GALATIMEI 6
6
Khat Khat Puat Phungc Nkhav o
1Chanathiu, thowkumhmei nkhuaimei khou keylou bammei ta ariw e thei, bumaengh khou bammei nangniw rui lungh zaenghna kata zay ntwnlou dat ro. Nangniw ta ni nthiam pw ramc e twna ramhthay o. 2Nangniw khat khat puat phungc nkhav karyna Khrista tuang latdanv tei piu nina e.#piu nina e; twna samei khou hei baanhhy baibal asaekc khou piu the twna hylou e. 3Thowkumhmei kamei ramhkhat sini hamh lana, kamei ramhkhat di the twna ning e thei, karana kata guat bam tuang e. 4Meic kathuicna karana katuang taanv ta tei zauc nina e. Gay e thei, kamei rui taanclou kanmei khang tei gaenghsw nuh e; hei tei meickai taanv ta lev kida khang hamh e. 5Meic kathuicna kara karana katuang puat phungc nina e.
6Nangniw khang nchamlou bammei nunc khang tei nangniw tuang nai naimei piu nzanh o. 7Nangniw rana nangniw ta guat riu. Ravguangc ta kiauc lac nuh mak ge. Kamei kamei rui nrouloumei tei tay dat puni. 8Meic pumc rui kahawmei thei layna taanhpui mei tei theic puni; Bumaengh rui kahawpui thei layna taanhpui mei tei ringcsuangmei laa puni. 9Hei zaeng rui, gaymei taanh khang liat lak ri kho; aniu tut makna bam e thei, kathai laa nimei ganv guang puni. 10Hei zaeng rui, aniu khang kadouchamei ariwpui kathuic, aniu meic kathuicna khou, nkunna lwmmei kaikhuncmei nchamc pang khou gaytaanv taanclou kho.
Kady Kanavmei Lat
11Abaanc kahak rui kahiak daicna hymei hei nangniw how the. 12Nangniw ta gihruamh khang sa bammei nunc tei mpaeng mikzaw khou na how gay khang sw lyan bammei nunc e. Hei tei kaniw ta Khrista tuang kros zaeng rui rai mak khang twna sw bam tuang e. 13Mi gihruamhmei nunc tei ni Riakdanv piumei nunc hamh e; nangniw ta gihruamh tu laa niimei kiu, nangniw gihruamc the twmei khou na tei kaniw gaenghsw nii lana e.
14Tiki akhang thu, ai gaenghsw nimei kiu aniu Poubauhmei Jisu Khrista tuang kros lam khou na de. Kalam thu mi kros paan rui atuang mbaanv tuang swmei theic the; ai mi mbaanv khou theic the. 15Gihruamhmei, gihruamh makmei rui ramhkhat sini hamh e; tiki nthukmei thu meic kathanc swmei hei de. 16Mi riak thei layna tatmei mei nunc, Ravguangc tuang Isaraelmei nunc khou chuzaenghmei khatni zauzian naimei sw diu!
17Nkhamh khou ai rui sa nimei thu: meic gaanv khat na rui sini ata sw katuakclou dat mak kan di tho. Apumc khou nai bammei achin guay hei rui ai hei Khrista bangc e twmei lyanmei tuang the.
18Chanathiu, nangniw khou aniu Poubauhmei Jisu Khrista tuang zauzian nai diu tho! Amen.
Currently Selected:
GALATIMEI 6: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
