EZEKIEL 44
44
Neihpat Raengckat tei Sinswmei
1Mipu tei rui ata Ravkai tuang neihpat biak thangc naimei kapaengcmei raengckat khou tei zay guanglou the. Mi raengcmun tei mbanghlou bam khwan e. 2Khoutei Ringhpouc rui akhou sa the, “Mi raengcmun hei mbanghlou bam puni, kumna mi hei laanc zat lak ge. Maansei gaanv khat na ta sini mi hei tisinsw lak ge. Kalam thu Ringhpouc Isarael Racguangc ai rui mi khou hei tat gut the. Mi hei mbanghlou bam nina e. 3Tiki, kandih sin bammei guanghnac tei nthanmei taektw ahu khou tu khang hei khou tat nuh e. Kalungcmei tin khou naimei kailangv daihmei tei tat alamvna kamei rui mi kaimun khou tei gutna mi chaeng tei pat dat nina e.”
Ravkai khou Gut Nimei Riak
4Mi tangv tei mipu tei rui dihpy biak raengcmun khou tei rui nduangh gutna Ravkai kaimav khou tei nduangh gutlou the. Ai rui zauc pwkhou, Ringhpouc tuang titah tamei riw rui Ravkai tei padikna bammei ta ai how the. Khoutei ai kandih khou bow nkhum khuakh khuak key the. 5Khoutei Ringhpouc rui akhou sa the, “Maansei nacle, nang rui howmei khatni chumei khou tei lunghgutlou o. Ravkai khou tat key nimei thiak riak guay tei ai rui nang khou dinclou puni. Thow thow ta Ravkai khou tei gut khang nuhlou bu cho khatni thow thow ta nuhlou mak bu cho twmei zauc chuyna zauc o.
6“Kauh Liangmei Ringhpouc ai rui sa e twna meicliammei Isaraelmei kai khou sa tho, ‘Nangniw rui meic chanymei taanv taancna bammei tei ai nuh mak khe. 7Kaniw rui khaengmei tuang thav khatni zei tei akhang katmei ganv khou tei gih ruamh makmei, alat piu makmei zaatc baihmei ta tigutna atuang Ravkai kaniw rui swtanac the. Kumna meic nunc tei rui kaniw rui taanc bammei chanymei taanv guay tei rui atuang latdyng sw bak the. 8Ravkai tuang nthanmei tuang taanv guay tei kaniw rui taanhmei phaan hei tei zaatc baihmei ta tisin the.
9“Kauh Liangmei Ringhpouc ai rui sa e twmei thu gih ruamh makmei zaatc baihmei, alat piu makmei meic gaanv khat na sini atuang Ravkai khou gut nuh mak ge; zaatc baihmei Isaraelmei pang khou lungc bammei gaanv khat na sini gut nuh mak ge.”
Levimei ta Amuh khou Tikazauh Makmei
10 Ringhpouc rui akhou sa e, “Isaraelmei baih baihmei nunc theilayna ata ganclouna ravmaengc nunc ta kalum tat kanmei Levimei nunc ta ai rui dandi tii puni the. 11Kaniw rui Ravkai tuang raengckat guay tei sinna khatni Ravkai tuang taanc nimei taanv guay tei taancna asiamruai sw nuh e. Rawna kat nimei khatni khaeng nimei khouringc guay tei kaniw rui dowluai nuh e, kumna kaniw tei meic nunc tuang siamruai swmei hei kaniw tuang thouc sw nina e. 12Kalam thu kaniw rui thouh swna Isaraelmei nunc ta ravmaengc kalum nduanghna meic nunc ta kaniw rui paapc khou zayloumei zaeng rui, kaniw ta dandi tii puni the twmei hei Kauh Liangmei Ringhpouc atuang nthukmei latdyng e. 13Kaniw tei amuh swna ataanv taanc nuh mak ge, atuang nthanmei daeng khou tei kaniw guang tuanc nuh mak ge, khatni Nthan Liangmei Bamv khou tei kaniw gut nuh mak ge. Mi hei kaniw rui chanymei tuang taanv taanc kanmei tuang dandi tei e. 14Tiki kaniw kaniw pumtan rui taanc nimei tuang Ravkai tuang taanv guay tei kaniw ta titaanc puni.”
