EZEKIEL 46
46
Guangh rui Khumngai khou Sw Nimei
1Kauh Liangmei Ringhpouc rui sa e, “Kalungcmei kaimav khou gut nimei neihpat biak raengcmun tei taanvtaanc nuhmei zaeng charuk tei mbangh lana hei tei Sabbathneic khatni Bwthanh Ngai nungc na laanc nina e. 2Kandih sinmei guangh tei kapaengcmei kaimav khou tei rui chaengmun tuang kailangv daihmei khou tei gutna chaengmun tuang tiangc guay daeng khou tei ding nina e, hei ganv khou tei amuh nunc rui katuang puatkat raw bam nina e khatni alamv puatkat kat bam nina e. Mi chaengmun khou tei kamei rui kalum lana tatpat dat nina e. Mi chaengmun tei tingzyn key mak saanv mbangh lak nina e. 3Sabbathneic kathuic khatni Bwthanh Ngai pum meic kathuicna mi chaengmun khou tei nkhum keyna Ringhpouc ta kalum nina e.
4“Sabbathneic kapumc rawna khaeng khang hiaksuimei lauziunac charuk khatni lauziuchic akhat guangh rui Ringhpouc khou phungc guang nina e. 5Lauziuchic kathuic nap buanh akhat kat kazauh nina e, khatni lauziunac pum sing kamei rui tii niimei puat akhat akhat tikazauh guang nina e. Kumna nap-bi kat khang hei kamei rui Olive thauc kaduk kathumh phungc guang nina e. 6Bwthanh Ngai khou kamei rui hiaksuimei guaituamchic launa akhat, lauziunac charuk khatni lauziuchic akhat kat nina e. 7Guaituamchic akhat khatni lauziuchic akhat kathuic tei nap buanh akhat akhat kat kazauh nina e, khatni lauziunac katmei kathuic tei guangh kamei rui kat nii niimei puatkat kat kazauh nina e. Kumna nap-bi katmei khou tei Olive thauc kaduk kathumh kathumh ni kat kazauh nina e. 8Guangh tei rui chaengmun tuang kailangv daihmei khou tei rui kamei gutmei chaeng tei pat dat nina e.
9“Khumngai khou kalum khang guangmei nunc tei kalum tang e thei dihpy biak chaengmun khou rui gutmei nunc tei dihba biak chaengmun khou rui tat dat nina e khatni dihba biak chaengmun khou rui gutmei nunc tei dihpy biak chaengmun khou rui tat dat nina e. Meic gaanv khat na sini kamei gutmei chaeng tei hanc dat nuh mak ge, tat nzutna tat nina de. 10Meic nunc rui guang pwkhou guangh tei ni guang nina e khatni meic nunc rui tat dat pwkhou guangh tei ni tat dat nina e. 11Khumngai khatni ngay daih nungc guaituamchic hamh e thei lauziuchic katmei kathuic nap buanh akhat akhat lev lauziu kathuic tei meic nunc rui kamei kamei rui tii nii niimei puatkat kat kazauh guang nina e. Kumna nap-bi katmei khou tei Olive thauc kaduk kathumh kathumh ni kazauh nina e.
12“Kandih sinmei guangh tei rui kamei kahawmei theilayna Ringhpouc khang kapumc rawna khaengmei pwni alamv puatkat khaengmei pwni khaeng niimei tuang nai e thei kalungcmei kaimav khou gut nimei neihpat biak chaengmun tei kakhang laanclou nina e. Sabbathneic khaengmei tei kumcna kamei khaeng nina e, kumna kamei tat dat kan e thei chaengmun tei mbangh dat nina e.”
Tingmik Kathuic Khaeng Nimei
13 Ringhpouc rui sa e, “Lauthwan kathuic hiaksuimei tingkwm akhatmei lauziunac kapumc rawna Ringhpouc khang khaeng nina e. Mi hei tingmik pum khaeng nina e. 14Khatni ntyan buay handwang kanei khatni ntyan buay lev kariu khang Olive thauc kaduk akhat ni lauthwan pum kat nina e. Mi riak hei tingsaengzaeng kumna tat key bam nina e. 15Lauziunac, ntyan buay, khatni Olive thauc tei Ringhpouc khang lauthwan pum tingsaeng kat bam nina e.”
Guangh tuang Ramv
16Kauh Liangmei Ringhpouc rui latdanv tii e: “Guangh rui katuang ramv kanac mpouh gaanv khat khang kaipat swna tiimei tuang nai e thei, mi ramv tei kakai kaikhunc tuang ramv sw nzut bam nina the. 17Tiki guangh tei rui katuang ramv kabangc akhat khang tii e thei, tingkwm 50 tangv hei tei guangh tuang ramv sw dat nina e. Hei tei guangh tuang de, kumhpui zaeng rui guangh khatni kanac mpouh nunc na rui hei tei katuang sw nzut nina de.#Lev 25.10 18Kandih sinmei guangh rui meic nunc tuang ramvdui tei laa nuh mak ge. Kamei rui kanac mpouh nunc khang ramvdui tii nimei tuang nai e thei kakhang tiiloumei ramv khou tei rui tii nina e, kumna hei tei meic nunc tuang ramv tei asut laa mak khang e.”
Ravkai tuang Suanghpui Bamv guay
19Mi tangv tei dihpy biak kaimav karihmei amuh nunc tuang nthanmei kailangv guay daeng khou naimei kaimun chaeng tei rui mipu tei rui ata nduangh gutna neihkey biak tin thangc naimei bamv akhat akhou lyanlou khwan e. 20Kamei rui akhou sa the, “Mi bamv tei amuh nunc rui khaengmei zanc suanghmei bamv, khatni khaengloumei tuang ntyan kabicmei bamv khang e. Kalam thu nthanmei puat tei kapaengcmei kaimav thangc phungc patna meic nunc ta swtanac mak khang e.”
21Mi tangv tei mi pu tei rui ata kapaengcmei kaisangh khou khatni mi khou tei naimei katin padeih khou nduanghlou khwan e. Mi kaisangh katin padeih khou tei nthyam maihmei kaisangc naidat khwan e. 22Mi kaisangh tin padeih khou tei chowbuk 40 saenghmei 30 daihmei kaimav nai khwan e. Katin padeih tei kasaeng kadai nchamc e. 23Mi langv tei ntauh rui karaeng akhat akhat swna raenglou e, kumna karaeng khou tei mai bamv sw nkuaylou e. 24Mipu tei rui akhou sa e, “Mi hei meic nunc rui katloumei zanc guay tei Ravkai siamruaimei nunc rui suanghmei bamv nunc e.”
Currently Selected:
EZEKIEL 46: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
