HOSEA 13
13
Isaraelmei ruc khou Nkhamhmei Latzan
1Tat kanmei ganv khou, Ephraim kaikhwang rui sa ti thei, Isaraelmei baihmei khwang guay tei ping bam khwan e, kaniw Ephraim ta ngangc phaengc bam khwan e. Tiki kaniw tei Baal ta kalumna paapc taanc the, mi zaeng rui kaniw theic puni the. 2Kaniw tanh tuang ravmaengc guay daandi tuang ravmaengc guay, maansei lungc rui kakhanhna damcloumei, maansei baanc rui kasiamhloumei ravmaengc guay ta kalumna paapc taancna bam e. “Mi racmaengc guay khou tei khaengna kalum nina the,” twna kaniw rui sa the. Kaniw rui guaichiclauna maengc guay ta tei kaput the. 3Kumna kaniw hei lauthwan achin amaan nuanghmei kumc, lauthwan zikdui phui nuanghmei kumc, amaan kan puni the. Kaniw tei laudy bamv khou rui mpwan rui phungc tat kanmei napgung tei kumc khatni maikhou kai khou rui patmei maikhou tei kumc amaan kan puni the.
4 Ringhpouc rui sa e, “Ai hei Ringhpouc nangniw Racguangc, nangniw ta Izip khou rui zaypatmeipu tei e. Ai hamhna nangniw khang Ravguangc baihmei maek ge. Ai na hei nangniw ta kanloumeipu kiu e. 5Ai rui nangniw ta dui maekmei sypungramv khou makavlou the.#Ria 8.11-17 6Tiki nangniw ramv gaymei kandic khou tei gut pwkhou, tu nggu zangv ngguna pian the, khoutei nangniw gaengh sw thauna ata amuc the. 7Kumna ai rui nangniw ta kamang alaih rui nkai kumc nkai puni the. Kamangliangpui kumcna nangniw ta chaeng khou nchwan puni the. 8Kanac amaan kanmei chagamhkui kumcna ai nangniw ta anuay puni the, kumna ai rui nangniw ngaengv phaak padaklou puni the. Kamangliangpui kumcna ai rui nangniw ta kabamv khou tu mbamlou puni the, kumna nwmbangc khouringc kumcna nangniw ta siat puat paruatlou puni.
9“He Isaraelmei nunc, ai rui nangniw ta swmutlou puni the! Kum pwkhou nangniw ta thow rui nkhavlou ngam puni cho? 10Nangniw rui guangh khatni kapy nunc tiilou khang ney e, tiki tukumhna kaniw rui nangniw ta kanlou ngam ni cho?#Ria 8.11-17 11Alungpuamcna nangniw khang guangh azuh ni tii the, khatni alungpuamcna ai rui kaniw ta laa ganc dat the.#1 Sa 10.17-24; 1 Sa 15.26
12“Isaraelmei tuang paap khatni khuay guay tei hy keylou kan the, kumna mi hy keyloumei tei ry tiph tipna rylou kan the. 13Isaraelmei hei ringc kan diu khang kadow gaymei tiilou the, tiki mpang langvna hei tei laa kan mak khe kaniw puanc pat nimei ganv tangh the tiki kapui nacbamv khou rui pat mumei nac kumc the. 14Ai rui kaniw ti hei theihmei kandic khou rui kanlou lak khe khatni theihmei ngamv khou rui tiduak lak khe. He theihmei, nang tuang ravpyan phungc guang tho! He theihmei kandic, nang tuang swmutmei phungc guang tho! Ai rui kaniw ti hei zauc nzianlou dat lak khe.#1 Ko 15.55 15Isaraelmei nunc hei zuangctou bang guay kumcna daicthau bam sini, ai rui sypungramv thangc rui suhmei neihpat pwan ti aliu guang puni, kumna hei tei rui kaniw tuang duithuak khatni duikhunc guay tithip kan puni. Khatni kamanv kunghmei puat guay ta phungc tat kan puni. 16Alat liammei zaeng rui Samaria ta ai rui dandi tii puni the. Kamei nunc rih khou theic puni; ngasatna nunc ta kandih khou kathamv puat paruatlou puni, khatni kapumc nrit bammeipui nunc bung tei seihuakh seihuaklou puni.”
Currently Selected:
HOSEA 13: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
