IBRIMEI 3
3
Jisu hei Mousi Suangc Daic e
1Ravguangc rui kawlou muaimei nthanmei chanathiu! Aniu laaloumei lwmriak tuang tingkuc sw khang Ravguangc rui ndiu guangmeipu Jisu ta kakhanh o. 2Mousi hei kakhou tiiloumei taanv tei lwmnuhmei swna Ravguangc kai khou taanc kanmei kumcna, Jisu ni mi kakhou tiiloumei taanv hei Ravguangc khang lwmnuhmei swna taanclou kan the.#Sin 12.7 3Kai kasiamhloumeipu ta tei kai ta suangc chakhwangswmei kumcna, Jisu ti hei Mousi ta suangc mbuna chakhwang sw nipui thouc e. 4Kai kathuic hei meic gaanv khat rui kasiamhlou tuang e. Hei tei kumcna Ravguangc hei ramh guayna kasiamhloumeipu e. 5Mousi hei Ravguangc kaikhunc kapwm khou lwmnuhmei tamthiwmei swna, thei thangc Ravguangc rui sa nimei tei sameipu e. 6Tiki Khrista thu kanac mpouh swna Ravguangc kaikhunc tamvpypouc e. Aniu rui rigwnmei khou tei tangkhyn makna ntipna bam e thei, aniu hei Ravguangc kaikhunc mei e.
Ravguangc Mei nunc khang Naimei Zaengthaek
7Hei zaeng rui, Bumaengh Nthanmei rui sa e:
“Nangniw aseic Ravguangc khwan chu e thei,
8nangniw pupouc nunc Ravguangc lat liamna,
kaniw rui tazikramv khou Ravguangc ta nchanv kanmei tei kumcna,
nangniw sw riu.
9Kaniw tingkwm riakdei ataanv hou khwan sini,
mi khou tei kaniw ata nchanv the.
10Hei zaeng rui ‘Kaniw athei lay nii mak khe
khatni alat piu zat mak khe,’
twna kaniw ta lungh puamcna ai sa kan the.
11‘Ai rui kaniw ta zaeng ti-nthaekclou nimei kandic khou tei,
kaniw ta tigut lak khe!’
twna alungpuamcna kalaic dat lakpui lat sa kan the.”#Kal 95.7-11
12Chanathiu, nangniw thowkumhmei khou simei khatni lwm makmei lung naina, hei tei rui nangniw ta ringhmei Racguangc khou rui sw ntamvlou mak khang kasiaththay o. 13Paapc tuang guatmei rui nangniw lung titanh mak khang, “Aseic” twna kawmei ganv hei nai bam khou, nangniw tingmik kathuic khat khat ta katiu karyna bam o. 14Kalam thu thaurey khou aniu lwmloumei tei katwan nganvna mi khou tei aniu lwm ntip bam e thei, aniu hei Khrista tuang dam tei lay laa nimei nunc e.
15“Nangniw aseic Ravguangc khwan chu e thei,
nangniw pupouc nunc rui latliamna sw kanmei tei kumcna,
nangniw lung tanh rio.”#Kal 95.7-8
twna hylouna nai e.
16Ravguangc lat chu lana liammei nunc kiu thow tei cho? Mousi thei Izip khou rui tat patmei nunc tei hamh nah cho? 17Kaniw ruc khou tingkwm riakdei Ravguangc lungpuamc guang kanmei nunc kiu thow tei cho? Paapc taancna tazikramv khou theic kanmei nunc tei hamh nah cho? 18“Kaniw ta zaeng ti-nthaekclou nimei kandic khou tei kaniw ta tigut ni tu hamh the,” twna Ravguangc rui samei kiu thow ta cho? Latliammei nunc ta tei hamh nah cho?#Sin 14.1-35 19Kumna kaniw lwm makpui zaeng rui mi kandic khou tei kaniw gut ngam kan mak khe twmei aniu how the.
Currently Selected:
IBRIMEI 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
