JAKOB 1
1
1Ravguangc khatni Poubauhmei Jisu Khrista bangc Jakob ai rui, ginramdic thangc lungc phak tat kanmei kaikhwang ruhna kanei khou hymei: dwan gay kady e.#Met 13.55; Lat 15.13; Gal 1.19
Lwmmei khatni Ningting
2Achanathiu, nchanvmei kazaat kazaat nangniw khou guang pwkhou sangaymei e twna neihla o. 3Kalam thu mi kumcna nangniw ramlum ta nchanvmei hei rui nangniw ta sw ntiplou e twmei nangniw thay e. 4Nangniw tuang khaengvthaymei tei kachanh dat makna khaengv suak go; kumna ramh gaat tuang maekna nthuihmei sw khang sw o. 5Tiki nangniw thowkumhmei khou ningting maek ge thei, neihlana tiilou punimeipu Ravguangc khou ney o; nzav tuang maekna tii puni. 6Kamei lwmsi tuang maekna, lwmna ney nina e. Lwmsipui mei tei thu duipui khou mpwan rui phungc pat phungc gut tat bammei dui luat tei kumh tuang de. 7-8Mi kumhpui mei, kachwn pat pat gut gut bampui mei, kalung kadyng ding makpui mei tei thu Poubauhmei khou rui ramhkhat sini laatow ni tu hamh e.
Lungcsimei khatni Lungcgaymei
9Lungcsimei Khristian chana tei kata Ravguangc rui zay kauh thauloumei khou tei neihla bam kan diu, 10khatni lungcgaymei Khristian chana tei Ravguangc rui kata ti-nthyam keyloumei khou tei kamei neihla bam kan diu. Kalam thu lungcgaymei tei puc pwang kumcna tuai nuangc kan ni de. 11Neih thiu tei mai kumc chaengc pat pwkhou, pucbwan guay tei ngguaih key kan the; kapwang guay tuai kan the; kumna karamgai maan kan the. Hei tei kumcna, lungcgaymeipu tei ni lanv ntaanvna ntaanvna tuai kan ni de.#Isa 40.6-7
Nchanvmei khatni Nthiammei
12Nchanvmei khou ding ngampui mei tei sangaymei e. Kalam thu Ravguangc rui kata nzianmei guay khang nrianhloumei swanpyrun—ringcsuangmei tei kamei laa puni. 13Nchanvna nthiammei guang pwkhou, “Mi nthiammei hei Ravguangc rui e,” twna sa lak nina e. Kalam thu Ravguangc ta thu simei taanh khang nthiam ngam mak ge; kamei rui ni meic gaanv khat na ta sini simei taanh khang nthiam mak ge. 14Tiki meic gaanv khat ta nthiammei hei kalung khou naimei kahawmei tei rui nthiam pat tuang e. 15Mi kumna kahawmei tei ngguam lana paapc puanc the, paapc tei daic thauna theihmei puanc the.
16Nzianmei chanathiu, nangniw ta tiguat rio. 17Gaymei khatni nthuihmei kaipat guay hei tingkauh thangc rui, bw neih, gaanchuangcna damcloumeipu, kalaic bammei sung rui tizingc dat makmeipu Ravguangc rui tii keymei kaipat re. 18Kamei rui aniu ta katuang nchumhmei lat tei rui, kamei rui ningmei thei layna puanclou the. Mi hei kamei rui damcloumei katana ruc khou aniu hei nthai rey liangmei thai sw khang e.
Chumei khatni Taanhmei
19Nzianmei chanathiu, mi hei ningtow o! Meic kathuicna chumei khou katumc o; tiki samei khou khatni lungh puamhmei khou nzaeng o. 20Kalam thu lungh puamhmei rui nchumhmei, Ravguangc rui ningmei taanc ngam mak ge. 21Hei zaeng rui, mphuammei lwnlung khatni simei kheiliak guay ganc o, kumna nangniw lung khou lingclou kanmei, nangniw ta kanlou nimei lat tei niamh keyna laalou o.
22Nangniw rana nangniw ta guatna lat tei chu nana taanh makmei sw rio. Mi guay tei piuna taanc o. 23Lat tei chu lana taanh makpui mei tei thu maengzau khou kazaw zauclouna taanmei tei kumh tuang de. 24Kamei kazaw zauclou lana tat pat dat kan e thei, kalwn akumh cho twmei kamei amuc dat the. 25Tiki thow pwni, meic nunc ta tinyngswloumei nthuihmei Ravguangc lat hei chakuth tancna kathai lana, hei tei thaylouna taanmei na hamhna, mi khou tei kalung gutlouna piu bampui mei ta tei kataanv guay khou tei Ravguangc rui suaihiamlou puni.
26Thowkumhmei rui kamei ravchaptatmei e twna ning laki kabaley sinriap ngam mak ge thei, katuang ravchap ramtat tei nsa de; karana kata guat bam tuang de. 27Pu Ravguangc khang nthanmei khatni kalingmei ravchaptatmei kiu thu: nruna nunc khatni swmmay nunc ta kaniw ryanra zaucloumei khatni mi mbaanv rui kata sw mphuam makmei hei e.
Currently Selected:
JAKOB 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
