JAKOB 2
2
Zawkhu Zawru Zauhmei ta Luhmei
1Achanathiu, nangniw Hymdaihmei Kaipouc, Jisu Khrista khou lwmmei nunc swna, meic nunc ta zawkhu zawru zaucna sw rio. 2Nangniw charuangc kariumei bamv khou lungcgaymeipu rui kachaekc baanrwn runna kamanv kunghmei pheybaan piuna guang the; tiki lungcsimeipu thu pheyraan piuna guang the twna kakhanh zauc kho. 3Khoutei pwan gay piumeipu ta tei, “Mi khou hei dungc o,” twna sa the; tiki lungcsimeipu ta tei thu, “mi thangc tei ding o,” hamh e thei, “Kandih khou dungc o,” twna sa e thei, 4mi hei zawkhu zawru zauhmei hamh nah cho khatni lungning simei khou rui patmei latzan hamh nah cho?
5Nking o, nzianmei achanathiu! Lwmmei khou lungcgaymei nunc sw khang khatni kata nzianmei nunc khang tii ni twna nrianhloumei guangcdic tei laa khang, Ravguangc rui thu mbaanv mikzaw khou lungcsimei nunc ta kapah tu hamh nah cho? 6Tiki nangniw thu lungcsimei ta mala e! Nangniw ta ni binna latzankai khou zaylou bammei hei lungcgaymei nunc rui hamh nah cho? 7Nangniw khang tiiloumei chingkhiuhmei zanc ta malana swmei hei lungcgaymei nunc rui hamh nah cho?
8“Nang rana nang ta nzianmei kumcna nang kai kaining kaigeimei ta nzian o,” twmei nthanmei latrik khou hyloumei daihmei latdanv tei nangniw piu e thei, nangniw lat piu chuymei the.#Lev 19.18 9Tiki nangniw rui meic nunc ta zawkhu zawru zaucna sw e thei, nangniw nkhuaimei e; kumna nangniw Riakdanv twan lyammei nunc e. 10Kalam thu Riakdanv akhat ngaek makmei tei kapwmna ngaek makpui riath re. 11“Lungcmaanv lungcmow lak nina e,” twna sameipu rui, “Meicdow lak nina e,” twna ni sa e. Nangniw lungcmaanv lungcmow mak sini meicdow e thei, nangniw Riakdanv swbakmei the.#Tat 20.13,14; Ria 5.17,18 12Aniu ta tinyngswloumei riakdanv thei tei layna, aniu ta latzan sw punipui zaeng rui, nangniw latsav khou khatni taanv khou suriakthay o. 13Kalam thu zauzian maekpui mei ta zauzian kazauh makna latzan sw puni; tiki zauzian rui latzan ta ngam e.
Lwmmei khatni Taanv
14Achanathiu, thowkumhmei rui kakhou lwmmei nai e twna sa laki kataanv thu maek ge thei, hei tei rui tabui tuang gaeng tuang naina cho? Mi ramlum tei rui kata kanlou ngam puni di nah cho? 15Chana hamh e thei tanpui thowkumhmei nsuay mbaanv khang khatni tu zangv khang maekna bammei kakhou, kakhang kage naimei tei tiilou makna, 16“Gayna tat tho, lumc tho, nggu tho,” twna kadylou tina hei tei rui tabui gaeng tuang naina cho? 17Hei tei kumcna, taanv kazauh makmei ramlum tei thu theihmei de.
18Meic gaanvsaekc rui, “Meic gaanv khat khou lwmmei nai e, baihmei gaanv khat khou taanv nai e,” twna sa pu e thei, “Taanv kazauh makna lwmmei kiu akhou lyanlou o; ai thu ataanv rui aram lum lyanlou puni,” twna ai thu sa daw puni. 19Ravguangc akhat na nai e twmei nang lwm e; hei tei nchumh the. Ravsic ni hei tei lwmna ping kadunh bam de. 20He mpangmei! Taanv kazauh makmei ramlum tei thu nsa de#nsa de: baanhhy baibal asaekc khou thu theihmei de twna hylou e. twmei lyanloumei ta laa nii bu cho? 21Aniu pu Abraham ta ravchaptatmei e twna laaloumei tei taanv paan rui hamh nah cho? Kamei rui kanac mpouh Isak ta ravchabamv khou khaengpui paan rui hamh nah cho?#Tha 22.1-14 22Mi khou hei lwmmei lev taanv tat nchamcmei hei nangniw how the. Taanv kazauh pwkhou karam lum tei nthuihpui tuang e. 23“Abraham Ravguangc ta lwm the, kumna karam lum paan rui Ravguangc rui kata ravchaptatmei e twna laalou the,” twna nthanmei latrik khou hyloumei tei mi hei the. Kumna Abraham ta Ravguangc pam twna kaw the.#Tha 15.6; 2 Ki 20.7; Isa 41.8 24Meic gaanv khat ta ravchaptatmei tiswloumei hei taanv paan rui e; lwmmei na rui hamh e twmei nangniw how the.
25Hei tei kumc muayna, mangcsangmeiluc Rahab ta tei ni, kamei rui Isaraelmei gwanrummei nunc ta laalouna chaeng baih thangc ndiulouna nkhavloumei taanv paan tei rui ravchaptatmei swna chaklou tuang e.#Jos 2.1-21 26Bumaengh maekmei pumc tei thu theihmei e; hei tei kumcna taanv kazauh makmei ramlum tei thu theihmei de.
Currently Selected:
JAKOB 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
