EZEKIEL 43
43
Ringhpouc Ravkai khou Guang Datmei
1Mipu tei rui ata neihpat biak karihmei raengckat khou zaylou the. 2Isaraelmei Racguangc tuang karangmei hym tei neihpat biak thangc rui guangmei ta ai khou tei how the. Ravguangc khwan tei duipui khwan kumc e khatni kandih tei katuang karangmei riw rui gaanc the.#Eze 10.3,4,18,19; 11.22,23; Nda 1.15 3Mi ndawman khou howmei hei Ravguangc rui Jerusalem ta swmaan khang keymei ta tei howmei tei kumc e khatni Kebar duithuak daeng khou howmei tei kumc e. Khoutei ai kandih khou sow nkhum khuakh khuak key the. 4Mi karangmei riw tei neihpat raengckat khou rui gutna Ravkai lungc khou tei gut kan the.
5 Ringhpouc tuang bumaengc rui ata zay thauna kalungcmei kaimav khou tei phungc gutlou the. Khoutei Ringhpouc tuang hym rui Ravkai khou gaanc padik bammei ta ai how the. 6Mipu tei adaeng khou ding bam khwan e kumna Ringhpouc rui Ravkai lungc khou rui kumna sa patmei ta ai chu the: 7“Maansei nacle, mi hei ai Isaraelmei pang khou bam nimei tuang guangh bamvpaeng e, kumna ai rui tingsaeng katuang guangc sw bam puni. Isaraelmei nunc rui pwni kaniw tuang guangh nunc rui pwni rav baih baihmei ta kalumna hamh e thei kaniw tuang guangc nunc tuang phouh guay tei mi bamv khou mbeihlouna atuang nthanmei zanc ta swtanac dat zat lak khe. 8Guangh nunc rui guanghkai tuang kaimun bamv khatni kaimun tiangc guay tei atuang Ravkai tuang kaimun bamv khatni kaimun tiangc lev sw daclouna kaniw lev akak khou ngaengsaengc akhat na rui daengc langclou the. Heikumna kaniw rui taanc bammei chanymei taanv guay rui atuang nthanmei zanc ta swkasiclou the, kumhpui zaeng rui alungpuam khou ai rui kaniw ta swkamut kamailou the. 9Ntaw thu kaniw tei baihmei rav nunc ta kalum taan nina the khatni guangh nunc tuang phouh guay tei laa ganc nina the. Kaniw rui kumna sw nthan pw e thei, ai rui kaniw pang khou tingsaengzaeng lungc bam puni.”
10Kumna Ringhpouc rui sa dat re, “Maansei nacle, Ravkai lam khou tei Isaraelmei nunc khou sa dat ro, kumna mi tuang chamvraeng tei kaniw ta tikathai o. Kaniw tuang paap taanv guay lam khou tei kaniw ta tizak go. 11Kaniw tuang taanv khang tei kaniw zak pw e thei, Ravkai sw nimei thak tei kaniw khou dinclou ti tho: kaithiak, gut nimei chaeng khatni pat nimei kaimun guay, kalwn, ramh guayna lou nimei tuang thiak, khatni kachap kariak kaguayna tei dinclou ti tho. Akumhna ramh guayna hei kasiamh nina cho twmei kaniw thay kan khang khatni mi tuang riak guay hei tat key kan khang mi guayna hei hy keylou tho. 12Mi hei Ravkai tuang thiak kiu the: chyngtwan khou Ravkai daeng nkuaymei ramv guay tei nthanmei bamv e.”
Ravchapaeng
13Mi hei ravchapaeng dat re, Ravkai ndatmei tuang dat tei lev nchamcmei dath re. Ravchapaeng khou tei chowbuk akhat daic, chowbuk akhat nthuk, khatni katin tei ku khat nsumei thukh nai nkuay e.#Tat 27.1,2; 2 Ki 4.1 14Kabam khou tei rui thauna ravchapaeng tuang ana liangmei bamv dak tei chowbuk kanei kauh e. Mi ruc khou langv tei daic maihmei langv chowbuk akhat nsumei rui nkuayna chowbuk padeih kauhmei langv nai e. 15Kapy twan, khaeng puat raw nimei bamv tei chowbuk padeih kauh e kumna mi kwn padeih khou rui kachei padeih karih ku e. 16Ravchapaeng py bamv tei kasaeng kadai chowbuk 12 e. 17Nchungmei lungc tei ni kasaeng kadai chowbuk ruhna padeih padeih e, kumna katin khou tei chowbuk kapaek kauhmei kagaeng nai ngguic e. (Kagaeng tei chowbuk akhat daic e.) Ravchapaeng khou ku nimei phaykhuat tei neihpat biak thangc nai e.
Ravchapaeng tei Katgutmei
18Kauh Liangmei Ringhpouc rui akhou sa e, “Maansei nacle, ai rui nang khou samei hei nking o. Ravchapaeng tei kasiamhlou tang pwkhou, mi ruc khou tei ravcha rawna khatni khaengmei khouringc zei kazinhlouna hei tei katgut nina e.#Tat 29.35-37 19Levi kaikhwangmei Zadok khou rui lungc keymei kikta nunc na rui adaeng khou guangna asiamruai sw nina e. Mi hei Kauh Liangmei Ringhpouc atuang latdanv e. Paapc khang khaeng khang nang rui kaniw khang guaichic launa akhat tii nina e. 20Nang rui zei tei laana ravchapaeng tuang chei padeih khou tei, ravchapaeng chung tuang kwn padeih khou tei, khatni katin nkuaymei khou tei teylou nina e. Hei tei kumcna nang rui ravchapaeng tei sw nthan lana katgut nina e. 21Paapc khang khaengmei guaichic tei nang laana Ravkai ramv kaizaengc khou mi khang tei rui swloumei bamv khou tei raw nina e. 22Nthuanh thau datna hiaksuimei ziuchic akhat laana paapc khang khaeng nina e. Guaichic zei tei rui sw nthanmei thiak tei kumcna, mi ravchapaeng tei ni lauziu zei tei rui sw nthan nina e. 23Nang hei tei taanc tang pwkhou, hiaksuimei guaichic launa khatni lauziuchiclauna laana, 24hei tei akhou phungc guang nina e. Amuh nunc rui mi khou tei ntey kazinhlouna hei tei rawna akhang khaeng nina e. 25Paapc khang rui tingmik pum ziuh akhat, guaichic akhat, khatni lauziuchic akhat khaengna zaeng chanei khaeng nina e. Mi guay tei hiaksuimei rana nina e. 26Heikumna amuh nunc rui ravchapaeng tei zaeng chanei sw nthanmei taanv taanc lana, hei tei sinsw nuh khang swlou nina e. 27Mi zaeng chanei tei luai pwkhou, amuh nunc rui rawna khaengmei khatni alamv puatkat katmei taanv tei zaeng tachatmei nungc rui taanc thau nina e. Kum pwkhou, ai rui nangniw kaguayna ta pianlou puni. Kauh Liangmei Ringhpouc ai rui sa the.”
Currently Selected:
EZEKIEL 43: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
