JAKOB 4
4
1Nangniw pang khou suc-rih khatni agay agimei pat bammei hei tabui khou rui cho? Mi hei nangniw lungc khou adow bammei kahawmei khou tei rui hamh nah cho? 2Nangniw kahaw e, tiki laatow mak ge; kum tina nangniw meicdow the. Nangniw laa nii e, tiki laatow mak ge; kum tina nangniw agay agi the, khatni suc-rih sw the. Nangniw khang maek ge; kalam thu nangniw Ravguangc khou ney mak ge. 3Nangniw ney e tiki laatow mak ge; kalam thu hei tei nangniw rui kahawmei, simei khou sinsw khang ney the. 4Lwmnuh makmeithiu! Mbaanv ta rup swmei hei Ravguangc rui zauczihmei e twmei nangniw thay mak nah cho? Hei zaeng rui, thow pw ni mbaanv ta rupswpui mei tei, karana kata Ravguangc khang zauczihmei tiswlou the. 5“Kamei rui aniu khou tilungcloumei bumaengc khang, kamei mamavna kahaw ranv sih bam e,”#Kamei rui aniu khou tilungcloumei bumaengc khang kamei mamavna kahaw ranv sih bam e: hamh e thei Ravguangc rui aniu khou tilungcloumei bumaengh hei mamavna kahaw ranv sih bam e. twna nthanmei latrik rui samei hei nsa lat de twna nangniw ning nah cho? 6Tiki Ravguangc rui tiimei zauzian hei thu daic ranv di he. “Daihriw swmei ta Ravguangc nuh mak ge; tiki niamhmei ta suaihiamlou e,” twna nthanmei latrik rui sa e.#Lkd 3.34
7Hei zaeng rui, Ravguangc bangc bam o. Ravsic ta ndyangna akhangv o. Kum ti thei kamei nangniw khou rui pak kan puni. 8Ravguangc daeng ana guang o; kum e thei kamei nang daeng ana guang puni. Paapcmei nunc, nangniw baanc khiu nthan o; lungning kaneimei nunc, nangniw lungning sw nthan o. 9Nangniw lungkabiuna latluna kap bo. Nuihmei phaan kap bo; neihlamei phaan lungh ryanra o! 10Poubauhmei hu khou niamh key o. Kum e thei kamei rui nangniw ta zay kauh thaulou puni.
Khristian Makaamv Khat Khat ta Latzan Swmei
11Chanathiu, nangniw khat khat ta sakasicna sa rio. Thow pw ni kachana ta sa kasicmei hamh e thei latzan swmei kamei tei Riakdanv ta nuh makmei e khatni Riakdanv latzan sw tu e. Nangniw rui Riakdanv ta latzan sw e thei, nangniw Riakdanv piumei nunc hamh the; mi ta tei latzan swmei nunc di the. 12Riakdanv tiiloumeipu khatni latzanpouc thu Ravguangc na de. Kamei na rui kanlou ngam e khatni swmaan ngam e. Nangniw makaamv ta latzan sw khang nangniw thowna cho?
Thei Hu Kakhanh Thay o
13“Aseic hamh e thei nthuanh, mi kumh mi kumhmei kaidai thangc tingkwm akhat tat lana syan mpeyna ntaanv ni,” twna sa bammei nangniw mi hei nking o.#Lkd 27.1 14Nang panty khou nthuanh tabui pat puni cho twmei nangniw thay mak ge! Nangniw panty hei thu matak khat na chiclou lana maan kanmei muangluc na kumh tuang de. 15“Poubauhmei rui ningmei thei layna ringc bam e thei, mi hei hamh e thei hei tei taanc ni,”. twna nangniw sa ni tuang e. 16Tiki nangniw gaenghswna ramhkhe sw bam e. Mi hei kum lak nina e.
17Nchumhmei tei thayna taanh makmei tei paapc be.
Currently Selected:
JAKOB 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
