IBRIMEI 13
13
Akumhna Ravguangc ta Tipian Nina Cho?
1Chana punav ta nzianmei mpat rio. 2Gin ga laalou khang ntaamv rio. Thowkumhmei thu thay mak liangna kauh baanchara nunc ta laaloumei ni nai kan the.#Tha 18.1-8; 19.1-3 3Kangkai khou bammei nunc khang, nangniw ni kaniw lev kangkai khou bam nchamc kumna ninglouna ningtowlou o. Ryanra bammei nunc khang, nangniw ni kaniw lev ryanra nchamc bam kumcna ningtowlou o.
4Nowsuanhmei ta meic guayna nthukmei swna laa nina e, khatni nowpuc laeng sw mphuam lak nina e. Kalam thu lungcmaanv lungcmowmei ta Ravguangc rui latzan sw puni. 5Syan agaamvna lungc lak nina e; nang khou naimei khou tei pianna lungc o. Kalam thu, “Ai nang ta mpatlou lak ge, ai nang ta ganc nrulou lak ge,” twna Ravguangc rui sa e.#Ria 31.6,8; Jos 1.5 6Hei zaeng rui,
“Poubauhmei hei ata nkhavloumeipu e,
ai ping lak ge.
Maansei rui ata tabui sw ngam nina cho?”#Kal 118.6
twna aniu sa ngam e.
7Nangniw khou Ravguangc lat dincloumei, tat kanmei nangniw ta zayloumei nunc ta tei ningtow o. Kaniw panty khatni kaniw ramthei tei kakhanh o. Kumna kaniw tuang lwmmei tei lay nzeic o. 8Jisu Khrista hei doulaneic, aseic khatni tingsaeng nchamc e. 9Kadat dikh dikmei latdyn rui nangniw ta zay mbiangh mak khang sw o. Ravguangc zauzian rui nangniw lungkuat titanc o. Hei tei taektw rui titanh khang hamh e; taektw thianghmei tei rui thu gaeng tuang maek ge.
10Aniu tuang ravchapaeng khou khaengloumei ravcha hei Jihudimei pheykai khou thouhsw bammei nunc khang tei thu kaniw dam maek ge. 11Kalam thu, Tingkuh nunc rui paapc khang khaenglou khang kazei Nthan Liangmei Bamv khou phungc gutmei kiruai nunc pumc tei thu zypui kailuangc paengc thangc mai ntei e.#Lev 16.27 12Hei tei kumcna, Jisu ni, kazei paan rui meic nunc ta sw nthanlou khang raengh paengc thangc theiclou the. 13Kum thena aniu ni zypui kailuangc paengc thangc kadaeng khou patna kamei lev zak khaengv nchamc di kho. 14Aniu khang kandih khou tingsaeng kaidai maek he; guang nimei kaidai kiu laa khang nzwan bam tuang di he. 15Kum thena, aniu Jisu paan rui Ravguangc ta thuanhmei hei aniu ramkhaeng swna kat tanh tan bam di kho—aniu mwang rui kazanc sa ndauhna thuanc bam di kho. 16Gaytaanv taanh khang khatni nang khou naimei tei zanzina piu khang amuc rio. Mi hei Ravguangc khang pianmei khaengpui puatkat kiu the.
17Nangniw ta zayloumei nunc lat tei piu o. Kaniw bangc khou bam o. Kaniw tuang taanv chakh tei kaniw Ravguangc khou tii ni lapui zaeng rui, kaniw nangniw bumaengc ta kadanna zauc bam tuang e. Kaniw neihlana taanc bam khang latpiu o. Kaniw chwnsw ryanrana taanc e thei hei tei nangniw khang gaeng mak ge.
18Aniw khang ni huayneylou bam o. Aniw lungning nthanna sa tuang e. Kalam katana khou aniw chingkhiuhmei panty khou lungc nii e. 19Ai nangniw daeng khou guang dat zaih khang huayney ranvlou khang nangniw ta katiu e.
Suaicsamcloumei
20Daihmei lauziu gaenghmei kapy, aniu Poubauhmei Jisu ta, tingsaeng latdyng khang kazei keyloumei khou rui tiringcthauloumeipu chuzaenghmei Racguangc rui, 21aniu kamei ningmei taanc ngam khang kage naimei guay nangniw khou tiilou pw di tho, khatni kamei rui ningmei tei Jisu Khrista paan rui nangniw khou taanclou di tho. Khrista hei tingsaeng hymdaic bam kan di tho. Amen
Nkhamhmei Lat
22Kumna chana punavthiu, ai rui nangniw khou katiuloupui lat hei khaengvna nkinglou o. Kalam thu ai rui mi hei nangniw khou samna hy tuang de. 23Aniu chana Timothi ta kangkai khou rui mpatlou dat kan the twmei nangniw khou tithaylou nii e. Kamei guang zaic pw e thei, ai nangniw ta ariw khang guang pwkhou kata nduangh guang puni.
24Nangniw tuang kapy swmei kapwmna khang khatni nthanmei kapwmna khang dwan gay kady e. Itali thangcmei chana punav guay rui nangniw khang dwan gay kady e.
25Nangniw kapwmna ta Ravguangc zauzian lamluailoumei sw diu.
Currently Selected:
IBRIMEI 13: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
