IBRIMEI 12
12
Aniu Pu Ravguangc
1Kumna heizumei sakhi pang muangh kumcna aniu daeng bam haengv bam khou hei, aniu ta swkhamv swnamv nimei guay khatni aniu khou khuap ntipna bammei paap guay ganc pat lana, aniu pak nimei lauluangc hei pak tangh khang lungkuat tancna pak di kho. 2Kahu khou naimei neihlamei ta tei zaucna, zakmei ta ping makna kros khou ryanra khaengvlouna, Ravguangc guangcbamvpaeng tuang baanzat thangc dungckey kanmeipu, kabangbi khou rui katwan nganv aniu lwmmei ngangvloupui bamv Jisu ta zaucna pak di kho. 3Nangniw lung nnau keyna mpat mak khang, paapcmei nunc rui heidi zauczihna sw kanmei ta kamei khaengv kanmei tei kakhanh o. 4Nangniw thu paapc ric adow khou theicloumei nganv khaengv kanmei tuang thu maek he. 5Ravguangc rui nangniw ta kanac nunc ta kumcna katiuloumei lat saloumei tei nangniw amuc dat the nah cho? Mi kumna sa e:
“Anac mpouhle, Poubauhmei rui
nang ta riapmei ta ramhsak mak tuang sw rio,
khatni nang ta luh pwkhou lungh tangkhyn rio.#Job 5.17; Lkd 3.11-12
6Kalam thu Poubauhmei rui kamei nzianmei nunc ta riaplou e,
khatni kanac swna laaloumei nunc ta bai luhlou e.”
7Nangniw ryanramei ariwmei tei bai luhlou tuang e twna khaengv o. Hei tei Ravguangc rui nangniw ta kanac nunc swna sw bam tuang e. Kapu rui bai luhlou makmei nac thow naina cho? 8Nah guay ta thu bai luhlou tuang de. Tiki nangniw ta bai luhloumei maek ge thei, nangniw kapu maekmei nkhahnanac nunc tina the. 9Kandih lwnlung khou sini, aniu pu nunc rui aniu ta bai luhlou e kumna aniu kaniw ta chakhwang sw e. Kum e thei bumaengh tuang pw ta thu aniu hei tei suangc mbuna kakut gutna ringc nina hamh nah cho? 10Aniu pu rui gay khang e twna aniw ta matak khat bai luhlou e; tiki Ravguangc rui thu kamei nthanmei kumcna nthan khang aniu khang gay khang bai luhlou e. 11Baih luhloumei khou tei matak khat thu neihla mak khe, suc the; tiki laaloumei nunc khang thu mi thai tei ravchaptatmei khatni chuzaenghmei e.
Kakhimloumei
12Hei zaeng rui, zay zuat bammei baanc tei zay thau tho, khatni kadunh bammei khubut tei titancthau tho.#Isa 35.3 13Suanmei phay tei titheih makna tigaylou khang, ntyngmei chaeng khou tat gut tho.#Lkd 4.26
14Meic guayna chuzaenghna lungc bam khang khatni nthanmei panty khou lungh khang karamc o. Kalam thu mi kumcna lungh mak ge thei, gaanv khat na sini Poubauhmei ta how ngam mak ge. 15Ravguangc zauzian laatow mak pu ramc e twna kadan thay o. Nangniw khou nkhucmei maan zangc patna meic nunc ta sw katuakc mak khang khatni sw mphuam mak khang kadan thay o.#Ria 29.18 16Nangniw lungcmaanv lungcmowna khatni ravchaptat makna, Esau rui napkuak akhat na khang katuang nareimei dam zuanc tu kanmei tei kumh mak khang ramhthay o.#Tha 25.29-34 17Nangniw thay e, katangv thangc kamei kapu tuang suaihiam tei laa nii dat bam sini tii dat kan mak khe. Kamei mikdui keyna phu bam sini lungh laic dat nuhpui chaeng nai kan mak khe.#Tha 27.30-40
18Ntaw nangniw guangmei hei maibwang chuangc bammei, zingh zingmei, puanzingh kanut bammei kahitowmei chyngbut khou tei hamh e. 19Mi khou tei bianggun khwan khatni kauc patmei khwan tei chu pwkhou kaniw khou lat salou dat mak khang zaenghuay khwan e.#Tat 19.16-22; 20.18-21; Ria 4.11-12; 5.22-27 20“Mi chyngbut tei kahimei khouringh ta nganvna ntauh kwamluai nina e,” twna samei latdanv tei kaniw khaengv ngam mak khwan e.#Tat 12.13 21Hei tei heidikamv meic pingmei lwn khwan e, twmei thu Mousi nganvna “Ai pingna kadunh the,” twna sa e.#Ria 9.19
22Tiki nangniw guangmei hei thu ringhmei Racguangc kaidai, tingkauh Jerusalem, kasing kading thay makmei kauh baanchara guay bampui bamv Zaion Chyng khou e; 23kaniw zanc tingkauh khou hyloumei Ravguangc nac nareimei nunc neihlana kaduai bampui phwam khou guang tuang e. Meic katana ta latzan sw nimei Racguangc khou, khatni ti-nthuihloumei ravchaptatmei guay bumaengc khou guang tuang e. 24Abel zei suangc sini mbuna daic ranvmei lat samei zei rui kazinhlouna latdyng thanh swloumeipu Jisu khou guang tuang e.#Tha 4.10
25Hei zaeng rui nangniw khou sa bammeipu lat tei nuh zih la rio. Kandih khou samei lat tei sini liammei guay ta tei nsa mpatlou mak ge thei, tingkauh thangc rui samei lat tei thu liamna akumhna duak ngam nina cho?#Tat 20.22 26-27Mi ganv khou tei kakhwan rui kandih ta kanuk kan the; tiki “Kandih ta na hamhna tingkauh ta ni kanuk dat puni,” twna kamei rui samei hei rui kalung makmei puat guay tei nai bam duh khang, damcloumei puat guay hei kanuk ganc puni twmei tuang e.#Hag 2.6
28Hei zaeng rui, kalung dat lakmei guangcdic aniu laatowmei khang hei rui thuancku bam kho, khatni ping kadanna kamei rui laalou nuhmei ramkalum Ravguangc ta thuanckuna kalum bam kho. 29Kalam thu aniu Racguangc hei thu raw kamut kamaipui mai de.#Ria 4.24
Currently Selected:
IBRIMEI 12: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
