IBRIMEI 4
4
1Ravguangc kamei rui sa bammei zaengthaek tei tiilou nimei tuang latryan aniu khang ntaw nai bam khou hei, aniu ta hei tei laa biuh makmei nunc the twlou pw ramc e twna kasiaththay kho. 2Kaniw kumcna aniu ni gaychamv hei chu the. Kaniw lat tei chu the; tiki hei tei rui kaniw khang gaeng tuang maek khe. Kalam thu kaniw hei tei lwmna laalou mak khe. 3Kumna lwmmei aniu mi zaengthaek tei laa puni. Kalam thu, “Kaniw ta atuang zaengthaek khou tigut lak ge twna alungpuamcna ai sa kan the,” twna Ravguangc rui sa the. Mbaanv damclou rap khou rui hei tei chamdaanv luailou khwan sini, kamei rui hei tei sa kan the.#Kal 95.11 4Kalam thu, “Ravguangc zaeng chaneimei nungc kataanv guay nthaekc the,” twna Nthanmei Latrik kabamv akhat khou zaeng chaneimei tingmik lam khou hylouna nai e.#Tha 2.2 5Kumna, “Kaniw ta atuang zaengthaek khou tigut lak ge,” twna ni mi bamv khou hei kamei rui salou the.#Kal 95.11 6Gaychamv chu reymei nunc tei kaniw lwm makpui zaeng rui mi zaengthaek tei laatow kan mak khe. Kum tina mi zaengthaek tei laa nimei baihmei gaanvsaekc nai e. 7Mi kiu thu Ravguangc rui “aseic” twna kawmei tingmik baihmei akhat kak patlou dat bammei hei rui lyan e. Mi kiu thu sa tow rey kanmei,
“Nangniw aseic Ravguangc khwan chu e thei,
nangniw lung tanh rio,”#Kal 95.7-8
twmei hei tingkwm mpeyna tangv kamei rui David ta ni tisa dat re. 8Mi zaengthaek tei Joshua rui tiilou khwan e thei, katangv thangc Ravguangc rui baihmei zaengthaek lam khou sa dat bam lak ni tuang e.#Ria 31.7; Jos 22.4 9Hei zaeng rui Ravguangc zaeng chaneimei nungc nthaekcmei zaengthaek tei Ravguangc mei nunc khang nai bam e. 10Zaeng chanei nungc Ravguangc kataanv nthaekcmei kumcna, Ravguangc zaengthaek khou gutmei guay, kaniw taanv khou rui nthaekc puni.#Tha 2.2 11Hei zaeng rui, latliampui zaeng rui laatow makna taan kanmei nunc tei kumh makna, mi zaengthaek khou tei aniu gut khang ngammei kasang karamc kho.
12Ravguangc lat hei thu ringhmei, kapumtan naimei lat re. Mi hei kamun kaneimei baengsaeng suangc ntuk ge—du lev bumaengh khatni meicrou meicbing nganv biw tangc e. Mi hei maansei lung khou naimei chwn khatni lungning nganv thay tangc e. 13Ravguangc hu khou ramh khatna sini nkamh ngam mak ge. Damcloumei katana hei kahu khou how ndauh daek tuang de. Kakhou aniu taanv chakh guang ndaw puni.
Jisu hei Tingkuh Daihmei e
14Ravguangc hu khou guang bam kanmei Ravguangc nac mpouh Jisu hei aniu tuang Tingkuc daihmei swna bampui zaeng rui, aniu rui kaucpatlou kanmei lwmmei phaydyng hei ntipna ding di kho. 15Aniu tuang tingkuc hei aniu ramsuan ta zauclou thay makmeipu hamh e. Kamei hei aniu kumcna kalam kathuicna khou nthiammei ariw kanmeipu e; tiki kamei thu paapc khou keylou kan mak ge. 16Kum thena, aniu khang kage naipui ganv khou zauc-nzianlouna nkhavlou khang, lwmsi datpui tuang maekna zauzian guangcbamvpaeng daeng khou guang di kho.
Currently Selected:
IBRIMEI 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
