IBRIMEI 2
2
Heidi Daihmei Ringcbamv
1Hei zaeng rui, aniu ta nzuan maanlou pw ramc e twna, aniu chu kanmei nchumhmei lat tei sin ntip ranv bam nina the. 2Kauh baanchara guay rui phungc guangmei lat tei kalingmei e, kumna hei tei twan lyammei, hamh e thei piu makpui mei ruc khou tei kakhuay thei layna dandi keylou e thei, 3aniu heidi daihmei kanloumei chaeng ti hei ntaamv lana akumhna duak ngam nina cho? Mi kanloumei chamv hei reymei khou Poubauhmei rui kauc ndauhlou the, kumna hei tei kakhou rui chumei guay rui nchumhmei the twmei nchinlou the. 4Ravguangc rui ni charynmei sw-nchinmei taanv kazaat mpeyna lyanlouna, khatni kamei rui ningmei thei layna Bumaengh Nthanmei tuang kaipat nzanhlouna kaniw lat hei nchumhmei e twmei lyanlou the.
Ringhbamv khou Zayloumei
5Aniu rui sa bammei guang nimei kandih kathanc tuang kaipouc sw khang Ravguangc rui kauh baanchara nunc ta lou mak ge. 6Nthanmei latrik khou mi kumna hylou e:
“He Ravguangc, nang rui ningtow bammei maansei hei;
kakhang nang rui kadanlou bammei maansei hei akumhpui mei cho?#Kal 8.4-6
7Nang rui kata matak khat khang kauh baanchara guay suangc ti-analou the;
nang rui kakhou hymdaihmei khatni chakhwang pyrun runlou the,#Nang rui damcloumei katana ta sin khang nang rui kakhou tiilou the (Kal 8.6 tei zauc o) twmei hei baanhhy baibal mpeyna khou hylou e.
8kumna ramh guayna ruc khou kata kaipouc tiswlou the.”#Kal 8.4-6
Ravguangc rui maansei ta “ramh guayna tuang kaipouc tiswlou the,” twna samei khou hei kabangc khou lou makmei ramh khatna sini maek khe. Tiki maansei rui ramh guayna ruc khou kaipouc sw bammei ta aniu ntaw how mak he. 9Tiki Ravguangc zauzian paan rui, kamei meic kathuicna khang theiclou khang, matak khat kauh baanchara guay suangc ana keyloumeipu, kamei theicloumei paan rui hymdaihmei khatni chakhwang kakhou tiiloumeipu Jisu ta aniu how the.
10Nah mpouh mpeyna ta hymdaihmei khou phungc guanglou khang ringhbamv kaipouc Jisu kamei ryanra khaengvpui paan rui kadwanh ti-nthuihloumei hei ramh katana damcloumei khatni tinailou bammei Racguangc tuang nchumhmei taanv e.
11Sw-nthanloumeipu kamei khatni kamei rui sw nthanloumei nunc hei pu akhatna nac nunc di the. Hei zaeng rui kamei rui kaniw ta chana kaw khang zak dat mak khe. 12Hei zaeng rui,
“Ai rui nang zanc achana nunc khou kauc ndauh puni;
kaniw guang kariupui bamv khou,
ai nang ta thuanc puni,”#Kal 22.22
twna kamei rui Ravguangc khou sa e. 13Kamei rui, “Ai Ravguangc khou ngangvlou ni,” twna ni sa e. Kumna, “Ravguangc rui akhou tiiloumei nac nunc, ai lev mi khou hei bam e,” twna ni kamei rui sa e.#Isa 8.17,18
14Kamei rui alauc nunc twna sa bammei nunc hei zei lev zanh rui swmei maansei nunc e. Jisu kamei kahak mi nunc hei kumhmei swna maansei lwnlung lay laa the. Mi hei kamei theicloupui paan rui, theihmei pumtan naimei ravsic ta swmaanlouna, 15panty saanvsaengh, theih khang pingmei rui bangh kumcna bammei nunc ta kanpatlou khang e. 16Kalam thu kamei rui nkhavloumei hei kauh baanchara nunc ta hamh e; tiki nthanmei latrik rui, “Kamei Abraham kikta guay ta nkhavlou e,” twmei hei kachangcpui lat re.
17Mi kiu thu, kamei Ravguangc siamruai taanv khou lwmnuhmei khatni zauzianthaymei Tingkuc swna meic nunc paap guay sw nthanlou khang, kalam kathuicna khou kamei kachana guay lev nchamc nipui thouc tina e. 18Mi kumna kamei ni nthiammei khatni ryanramei ariw la thena, nthiammei akhangv bammei nunc ta kamei nkhavlou ngam e.
Currently Selected:
IBRIMEI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
