluh gaanvthaihmei zanc rui Jemima, kaneimei zanc rui Kezia khatni alaucliangmei zanc rui Keren Happuk twna kaw the. 15Job nac aluhpui nunc kumcna kalwn kachav gaymei kandih nam ruc khou maek khwan e. Kapu rui kaniw khang tei ni mpouh nunc khang tiimei tampy dam tiilou khwan e.
16Job mi tangv tei tingkwm 140 lungclou dat khwan e, katou katak howlou tangc khwan e. 17Kumna kamei gaanvthaih sihna theic khwan e.
Currently Selected:
JOB 42: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
