HOSEA 11
11
Ravguangc tuang Ramzian
1 Ringhpouc rui sa e,
“Isaraelmei ngana sw bammei douc rui,
ai kata nzian the kumna Izip khou rui kata anac mpouh swna kaw pat the.#Tat 4.22; Met 2.15
2Tiki ai rui kata kaw ti hay,
kamei akhou rui tat duc hay hay kan the.
Amei nunc rui Baal khang khaeng the;
kaniw rui ravmaengc khang agaw ntei the.
3Kumc sini Isaraelmei ta tat thay khang nchamloumei kiu ai e.
Ai rui amei nunc ta puanc thaulou the,
tiki ai rui kaniw ta kadanlou e twmei kaniw thay mak ge.
4Ai rui kaniw ta nzian kadanna akhou zay guanglou the.
Ai rui kaniw ta puanc thauna abiangc khou tibeiclou the;
ai rui nkhum keyna kaniw ta makuat aluatclou the.
5“Kaniw Izip thangc hanc tat dat nina the, kumna Asiriamei rui kaniw ta sin puni the, kalam thu kaniw akhou hanc guang nii mak khe. 6Kaniw tuang kaidai guay khou rih liak guang puni the kumna kaniw tuang kaidai raengcmun guay tei swra gut puni the. Ai rui amei nunc ta swmutlou puni the kalam thu kaniw ningmei na ta tei kaniw taanc the. 7Kaniw akhou rui tatpat khang rana swna bam the. Kaniw guang khou lou bammei guaihphu zaeng khou tei rui kaniw kap puni the. Tiki meic gaanv khat na rui sini hei tei kaniw khou rui laa ganclou dat ni tuang hamh the.
8“He Isaraelmeile,
ai rui akumhna nangniw ta mpatlou ngam nina cho?
Akumhna ai nangniw ta ganclou ngam nina cho?
Ai rui Adma kaidai ta swmutloumei kumc
ai rui nangniw ta swmutlou ngam pw nina cho,
khatni ai rui Zeboiim kaidai khou swloumei kumc nangniw khou swlou ngam nina cho?
Alung rui mi hei taanc ngam mak ge!
Ai nangniw ta nzianmei hei sa ngam thui mak khe.#Ria 29.23
9Alungpuam khou ai nangniw ta dandi tii lak ge;
ai rui Isaraelmei ta swmut dat lak khe.
Kalam thu ai hei Ravguangc de maansei hamh e.
Nthanmeipu ai hei nangniw lev bam nchamc bammeipu e.
Ai alungpuamcna nangniw khou guang lak ge.
10“Amei nunc ta zauczihmei nunc ruc khou kamangliangpui kumcna ai rui rah thau pwkhou amei nunc rui athei lay puni. Kaniw neihkey biak thangc rui akhou pak guang puni. 11Kaniw Izip thangc rui nruayna kumcna katumcna samc guang puni, khatni Asiria thangc rui akhouhna kumc samc guang puni. Ai rui kaniw ta kaniw kai khou phungc guanglou dat puni. Ringhpouc ai rui sa kan the.”
Isaraelmei khatni Juda tuang Khuay
12 Ringhpouc rui sa e, “Isaraelmei nunc rui akhou saraamhmei khatni meicguatmei rui padikna bam e, khatni Judamei nunc rui lwmnuhmei khatni nthanmei Ravguangc ata liamna bam di he.
Currently Selected:
HOSEA 11: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
