JOB 41
41
1Nang rui thaanngangc ta khavkhuay rui nym diwna cho,
hamh e thei kabaley ta riang rui nta diwna cho?#Kal 74.14; 104.26; Isa 27.1
2Nang rui kanukwang khou riang ntalou diwna cho,
hamh e thei kakhabaeng khou khavkhuay goulou diwna cho?
3Kata mpatlou o twna nang khou sa puni dai cho?
Kata zauc nzianlou o twna nang khou sa puni dai cho?
4Kamei rui nang khou gutlou puni dai cho khatni nang bangc sw ni the tu puni dai cho?
5Nang rui kata nruaihmei nruayna ta kumcna kariang ntalouna nang bangcpui tuang palupmei puat kumcna sw nuh puni dai cho?
6Achuanh nunc rui kata zuanc puni dai cho?
Lanvguanhmei nunc rui kazanc dimna zuanc puni dai cho?
7Nang rui kapy khou nruang rui biw ngam puni dai cho?
8Nang rui kata kahilou guai e thei tariakc dat bau pw lak khe;
heikumna akhangvloumei ram akhangv tei nang amuc dat pw lak khe.
9Thaanngangc ta howmei guay rui pingna kandih khou pun phuap key e.
10Kareic thau pwkhou kathei patmei tuang de;
meic gaanv khat na sini kahu khou ding bauh mak ge.
11Thow rui kata tariakclouna duak ngam nina cho?
maansei akhat na rui sini ntan bauh mak ge.
12Thaanngangc tan lam khou ai dinclou me,
kamei hei adih daic adih tanc cho twmei dinclou me.
13Kagic tei meic rui siatkaek ngam mak ge,
katuang rihpwan tei chum phou ngam mak ge.
14Kanei thau ngguic bammei meic pingmei mwang tei thow rui phaek pat ngam nina cho?
15Kanam tei nggih kumcna kasap kasap nsaplou e,
hei tei ntauh kumc tanc e.
16Khat khat khou nap ntipna naplouna samlu kaeng di na sini kalap maek ge.
17Kaguayna tei nap ntipna naplouna hei tei ramh akhat na rui sini thaek pat dat ngam mak khe.
18Kamei kathey pwkhou kariu pat re,
kamik tei neih kumc gaanc e.
19Kamwang khou rui maibwang pat re,
mai kiak kiak dui mphiu kumc pat re.
20Kanukwang khou rui maikhou mphiu pat re,
ntou maimangc khou rui khou patmei maikhou kumcna.
21Kathiu khou rui mai chuangc thau the;
kamwang khou rui maibwang chuangc pat the.
22Kapumtan hei kaguang khou nai e,
kumna kata ariwmei guay rui ping the.
23Kagic khou mbuaihmei bamv khat na sini maek ge;
hei tei ntanh kumc tanc e.
24Ntauh kumhmei kalung thw hei ntauh kumcna tanc e khou tei pingmei maek ge,
napriak tauc kumc tanc e.
25Kamei thau pwkhou, tancbauhmei nunc ni ping e;
kaniw swangmav maekna ping e.
26Kata dowluai nuhmei baengsaeng maek ge;
kata phian luai nuhmei buy ni maek ge.
27Kakhang thu ntanh hei napgou kumh tuang de,
khatni tanzinc hei thingraamv kumh tuang de.
28Kata nthau ganc nuhmei saucpai maek ge;
kata ntauh bang ndatmei hei napgung keylou kumh tuang na de.
29Kakhang thingdangv hei napgou kumc tuang de,
kata buy phian pwkhou kamei nuic e.
30Kabung lip guay tei lai kiak ntukmei kumc e,
guaihphu kumcna hei tei rui bih tei suakna tat re.
31Kamei rui duipui ta dui bat kumc kabuat thau e,
kumna hei tei thauh bat kumc kabuat thau e.
32Kachaenglwan tei duiphwan rui
mphwan phumh phum tat re,
kumna duipui ta duiphwan ti-mbaihlou e.
33Mi ti hei kida khang kandih khou ramh maek ge;
mi hei pingmei maekmei khouringc e.
34Liam siamh siammei khouringc guay ta sini kamei mala e;
kamei hei nwmbangc khouringc guay tuang guangc e.
Currently Selected:
JOB 41: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
