HOSEA 12
12
1Isaraelmei nunc rui lauthwan rui thauna zingbangc nganv taanc bammei guay hei nsa de khatni amaan nimei tuang e. Meicguat tumei khatni abiw adowmei kaniw pang khou mbu thau the. Kaniw Asiriamei lev champanv khanv the khatni Izipmei lev lanvguanh-lanvdaengh kariu the.”
2 Ringhpouc hu khou Judamei nunc khuay nai the; kamei rui Isaraelmei nunc ta ni kaniw rui taanc bammei taanv khang tei rui dandi tii puni the. Kaniw rui taanclou kanmei tuang taanvphy tei tii puni. 3Kaniw pupouc Jakob tei kachaic Esau lev kaney pui bunglungc khou agay bam khwan e. Jakob tei daicthau pwkhou, kamei Ravguangc ta anuay the—#Tha 25.26 #Tha 32.24-26 4Kamei baanchara lev anuayna kamei rui ngam the. Kamei kapna suaihiam ney the. Kumna Bethel khou tei aniu pupouc Jakob khou Ravguangc rui guanglouna kakhou kachuclou the.#Tha 28.10-22 5Hei tei Ringhpouc Ravguangc Ngamparymeipu e— Ringhpouc twmei hei aniu rui kalum nimei zanc e. 6Hei zaeng rui ntaw thu, Jakob kikta nuncle, nangniw tuang Racguangc khou lwmlou o kumna kakhou hanc guang dat ro. Lat piu chuymei khatni nchumhmei sw o, kumna Ravguangc rui taanclou pw nimei khang tei nangniw akhaengv saengcna nkhwan o.
Latzan Lat Sa Nsukc Keymei
7 Ringhpouc rui sa e, “Nchumh makmei duh sinna meic nunc ta guattu bammei lanvguanhmei nunc kumcna Isaraelmei ni lungning nthan mak khe. 8Kaniw rui sa e, ‘Aniu hei lungcgay the,’ ‘Aniu lanv hei geic the. Kumna aniu hei lungning nthan makna lungcgaymei tuang de twna meic gaanv khat na rui sini aniu ta sa ngam lak ge.’ 9Tiki ai hei nangniw ta Izip khou rui zaypatloumeipu Ringhpouc nangniw Racguangc tei e, sypungramv khou nangniw daeng khou ai guangmei douc tei kumna ai rui nangniw ta pheykai khou tilungclou dat puni.#Lev 23.42,43
10“Nangniw ramhthay kan khang ai rui muhzwng nunc khou lat mpeyna salou kan the, ndawman ni mpeyna tiilou kan the. 11Kum bam sini Gilead khou ravmaengc kalummei nthaekc mak ge, kumcna ravmaengc kalum bammei nunc tei theic puni. Gilgal khou guaichic nunc khaengna bam e, kumna mi khou nai bammei ravchabamv guay tei ramvpuk khou taukhuan pang sw puni the.”
12Aniu pupouc Jakob Mesopotamia thangc pak tatna khou tei now-manghna kamei lauziu gaengcna meickai khang lungclou khwan e.#Tha 29.1-20 13Isaraelmei nunc ta Izip khou bangh sw bammei khou rui rancpatlou khang khatni kaniw ta zauclou khang Ringhpouc rui muhzwng akhat thouc guang khwan e.#Tat 12.50,51 14Isaraelmei nunc rui Ringhpouc ta kalung tipuamc kasiclou khwan the, kaniw tuang khuay khang tei kaniw theic biuh rap khwan the. Kaniw rui Ringhpouc zaw tisiloumei khang tei kamei rui kaniw ta dandi tii puni the.
Currently Selected:
HOSEA 12: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