Amuh nunc
15Kauh Liangmei Ringhpouc rui sa the, “Isaraelmei baih baihmei guay tei rui akhou rui tat ngam khwan sini Zadok khou rui lungc keymei Levimei amuh nunc gaanvsaekc thu Ravkai khou asiamruai swna bam e. Kumhpui zaeng rui kaniw tei rui asiamruai sw nina e khatni khaengmei tuang thav khatni zei tei akhou kat nina e. 16Kaniw na tei rui atuang Ravkai lungc khou gutna atuang ravchapaeng khou tei siamruai sw nina e khatni Ravkai khou kalummei tuang khou tei zaylou nina e. 17Kaniw rui Ravkai tuang kalungcmei kaimav khou gut nimei raengcmun khou tei gut pwkhou, kaniw tei linen phey piu nina e. Kalungcmei kaimav khou hamh e thei Ravkai lungc khou kaniw rui taanv swmei ganv khou tei ramh hiw phey rui kasiamhmei pheybaan piu lak nina e.#Tat 28.39-43; Lev 16.4 18Kumna kaniw talanv pat mak khang rui linen pykha kha nina e khatni linen nay nsuay nina e, tiki bungkam thu linen rui sw lak nina e. 19Meic nunc bammei bamv kapaengcmei kaimav khou tei kaniw pat dat mak khou kaniw rui Ravkai lungc khou taanv sw khou piumei pheybaan tei luak patna nthanmei kailangv khou tei ganclou duc nina e. Kaniw tuang nthanmei pheybaan tei rui meic baihmei ta tikahilouna meic nunc khang simei swlou mak khang kaniw tei pheybaan baihmei piu dat nina e.#Lev 16.23
20“Amuh nunc tei kaniw py guat nuh mak ge kaniw sam ni saengc nuh mak ge. Kaniw sam tei biuc rap twmei saanv nzuakc nina e.#Lev 21.5 21Amuh nunc tei kalungcmei kailangv khou gut nimei hu khou drakhadui zangv lak nina e.#Lev 10.9 22Meic rui muloumei ntumei ta amuh nunc thu kaw nuh mak ge; kaniw tei Isaraelmei tunac hamh e thei amuh akhat rui theic ntamvloumei maypui na ta kaw nina e.#Lev 21.7,13,14
23“Tabui tei nthanmei khatni tabui tei nthan makmei khatni kariak theilayna tabui tei nthanmei tabui tei nthan makmei twmei guay hei amuh nunc rui meic nunc khou nchamlou nina e.#Lev 10.10 24Latpat-lupatmei tuang nai e thei amuh nunc rui hei tei atuang riak theilayna latzan sw nina e. Khumngai guay tei atuang riak theilayna kaniw ngaek nina e, kumna kaniw rui Sabbath tei nthanna ngaek nina e.
25“Theihmei tei kapui kapu, kanac, kachana hamh e thei mih makmei katanpui hamh e thei thu amuh nunc rui phouh ta kahina kaniw pumc swtanac lak nina e.#Lev 21.1-4 26Kumna swtanac kanpui mei tei kamei nthan datmei tangv zaeng chanei nkhwan lana mi tangv tei 27Ravkai tuang kalungcmei kaimav khou tei gutna kata sw nthanmei tuang puatkat kat nina e. Mi tangv tei kamei Ravkai khou tei taanv taanc dat nuh the. Kauh Liangmei Ringhpouc ai rui sa the.
28“Amuh nunc tuang dam kiu ai hei the. Isarael khou kaniw ramvdui nai lak nina e; ai hei kaniw tuang kiu raph di the.#Sin 18.20 29Nap-bi katloumei, paapc khang khatni nkhuai mbaloumei khang khaengloumei, hei guay tei kaniw tuna lungc nina e, khatni Isaraelmei rui akhang reicpatloumei kaguayna tei kaniw khang the.#Sin 18.8-19 30Rey liangmei gay liangmei thai guay tei khatni nangniw rui nkunmei swna tii guangmei kaipat guay tei amuh nunc khang e. Nangniw rui ntyan kasiamhmei kathuic, rey liangmei ntyan paek tei katpuat swna amuh nunc khang tii nina e, kum e thei asuaihiam hei kaniw kai khou chungclou puni. 31Khouringh pwni nruayna pwni karana theicloumei hamh e thei ramhkhat rui swluailoumei tei amuh nunc rui khuaic tu lak nina e.”#Lev 22.8
Currently Selected:
EZEKIEL 44: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
