EZEKIEL 45
45
Ramv Nzanhmei
1Ramv tei kaikhwang kathuic khang kadam kadam naina nzanh than pwkhou, kalangv akhat thu Ringhpouc khang reiclou nina e. Hei tei chowbuk 25,000 khatni chowbuk 20,000 daihmei ramv nina e; mi ramv guay tei nthanmei ramv sw nina e. 2Khoutei kaphai kadung chowbuk phay panguh panguhmei ramv rui Ravkai ramv khang nai nina e, kumna chowbuk 50 kai daeng nai haengv nina e. 3Mi nthanmei ramv kapaek akhat, chowbuk 25,000 saenghmei khatni chowbuk 10,000 daihmei ramv ndat pat ro. Hei tei rav bamv, Nthan Liangmei Bamv khang e. 4Hei tei mi kandic tuang nthanmei langv the, Ringhpouc ta katuang Ravkai khou siamruai swmei amuh nunc khang reicpatloumei tuang e. Hei tei amuh nunc kai khatni Ravkai swloumei bamv khang e. 5Mi ramv kapaek akhat tei rui Ravkai lungc khou taanvtaanh makmei Levimei nunc lungh khang reicpat nina e. Khoutei kaniw lungh khang kaidai nai puni.
6Nthanmei ramv daeng khou tei, chowbuk 25,000 saenghmei khatni chowbuk 5,000 daihmei ramv akhat Isaraelmei lungc nii niimei lunghmei kaidai khang reicpatlou nina e.
Guangh tuang Ramv
7Guangh tu bammei guangh tuang ramv khang ni reicpatlou nina e. Hei tei nthanmei ramv tuang neihkeylou biak ramvrei khou rui Mediterranean duipui nganv; khatni neihpat biak ramvrei khou rui mi kandic tuang neihpat ramvrei nganvmei ramv tei nina e. Kumna mi ramv saanv tei Isaraelmei kaikhwang akhat khang tiiloumei ramv saanv lev nchamc nina e. 8Mi ramv langv tei kandih sinmei guangh tuang dam e. Mi hei kamei rui meic nunc ta tiryanra dat makna katuang katuang ramv khou tilungc sym sim bam khang e.
Guangh nunc rui Tat Nimei Riak
9Kauh Liangmei Ringhpouc rui sa the, “He Isaraelmei guangc nuncle, nangniw paapc taanc saengc langv khe. Nangniw rui meic nunc ta sw kasic karoucmei khatni rairiumei tuang taanv guay tei taanc nthaekc tho. Nchumhmei taanv taanc dat tho. Nangniw rui amei nunc ta kaniw tuang kandic khou rui alay ganc dat taan tho. Kauh Liangmei Ringhpouc ai rui mi hei nangniw khou sa bammei tuang e.
10“Meic kathuicna duh khatni ndath ryan tei nchumhna sin nina e:#Lev 19.36
11“Nggiuh khatni handuk tei nchamc nina e. Kaneimei hei homer tuang dath khou rui ndat nina e. Mi kiu heikumna sw nina e:
Homer akhat = epha ruh = bath ruh
12“Nangniw tuang duh tei mi hei lev nchamc nina e: gera 20 = shekel akhat, shekel 60 = mina akhat.
13“Nangniw rui puatkat tii guang nimei kiu mi hei e: Gehu tay guangmei guay khou rui 60 pum akhat akhat, Sipian tay guangmei guay khou rui 60 pum akhat akhat. 14Olive thauc laaguangmei guay khou rui 100 pum akhat akhat (Hei tei bath rui kumna ndat ro: bath ruh homer akhat = kor akhat). 15Lauziu 200 pum akhat akhat.
Nangniw tuang, paap kuaklou khang rui nap-bi puatkat, khouringh kapumc rawna khaeng nimei puatkat, khatni alamv puatkat hei guay hei kat nina e. Kauh Liangmei Ringhpouc ai rui mi hei latdanv swna tiimei tuang e.
16“Mi kandic tuang maansei kaguayna rui mi puatkat guay hei lsaraelmei tuang kandic sin bammei guangh khang tei phungc guang nina e. 17Kumna Bwthanh Ngai guay khou, Sabbath guay khou khatni baih baihmei ngai guay khou Isaraelmei kapwm khang kapumc rawna khaeng nimei khouringh nunc, nap-bi puatkat, khatni drakhadui puatkat hei guay hei phungc guang nina e. Isaraelmei paap guay kuaklou diu khang paapc khang khaeng nimei puatkat guay, nap-bi puatkat guay, kapumc raw nimei tuang puatkat guay, khatni alamv puatkat guay kamei rui phungc pat nina e.”
Khumngai guay
(Tat 12.1-20; Lev 23.33-43)
18Kauh Liangmei Ringhpouc rui sa the, “Rey liangmei bw tuang rey liangmei tingmik nungc hiaksuimei guaituamchic akhat khaengna Ravkai tei sw nthan nina e. 19Paapc khang khaengmei khouringh zei tei amuh tei rui laana Ravkai tuang kaimun tiangc khou, ravchapaeng kwn padeih khou, khatni kalungcmei kaimav gut nimei chaengmun tiangc nei khou tei teylou nina e. 20Thay makna khatni maanvna taancloumei thowkumhmei tuang paap khang rui hei tei kumcna mi bw tuang chaneimei nungc tei taanc muay nina e. Hei tei kumcna nang rui Ravkai tei sw nthanlou nina e.
21“Reymei bw tuang zaeng 14mei nungc Kaanpatmei Ngai tei ngay nina e. Kumna meic kathuicna khay lou makmei ntyan zaeng chanei tu nina e.#Tat 12.1-20; Sin 28.16-25 22Rey liangmei nungc tei kandih sinmei guangc tei rui katuang paap khatni meic kathuicna tuang paap khang guaituamchic akhat khaeng nina e. 23Mi zaeng chanei tei tingmik kathuic hiaksuimei guaituamchic akhat akhat khatni lauziuchic akhat akhat dowluaina hei tei kapumc pwm rawna khaeng nina e. Kamei rui tingmik kathuic ziuchic akhat akhat paapc khang khaeng nina e. 24Guaituamchic khatni lauziuchic kathuic tei lev nap buanh akhat khatni Olive thauc handuk kathumh lev kat kazauh nina e.
25“Chaneimei bw tuang zaeng 15mei nungc kahouhmei zaeng chanei Ngai khou tei ni guangh tei rui mi zaeng chanei tei tingmik kathuic paapc khang khaeng nimei, kapumc rawna khaeng nimei, khatni Olive thauc lev nap-bi khaeng nimei tei Kaanpatmei Ngai khou tei lev nchamcna khaeng nina e.”#Lev 23.33-36; Sin 29.12-38
Currently Selected:
EZEKIEL 45: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
