HAGAI 1
1
Ravkai Swthau dat khang Ringhpouc Latdanv
1Persiamei guanghdaihmei Darias guanghtumei tuang kaneimei kwm charukmei bw tuang reymei tingmik nungc, muhzwng Hagai khou Ringhpouc rui lat tiguang khwan e. Hei tei Shealtiel nac mpouh Juda tuang guanghkhyn Zerubbabel khatni Jehozadak rui puanhmei Tingkuh Joshua khang khwan e.#Ezr 4.24—5.2; 6.14
2Ngamparymei Ringhpouc rui Hagai khou sa the, “Ntaw hei Ravkai sw thau dat nimei ganv hamh he twna meic nunc rui sana bam e.” 3Khoutei Ringhpouc rui meic nunc khang muhzwng Hagai khou mi lat hei tiguang the: 4Amei nuncle, atuang Ravkai tei kamut kamaina ganclouna tabui swna nangniw thingpaek kai gay gaymei kasiamhna lungc bam tu cho? 5Nangniw khou pat bammei hei nangniw how makna cho? 6Nangniw mpeyna lingclou e katit na tay tu dat re. Nangniw tu bam sini tu nggu khang maek khe, zangv bam sini zangv padik khang maek khe, nsuay mbaanv bam sini lumc biuh khang maek khe. Nangniw syandui ntaanv bammei guay tei phoumei khau khou phaiclou khang ntaanv bam di the. 7Tabui zaeng rui mi guay hei kumc bam tu cho twmei nangniw thay makna cho? 8Chyngbut thangc tei kuna thing downa Ravkai tei kasiamh thau dat tho. Kum pwkhou ai rui kwnlou dat puni kumna ai atik ahym daicna guanglou dat puni.
9Nangniw nap-bi laa geic pwng the twna lwmgay the, tiki katit na laa the. Kai khou laaguangloumei thaengvna tei sini, ai rui amuan ganc the. Tabui zaeng rui cho? Kalam thu atuang Ravkai ra kasic karoucna ganclou bam ki nangniw kakai kakai khang na tynna bammei zaeng rui e. 10Hei zaeng rui tingpuk rui ni tingdui tikey mak khe kandih rui ni ramh bwan tithau mak khe. 11Ai rui luanghbut guay khou, laupuk guay khou, drakhalau guay khou, Olive lau guay khou, kandih khou thaupatmei phunling phunlu guayna khou, maansei khou, kiruai guay khou khatni nangniw rui lingc keyloumei phunling phunlu guayna khou tingdui tikeylou mak khe.
Meic nunc rui Ringhpouc tuang Latdanv Piumei
12Khoutei Zerubbabel ni Joshua ni Babilon thangc rui guang datmei guay tei ni twna Ringhpouc kaniw Racguangc rui samei tei piu the. Kaniw tei ping the kumna Ringhpouc tuang latdiu tatmei muhzwng Hagai rui samei tei piu the. 13Khoutei “Ai nangniw ta nduanghlou puni twna Ringhpouc rui sa e,” twna Ringhpouc tuang latdiu tatmei Hagai rui meic nunc khou tei salou the. 14Shealtiel nac mpouh, Judamei guangckhyn Zerubbabel, Jehozadak nac mpouh tingkuh Joshua khatni meic guayna lungning Ringhpouc rui tichuangc thaulou dat khwan e. Kumna Ngamparymei Ringhpouc kaniw Racguangc kai khou guangna taanvtaanh thau dat khwan e. 15Hei tei charukmei bw tuang 24mei tingmik nungc khwan e.
Currently Selected:
HAGAI 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
