GALATIMEI 5

Nyngswmei tei Swmaan riu

1Nyngsw khang Khrista rui aniu ta tiduaklou the! Hei zaeng rui ding ntip bo: bangh puat tei phungc dat ri tho. 2Nking o! Paul, ai rui sa e: nangniw ta gihruamh khang nuhlou e thei, nangniw khang Khrista hei nsa di the. 3Gihruamc kanmei nunc khou tei ai rui sa dat re, twmei thu— nangniw Riakdanv kapwm tei ngaek nina e. 4Riakdanv ngaekmei paan rui ravchaptatmei sw khang karamhmei nangniw tei, nangniw rana nangniw ta Khrista khou rui sw ntamv the. Nangniw Ravguangc zauzian khou rui tat pat the. 5Aniu rui rigwnmei thu, Ravguangc rui aniu ta ravchaptatmei tiswlou puni twmei hei e; aniu ramlum khou tei Ravguangc Bumaengc rui taanv swlouna aniu nkhwan bammei kiu mi hei e. 6Kalam thu Khrista khou thu gihruamhmei, ruamh makmei rui ramhkhat sini hamh e; nthukmei thu nzianmei paan rui taanv swloumei lwmmei hei de.

7Nangniw pak chuyna pak bam kan tuang de! Nchumhmei khou tat mak khang nangniw ta thow rui akumhna sw kaguakclou thena cho? 8Mi hei nangniw ta kawloumei Racguangc rui thu hamh the. 9Katitna suai khou rui kapwmna ta sw kasic tuang e.#1 Ko 5.6 10Nangniw baihmei biak thangc tei mbiangh tat pw lak ge twmei Poubauhmei khou nangniw ta lwmgaymei nai de. Thow pw ni nangniw ta sw kaguakcloupui mei khou tei Ravguangc tuang latzan keylou puni.

11Alam khou thu, chanathiu, gihruamh khang ai rui dinc tat bam ti thei, tabui swna ata sw kasic khang sw bam nina cho? Ai rui mi kumna dinc bam changh ti thei, ai Khrista tuang kros chamv dinhmei khou hei khamvmei nai bam lak ni tuang de. 12Nangniw ta mi kumna sw kaguakc bammei nunc kiu kaniw pumc siam la ni tuang e.

13Chanathiu, nangniw ta thu nyngsw khang kawlou tuang di the. Tiki mi nyngswmei hei nangniw pumc rui kahawmei taanh khang kadouchamei swna thu sinsw riu. Mi phaan tei nzianmei rui nangniw khat khat siamruai sw o. 14“Nang tuang kaining kaigeimei ta nang ta kumcna nzian nina e,” twmei khou hei Riakdanv kapwm nai the.#Lev 19.18 15Nangniw khat khat ta akayna swmaan khang sw kary bam e thei, nangniw maan ngam lamc e.

Bumaengh khatni Maansei Lwnlung

16Ai rui nangniw khou samei kiu mi hei e: Bumaengh paan rui tat ro, kum e thei meic pumc rui kahawmei khou tei tat mak puni. 17Kalam thu meic pumc rui kahawmei tei Bumaengh rui kahaw makmei e; Bumaengh rui kahawmei tei meic pumc rui kahaw makmei e. Mi kanei hei khat khat ta nuh mak ge. Mi kabac kiu thu, nang rui kahawmei tei nang taanc nuh mak ge.#Rom 7.15-23 18Bumaengh rui nangniw ta zaylou e thei, nangniw Riakdanv bangc khou bam mak khe.

19Meic pumc tuang taanv kapaengc khou how patmei kiu thu mi hei e: lungcmaanv lungcmowmei, mphuam mphamei, nthah boulahmei, 20ravmaengc kalummei, duaih raengh sinmei, karaeng zauczihmei, agay agimei, howti howkanmei, lungh puamhmei, kakhangna ningmei, lungh chamc chwn chamc makmei, kalangv patmei, 21howtimei, zouh mbamei, kasau kabaumei khatni meicdowmei mi kumhmei guay hei e. Kahunungc sa kanmei tei kumcna ntaw ni nangniw khou sa tuang e: mi kumna lungc bammei nunc tei Ravguangc guangcdic khou gut ni tu hamh e.

22Tiki Bumaengh tuang thai thu: nzianmei, neihlamei, chuzaenghmei, khaengvthaymei, zianthaymei, gaymei, lwmnuhmei, 23lungh niamhmei, khatni kapumc sinriapmei hei e. Mi kumhmei ti hei nuh makmei Riakdanv maek ge. 24Khrista Jisu tuang sw kanmei guay tei thu meic pumc tuang swmei tei, meic pumc rui kahawmei tei kazauhna kros khou thaengcluai kan the. 25Bumaengh hei rui aniu khou ringhmei tiiloupui thei layna, aniu Bumaengh rui zayloupui thei layna tat di kho. 26Aniu daihriw sw ri kho; khat khat lungpuam ntanv ri kho; khat khat ta howti ri kho.

Currently Selected:

GALATIMEI 5: RONGBSI

Highlight

Copy