JOB 40
40
1 Ringhpouc rui Job khou sa the;
2Joble, nang rui Ngamparymei Racguangc ta khaengc the;
nang ntaw hei tei lou key ni ny, daw ni cho?
Job
3Mi tangv tei Job rui sa daw the;
4He Ringhpouc, ai hei mpangna sa kan dyng the.
Ai rui tabui daw ngam nina cho?
Ai ramhkhat na sini sa dat lak khe.
5Ai rui sa lak nimei ni sa mbu nlailou kan the.
6Khoutei pwanzingh khou rui Ringhpouc rui Job khou sa dat re.
Ringhpouc
7Nggaanvmei akhat kumcna dingthau tho,
kumna ai rui thanvmei hei daw tho.
8Ai hei nchumh mak ge twmei
lyan me twna nang sw bam tu cho—
ata ti-nkhuailouna nang
nchumhmei sw me twna sw bam tu cho?
9Nang kiu ai kumcna tancna cho?
Nang khwan tei akhwan kumc ganh key kumc diwna cho?
10Kum e tw e thei nang gaengh swna,
nang tik nang hym rui pheybaan swna dingthau tho.
11Daihlwn swmei nunc ta tei zauc lo;
nang lungpuam patna kaniw ta tei tiliulou ti tho.
12Ngguay, kaniw ta tei zauc lo kumna ti-ana key tho;
meicsimei nunc ta tei kaniw tuang dyng bamv khou rui swpuat paruat key tho.
13Kaniw ta kandih khou mphumhlou tho;
kaniw ta taruaih thangc bangclou tho.
14Kum pw e thei nang ta thuanc rey liang nimei kiu ai the khatni nang rana rui rih ngam tuang dyng e twmei ai nuh puni the.
15Dui guaipuang twmei khouringc ta tei zauc lo;
ai rui mi ta tei ni nang ta ni damcloumei tuang de.
Hei tei guaih kumcna thingnuy binc tu e.
16Tiki kapumc khou tei pumtan adih nai kan tu cho?
Katei khou tei pumtan azuh nai kan tu cho?
17Kamai tei sidar bang kumc ndyng e,
kanaeng thuat tei tanc e.
18Karou tei ntanh kumc,
khatni katan tei tanhlubungc kumc tanc e.
19Hei tei ai rui damcloumei khouringc pang khou charyn liangmei e!
Kata damhmeipu na rui kata ngam e.
20Khouringh khounah palup bammei chyng khou tei kataek khang ramh bwan thau e.
21Kamei sauhraengh bang phwam bangc khou zip be,
khatni ntou bang ding khou nkamh e.
22Sauhraengh bang khatni duikhuangc khou thaumei
tazung bang rui kaswng khou mi ta tei tiduplou e.
23Kathiu tancna phian keymei duithuat ta kamei ping mak ge;
Jordan dui rui kazaw khou mphiu tisini rup twmak ge.
24Thow rui kamik duamna nym ngam nina cho?
Thow rui mi ta tei nymna nariang lou ngam nina cho?
Currently Selected:
JOB 40: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
