TATPATMEI 17

Taudaic khou rui Dui Patmei

(Sin 20.1-13)

1Isaraelmei kapwm tei Sin tuang tazikramv khou rui tat thau datna, Ringhpouc tuang latdyn theilayna zypui kalaic kalaicna tat bam khwan e. Kaniw Rephidim khou zypui guang sw the, tiki khou tei dui maek khwan the.#Sin 20.2-13 2Kaniw rui Mousi ta nutna, “Aniw zangv khang dui tii tho” twna sa the.

Mousi rui daw the, “Nangniw tabui swna pian makna katuaih-kaninh bam tu cho? Tabui swna nangniw Ringhpouc ta nchanv bam tu cho?”

3Kum e tiki meic nunc tei mpeyna tari the kumna kaniw Mousi khou nutna sa the, “Tabui swna nang aniw ta Izip khou rui nduangh pat tu cho? Aniw ta, aniw nac nunc khatni khouringh khounah ta dui khaengvna swluai khang phungc patlou tu cho?”

4Mousi rui kalung kabiuna huayneyna Ringhpouc khou sa the, “Mi nunc khou hei ai tabui tuang sw kho cho? Kaniw ata ntauh nkwam puni the.”

5 Ringhpouc rui Mousi khou sa the, “Isaraelmei kapy nunc asaekc ta nduanghna meic nunc hu khou tat kasuakcna tat pat tho. Nang Nail duithuak ta bai kanmei builwang tei sin o. 6Sinai Chyng khou tei nang hu khou ntauh ruc khou ai ding bam puni. Mi tauc ta tei kagit tho kum pwkhou meic nunc tei zangv khang dui pat puni the.” Isaraelmei kapy nunc hu khou tei Mousi rui hei tei sw the.

7Mi bamv zanc tei Massa khatni Meriba twna phuaklou the kalam thu “Ringhpouc hei aniu pang khou bam di ny hamh e thei bam mak khena cho?” twmei tuang e.

Amalekmei lev Rih Swmei

8Amalekmei rui guangna Isaraelmei ta Rephidim khou adow the. 9Mousi rui Joshua khou sa the, “Nthuanh kiu Amalekmei ta adow khang meic kadah tho. Ravguangc rui ata sin o twna samei builwang tei zay thauna ai chyngbut ruc khou hei dingna bam puni.” 10Mousi tuang latdanv theilayna Joshua rui tancna Amalekmei ta adow khang pat the. Khoutei Mousi, Aron khatni Hur chingcbut thangc tei ku the. 11Mousi rui kabaanc zay thau bam saanv Isaraelmei rui ngam the, kabaanc tei lou key ti thei Amalekmei rui ngam gut dat the. 12Mousi baanc tei anang guang pwkhou Aron lev Hur rui Mousi bamv khang ntauh puanc guanglouna kaney rui kadaeng khou dingna neih key mak saanv kabaanc tei hou nkhavlou the. 13Hei tei kumna Joshua rui Amalekmei ta rih ngam the.

14Khoutei Ringhpouc rui Mousi khou sa the, “Mi ric ramngam hei ningtow bam khang hykeylou o. Ai rui Amalekmei ta swmaan mutsutlou puni twna Joshua khou sa tio.”#Ria 25.17-19; 1 Sa 15.2-9 15Mousi rui khou tei ravchabamv kasiamh thauna mi zanc tei “Ringhpouc hei atuang chuangcphey e” twna phuaklou the. 16Kamei rui sa the, “Ringhpouc tuang chuangcphey tei zay kauh thau o! Ringhpouc rui Amalekmei ta meickin meickin adow bam puni!”

Currently Selected:

TATPATMEI 17: RONGBSI

Highlight

Copy